Read Termanu YEREMIA 50 Bible Online

YEREMIA 50 - Termanu bible

YEREMIA 50

¹ MANETUALAIN hala-hehelun ba'eneu au soaneu kota Babel ma laun-nala.

²“Tao ta'du-tana ma mafa'da basa nggileom-mala mae Babel tu'da so! Boso mafuni dede'ak ndia! Merodakh sila lamatuan-na nakalulutuk so, ma tao naba'e dodoki-dudulak hohongek-kala, no basa sosongok-tatangok nananakadadaek-ka.

³Leoinak esa neme kii mai fo ana tao musu neu Babel ma ana tao nusak ndia da'di nusa ma'dak. Hataholi no bana-manu-la neukose lalai ma esa ta nau leo nai na.”

⁴MANETUALAIN nafa'da nae, “Nai faik ndia hataholi Israel ma Yehuda ala mai kii sama-sama fo sanga Au, sila Amak Manetualain-na.

⁵Neukose sila latane enok mana neu leo Sion, boema ala la'ok leo ndia leu. Neukose ala tao hehelu mate'ek lo au ma ami ho'u mahele.

⁶Au anang-ngala sama leo bi'ilopo manapo'ilotak, fo ala latofa-lasalak nai lete pe'dak-kala hu ka nde manafoo tak, ala laputak leme letek esa leo letek fe'ek leu, ma ala tabubuluk sila uman-na nai be.

⁷Basa hataholi manamatongo no sila sapu las ma ala fe doidosok. Au anang-ngala musu-la lafa'da lae, ‘Beek fo ita tao ndia ta sala fa hu ka nde hataholi sila tao salak neu MANETUALAIN. Bei-ba'ikain-nala lamahele neu MANETUALAIN, boeo sila lamahele ka'da neu Manetualain.’

⁸ Hei Au anang Israel, malai meme Babel leo! O mu makahuluk fo besak-ka nggelok tunga.

⁹Neukose Au fe leoinak luma be'i-balakaik leme kii fo ala sapu-la Babel. Neukose ala tu'u enok fo ala tao musu neu Babel ma sengi henis. Sila nde been-na mana kou malelak-kala fo kokoun-na ta sala fa.

¹⁰Neukose ala loso la Babel, ma neukose manaloson-na kala ho'i la basa hata-heton tunga sila dale hihiin. Au, MANETUALAIN de manakokolak-ka.”

¹¹MANETUALAIN nafa'da nae, “Hei hataholi Babel-la, emi mamanako Au anang-ngala. Emi makabobokuk sama leo ndala nakadii, ma sapi na'a na'u.

¹²Tehu neukose emi da'di leoina nanapake tak neme bada leoina-la tala'da. Neukose o kota matuainam ndia nananakadadaek na nakamamaek. Neukose o nusam-ma da'di moo loak ma moo ma'dak.

¹³Hu ka nde Au amanasa nde Babel da'di nakalulutuk ma hataholin ta, neukose basa manatunga ndia la ala nggenge ma bii.

¹⁴Hei emi manakou-la lemin! Tutu'u enok fo okofeo ma sapu-la Babel. Fe o kokou isim-ma lasale leo Babel, hu ka nde ana tao sala-singok neu Au.

¹⁵Eki kokoa musu nafeo kota ndia! Besak ia Babel bii so. Papala nanadaman-nala nana tao nakalulutuk. Besak ia Au tao babalak neu Babel. Hu ndia de taos sama leo sila tao hataholi fe'ek-kala.

¹⁶Boso fe hataholi fo sele-nggali ma ketu-kolu nai nuasak ndia. Neukose basa hataholi manamai-la fali leo sila nusan, hu ka nde ala bii neu soloda'du matee-matatik-kala.”

¹⁷MANETUALAIN nafa'da nae, “Hataholi Israel-la sama leo bi'i lopo nanausik-kala ma nanabibinga-baba'ek neme meoasu-a mai. Makahulun-na manek Asyur de sapu-na sila, boema Nebukadnezar manek Babel-la napangge na sila duin-nala.

¹⁸Hu ndia Au, MANETUALAIN Fo Manakoasa, neukose Israel Manetualain-na ana huku manek Nebukadnezar ma nusan-na, sama leo manek Asyur-a huhukun-na.

¹⁹Neukose Au fe falik hataholi Israel-la leo sila nusan. Neukose sila la'a-linu leme dae Letek Karmel ma nusa Basan. Neukose sila lakabete leme dae Efraim ma Gilead isin-na mai.

²⁰Nai fain ndia Israel ma Yehuda balisi neme sala-singok-ka mai, hu ka nde Au fes do'o do ampon neu hataholi fo Au tulu-falis-sala, Au, MANETUALAIN de manakokolak-ka.”

²¹MANETUALAIN nafa'da neu leoina maneme kii-la mai, “Sapu-ma laun Merataim ma Pekod. Do'do ma tao mamopo-mamate heni sila. Tao tunga Au paletang-nga. Au, MANETUALAIN de manakokolak.”

²²Hala musu nanggulu nai nusak ia ma ana da'di nakalulutuk.

²³Basa daebafak-ka nanafepak neme Babel losa nakalulutuk, tehu besak ia fefepak ndia la'di henin so! Basa leoina-la lamanene de ala nggenge, beek fo manada'di nai leoina ndia.

