Read Termanu YEREMIA 5 Bible Online

YEREMIA 5 - Termanu bible

YEREMIA 5

¹Hei laun Yerusalem-mala lemin, la'ok ndolo-ndolo eno-enok manai emi kotam-ma! Sanga nai basa mamanak lala'en-na, fo mita matam. Palisak mook manai uma manek-ka so'dan-na, ade hapu hataholi manatao ndoos esa, ana sanga enok fo ana lilineka neu Manetualain do ta. Metema hapu, soona neukose MANETUALAIN fe do'o do ampon neu Yerusalem.

²Emi mafa'da mae emi sene-do'ok neu MANETUALAIN, te se'kona emi dale dodoom-ma, ta leondiak fa.

³Te'e-te'e, MANETUALAIN nokek-ka nde, lilinekak-ka. MANETUALAIN fepa emi, tehu emi ta mafaduli fa. Ana tao nakalulutuk emi, tehu emi ta nau nanoli emi fa. Emi langa batu, ma ta nau tuka tei-sale dale meme emi sala-singom mai fa.

⁴Au dudu'a-dodoo ae, “Ah, sila ka'da laun matasi'da-matasaek, fo ala ta bubuluk hata-hata fa. Ala tao tunga sila nggoan-na, nanahu ala ta bubuluk hata fo, Amak MANETUALAIN nahiik-kana, ma noken neme sila mai.

⁵Malole lenak au u leo hataholi matua-madema-ma u, fo au kokolak os. Tao leo bee-o, ala bubuluk hata fo, Amak MANETUALAIN nahiik-kana, ma noken neme sila mai.” Tehu sila basa-basas boeo, ta nau MANETUALAIN paleta sila fa; ala ta nau tunga fan.

⁶Hu ndia de, neukose singa neme nula dale mai, fo taonisas, ma busa fuik-ka neme moo solokaek-ka mai, fo sii-sii lulu'is. Neukose meoasu-la lapanggela, fo ala sanga nana'an-na, nai deka no sila kotan-nala, fo ba'eneu hataholi see, fo ana kalua soona, neukose ala kaa-nan. Basa sila-la ala da'di, nanahu ala tao sala-singok makadotok so, ma lasadea Manetualain la'inono'ik.

⁷MANETUALAIN nafa'da nae, “Tao le'e de, Au muse fe do'o do ampon neu Au anang-ngala sala-singon? Ala la'o ela Au so, de ala sene-do'ok neu lamatua daebafak fe'ek. Au fes nana'ak, de la'a losa lakabete, tehu ala hohonge, ma nasi'a leu leo ina manasosoa-piaok-kala leu.

⁸Sila sama leo ndala mane fo maao, balakaik ma kala'bik-ka; sila esa-esak, nahiik seluk no nonon-na saoinan-na.

⁹Tao le'e de, Au ta muse huku leoina matak leondiak-ka, ma balas hata fo ala tao basan ndia fa?

¹⁰Neukose Au adenu musu-a neu, fo ana tao nalutu sila osi angol-la, tehu ana ta tao nakalulutuk-kana fa. Neukose, Au adenu musu ndia, fo ana ta'ti heni sila ai angol-la ndanan-nala, nana ndanak sila-la, Au nuung ta sila fa.

¹¹Hataholi Israel-la, ma hataholi Yehuda-la, te'e-te'e ala ke'di-ndiu basa Au so. Au, fo MANETUALAIN nde manakokolak-ka.”

¹²MANETUALAIN anan-nala, lafa'da hata fo ta la'e fan, la'eneu MANETUALAIN. Ala lafa'da lae, “Ah, neukose Ana ta tao hata-hata fa. Neukose soe ta la'e ita fa, ma neukose ita ta la'ola'di natee-natatik, do la'a-ndoes fa.

¹³Bole tafa'da tae, nabi sila-la, ka'da anin mesan, nana MANETUALAIN hala hehelun-na, ta nai sila fa.”

¹⁴Boema MANETUALAIN Fo Manakoasa, nafa'da au nae, “Yeremia, hu kande hataholi sila-la kokolak lae leondia, de neukose soe-a la'es, fo tunga sila hahapun-na soona, neukose soe ndia ta da'di fa. Neukose Au akadada'dik au hala-kokolang sama leo ha'i nai o bafam dale. Fo leoina ia, neukose ana da'di ai ha'i, fo ha'i ndia na'a henis.”

