Read Termanu YEREMIA 51 Bible Online

YEREMIA 51 - Termanu bible

YEREMIA 51

¹MANETUALAIN nafa'da nae, “Neukose Au haitua ani mangalauk fo mana fuu nasale leo Babel no laun-nala.

²Neukose Au hele hataholi deak fo neu tao nakalulutuk Babel-la sama leo anin-na fuu neni gandum loon-nala. Nai faik susa-soe ndia neukose ala sapu-la basa mamanak lala'en-na, ma sapu lan balisi.

³Boso fe soloda'dun-nala lasasalek kokoun-nala do ala koao-ndaeao lenik sila bua-lo'a musun-na. Ana ta'e anan-nala boso fes laso'da. Tao makalulutuk basa soloda'dun-nala!

⁴Neukose lakahina matua, fo mates lai enok manai kotan-nala.

⁵Au, MANETUALAIN, Amak Manetualain Fo Manakoasa, Israel Amak Manetualain Malalao-malafu, neukose ta la'o ela Israel ma Yehuda fa leomae sila tao salak neu Au.

⁶Tulu fali ma aopaam-ma! Hu ka nde losa fain-na so fo balas Babel mangalaun-na, ma hukus tunga sila tatao-nono'in-na.

⁷ Makahulun-na Babel sama leo ngala lilo-a fo Au ho'un ma ana tao nan basa daebafak-ka mafuk. Leoina-la linu angol neme ngala ndia fo ala da'di lamulu.

⁸No kaiboianak Babel tu'da de nakalulutuk. Kii makalelu neu ndia ma sanga akidok mo'do fo mamo'do neu bisu-na fafa'kama hapu hai.

⁹ Hataholi manamai fo malaeo nai na-la esa kokolak neu esa, ‘Neukose ita tulu-fali Babel, tehu ta bisa fa! Matetuk Malole lenak ita la'o ela nusak ndia fo fali leo ita nusa-na neu, MANETUALAIN fe huhukuk matuaina neu Babel ma ana tao nakalulutuk la'iesak.’ ”

¹⁰MANETUALAIN anan-nala lafa'da lae, “MANETUALAIN natu'du basa nae ita nai enok ndoos ma matetuk. Mai teu leo Yerusalem fo ita tui nai naa beek fo ita Amak MANETUALAIN taok ndia.”

¹¹MANETUALAIN nakaduduk Manek Media, hu ka nde ndia sanga tao nakalulutuk Babel. Enon-na leondiak fo ana hapu balas falik hataholi fo manatao nakalulutuk Uman-na. Basa malanga soloda'du sila la paleta, “Fofola matane kokou isik-kala! Ho'i-ma babaafanak-kala!

¹²Tao ta'du-tana neu papala-nanadamak Babel. Manea mahele. Pe'da manamanea. Nahani hohouk.!” MANETUALAIN tao basa hata fo Ana sanga tao neu hataholi Babel.

¹³ Nusak ndia henuk no su'i-betes ma lee-la ba'uk, tehu fai so'dan-nala basan so; fai mamate-mamopo mate'en-na losa so.

¹⁴MANETUALAIN Fo Manakoasa ana soo-supa neu ao paan-na nae neukose ana fe hataholi de'u lamak-kala fo leu sapu-la Babel, ma neukose ala eeki sesengik-ka.

¹⁵MANETUALAIN nakadada'dik daebafak-ka tunga hihi-nanaun-na, neme basa daebafak-ka bu'un-nala mai, ma ana betubala lalai-a tunga ndia dudu'a-aafin-na.

¹⁶No paletan-na, oe-la titi-benosi leme basa lalai bu'un-nala mai. Ana fe ko'as-sa mai ma ana tao tataas-sa natabaa nai u'dan dale, ma ana haitua anin-na neme mamana nafuni-na.