²⁴MANETUALAIN nafa'da nae, “Babel, o la'ban Au, hu ndia de o nakahihiii nak neme hihi'k fo Au pasak, tehu o ta mame'da ndia fa.

²⁵Au mamanak pepe'da sisilong-nga nanasoik so ma no basa nasamelung Au kalua sisilo sila, hu ka nde Au MANETUALAIN fo Matua Madema ma Manakoasa neukose tao tataos esa nai Babel.

²⁶Sapu-ma Babel neme basa bu'uk-bu'uk lala'en-na, ma boka heni basa mamana pepe'da gandum-mala mai! Tao makalulutuk nusak ndia! Boso la'o ela esa boe!

²⁷Do'do heni basa soloda'dun-nala! Tao-ma mate henis! Susa-soe neu Babel! Sila fai huhukun-na losa so!” (

²⁸Basa hataholi mana malai leo Yerusalem fo mana neme Babel-la ala tui ita Amak MANETUALAIN balas hataholi Babel-la tatao-nono'i neu MANETUALAIN Uman-na.)

²⁹ MANETUALAIN nafa'da nae, “Mafa'da basa manakou-la sapu-la Babel. Mafa'da neu basa manakou malelak-kala okofefeo kota ndia ma boso ela esa nala deak boen. Fe falik sila tatao-nono'in ma taon sama leo ndia ha'da palin-na hu ka nde ndia ta fe ha'da-holomata neu Au, Israel Manetualain fo Malalao-malalafuk-ka.

³⁰Neukose nai faik ndia ta'e ana-nala mates lai kota ndia enon-nala, ma basa soloda'dun-nala nanatao nisak, Au MANETUALAIN de manakokolak-ka.

³¹Babel, o mamadema dalem-ma nanseli! Hu ndia de Au, MANETUALAIN Fo Madema ina, Manetualain Fo Manakoasa, la'ban O. Losa faik fo Au huku o.

³²O leoina fo madale-madema ndia neukose nakatunu de ana tu'da, ta hapu esa tulu-fali boen fa. Neukose o mapadedeik Au de'de heni o kotam-mala ma basa manadekak nai ndia nanatao nakalulutuk.”

³³MANETUALAIN Fo Manakoasa nafa'da nae, “Hataholi Israel ma Yehuda-la nananakanenetek. Basa mana okak sila-la lanea laheheles ma ala ta nau po'i emi fa.

³⁴Tehu Au manatulu-fali sila-la mahelek, Au na'deng-nga MANETUALAIN Fo Manakoasa. Au mesang-nga nde ho'u sila dede'an-nala, ma Au fe so'dak leo daebafak-ka. Tehu neukose Au fe musu ma bibik neu hataholi Babel-la.”

³⁵MANETUALAIN nafa'da nae, “Fe susa-soe neu Babel no laun-nala, manaho'u paleta-la ma hataholi malelan-nala!

³⁶Susa-soe neu Babel nabi-la! Sila manamasapepekok ma nggoak. Susa-soe neu Babel soloda'du fo mahelek-kala! Ala bii lanseli!

³⁷Tao makalulutuk ndala ma kaleta musun-nala, tao susa-soe soloda'du nanaba'en-nala! Ala male lanseli! Loso-ma hata-heton-nala!

³⁸Tao mama'dak basa lee-la, ma tina-nala! Hu ka nde Babel henuk no sosongo-tatangok ma bibii ina mai fo nde nanatao namulu hataholi kamahehelek-kala.

³⁹ Hu ndia de neukose Babel da'di mamanak nitu ma samane mangalauk-kala, boema manupui onta-la fo hataholi ta nau leo nai na losa dodoon-na.

⁴⁰ Sama leo Au tao akalulutuk Sodom ma Gamora no nggolok manadekak-kala, boema neukose Au tao akalulutuk Babel leondiak boe. Ta hapu hataholim esa boen fo ana leo nai na. Au, MANETUALAINde manakokolak.

⁴¹Leoina mahelek esa ana nakababale neme nusa dook fo manai kii. Ala mai sama-sama no manek ba'uk-kala fo ala tao musu.

⁴²Ala leni kokouk ma tee; sila mangalaun-nanseli ta lalelak do'o do ampon fa sama leo tasi fo'a, ndala-la lakadi, fo sila nde fes leu tao musu no Babel.

⁴³Lamanene halak ndia, boema manek Babel-la ta napalani fa. Dudu'a-aafi bibik-ka nai dalen dale so, ma namahe'di sama leo inak fo sanga bongik-kala.

⁴⁴Sama leo meo asu to'da neme lasi ina dale fo deka no Lee Yarden, ma ana mai leo mook fo bi'i lopo-la mamana nana'a na'u-nala, neukose Au leondiak, MANETUALAIN mai fo ana tao-na hataholi Babel-la lalai la'o ela sila kota no kaiboianak. Boema neukose Au hele malangan esa fo ana paleta leoina ndia. Hapu se fo nananakasasamak no Au? See napalani tao dede'ak neu Au? Ade hapu malangan esa fo la'ban Au?

⁴⁵Hu ndia de, mamanene hat fo Au sanga tao neu kota Babel, ma hata fo neukose Au tao soaneu laun-nala. Neukose anan-nala boe ala loso lenis ma neukose basa hataholi-la bii-mamata'u.

⁴⁶Metema Babel tu'da, neukose lamanene makalupuk matua ina, fo basa daebafak-ka nanggengo; laun-nala lakadii fo hala-nala losa leoina fe'ek-kala.”