¹⁵Ai hataholi Israel-la lemin, MANETUALAIN nadenu leoina esa, ana mai neme nusa dook mai, fo ana sapu-na emi. Leoina ndia, nai ia, neme makahulun eli mai so, emi ta malelak dede'an-na fa. Hataholi sila, balakain-na seli,

¹⁶ma hataholi manaho'u kokoun-nala, ao makadelek ma palani; ala lanisa, no ta pake ha'da hataholik fa.

¹⁷Neukose la'a heni emi daem-ma buna-boan, ma emi nana'am-ma, boema ala taolisa emi anam-mala. Neukose ala ta'ti emi sapim-mala, ma ala do'do emi bi'ilopom-mala, ma ala tao lakalulutuk emi osi angom-mala, ma emi ai kaam-mala. Neukose ala tao lakalulutuk kota-kota makota musuk fo, emi masalai emi deam-ma neus-sala.

¹⁸MANETUALAIN nafa'da nae, “Leomae leondiak boe, nai lelek ndia boe, neukose Au ta tao amopo-amate Au anang-ngala fa.

¹⁹Tehu metema, ala latane lae, tao le'e de Au tao basa sila-la soaneus soona, hei Yeremia mafa'da leon, mae sama leo sila la'oela Au nai sila nusa mesan-na, fo da'di ata neu leoina fe'ek-kala lamatua daebafan-nala, leondiak boe, neukose sila da'di ata neu hataholi nusa dea-la, nai nusa fe'ek.”

²⁰MANETUALAIN nadenu au, anduku-alosak hala hehelun ia, neu Yakob tititi-nonosin fo manaleo nai Yehuda, nae

²¹ “Mamanene leon, hai emi fo, hataholi nggoa-panganak-kala lemin! Emi mamatak, tehu emi ta mita fa, madi'idook, tehu ta mamanene fa!

²² Au nde MANETUALAIN-na; te tao le'e de, emi ta bii-mamata'u neu Au fa? Tunga ndoon-na, emi muse dele ngge'be-ngge'be neu Au! Au nde tao tasi su'un-na, da'di tasi too-lanen, fo ta hapu la'o lena fan, losa dodoon-na. Tasi fo'a, fo lii-la napoponu, tehu ana ta hapu lena dae too ndia fa.

²³Tehu emi malanga batu manseli, ma hii ka'da lena-la'bak; emi singo heni enok-ka, de la'oela Au.

²⁴Emi ta mafandele mita, fo fe ha'da-holomata neu Au boen, te se'kona Au nde fe u'dan-na, nau nai makasososan-na, do nai mate'en-na boe. Au boeo nde fe emi, fai keketu-kokoluk, tunga teun.

²⁵Tehu emi sala-singom sila-la, nde lapangge basa hata malole sila, nalosa emi ta hapu fan.

²⁶Hai Au anang-ngala lemin, hapu hataholi mangalauk, nai emi dalek. Sama leo hataholi-a nanea hihi'ik fo nanalonak, soaneu nala manupui, leondiak boe, sila lona hihi'ik, fo nala hataholi daebafak-ka.

²⁷Sama leo hataholi manausi manupui-a, ana tao manupui leo manupui ndunuk dale neu, leondiak boe, sila tao bua-lo'a tipu-daik leo sila uman dale neu. Hu ndia de, ala da'di manakoasa, ma kamasu'ik,

²⁸boema laao, ma so'dan-nala tetu-temak. Sila tatao-nono'i mangalaun-na, too-lanen ta. Ala ta tao ndoos ma matetuk, nai ni'iana kisa-anamaak-kala dede'an dale fa, ma ta lasala'e hataholi nanatuni-ndenik-kala, haak-ka fa.

²⁹Tehu, Au, fo MANETUALAIN, neukose hukus, nanahu basa ha'da-tataok sila-la; neukose Au balas leoina ia, tatao-nono'in-nala.

³⁰Hata esa matuaina, ma neni bibii-namata'uk, ana da'di basa nai nusak ia so, fo nde:

³¹nabi-la, lasapepeko-lasandandali, imam-mala, lalalau-laoono tunga sila dale hihii mesan-na, ma emi, fo Au anang-ngala, hii dede'ak ndia. Tehu metema, fai mate'ek-ka ana losa soona, neukose emi tao hata?”