¹⁷Mete basa sila boema hataholi lame'da lae sila nggoak ma ta lanuu dudu'a-aafik fa. Basa manatao lilo-henu mapo matan-nala, hu ka nde sila dodoki-dudulan-na pepekok ma hahaen ta.

¹⁸Sila sosongo-tatangok belin ta landaa hakinonolik ma nananakadadaek. Neukose losa fain-na te sila mate-mopo.

¹⁹Yakob Aman Manetualain ta sama leo dodoki-dudulak sila-la; Ndia makadada'dik basa hata-hata nai daebafak. Na'den-na nde been-na MANETUALAIN Fo Manakoasa; Ana hele Israel da'di anan-na.

²⁰MANETUALAIN nafa'da nae, “Babel sama leo ai fefepak, Au sisilong-nga soaneu nate-natatik. O nanapake fo soaneu sapu-la leoinak-kala ma nusan-nala.

²¹O nanapeke fo tao makalulutuk ndala-la ma manasa'en-nala, boema kaleta ma mananeni kaleta-nala.

²²O nanapake fo tao misa touk ma inak, lasik do mulik, ana fe'o anak ma ta'e anak.

²³O nanapake fo tao mamopo-mamate manafoo bana-manu-la, manatao tina-osi ma kapa naue-nala, manakoasa ma malanga soloda'du mademan-nala.”

²⁴MANETUALAIN nafa'da nae, “Emi mesam-mala meten neu leo, besak ia Au bala falik Babel ma basa laun-nala tatao-nono'in mangalauk neu Yerusalem.

²⁵Hei Babel, o sama leo letek fo ana tao nakalulutuk basa daebafak. Tehu Au, MANETUALAIN neukose la'ban o, Au hele loloso ma loli o leo ha'i fo ela ha'i na'a heni o da'di afu.

²⁶Ta hapu batu esa nanapake falik boen neme o batu ndendefa-ma sila. Neukose o da'di moo loak losa dodoon-na. Au, MANETUALAIN de manakokolak-ka.”

²⁷“Hei Manek Kii! Tao ta'du tana sapu-nak. Fuu ma lii trompet fo basa leoinak-kala lamanene! Madenu leoinak-kala fo leu sapu-la Babel! Mafa'da nusa Ararat, Mini ma Askenas sapu-las. So'u ma malangan soloda'du esa fo nalanga nate-natatik-ka. Fe ndala-la de'u lamak-kala lakabubua.

²⁸Mafa'da leoina-la fo leu sapu-la Babel. Maloo manek Media-la no manaho'u paletan-nala ma lasik-kala boema soloda'du mananeme nusak fo sila paleta-kala.

²⁹Daebafak-ka ndele ma nanggengo hu ka nde Au sanga tao Babel da'di mamana tuuk fo hataholi ta leo nai na.

³⁰Babel soloda'dun-nala hahae tao musu so, ma ala leo nai kota musu ma mopo basa sila palanin-na so de ta lapalani so. Lelesu ina manai kota-la nanaboka henik so ma uma-la nanade'de henik.

³¹Hataholi nadenuk-kala lalai latututi ao leu lafa'da manek Babel-la lae kotan-na nanasapu nak neme basa bu'uk lala'en-na.

³²Mamana lelenak-ka musu namatuk nan so, ma mamana mahele matua nanade'de henik. Soloda'du Babel da'di ngenge.

³³Ta dook-ka so'on te ala sengi heni sila, ma ala heheta-aa'is sama leo gandum nai manai popo'den-na. Au, MANETUALAIN fo Manakoasa, Israel Aman Manetualain de manakokolak-ka.”

³⁴Yerusalem nakalulutuk ma manek Babel-la na'a henis; ana fe kota ndia louk sama leo boto louk-ka boe. Sama leo bana matuaina esa ana ko'do Yerusalem ma nadai tein-na nenik basa hata neulauk fo manai kota ndia, boema ana tapa heni lenan-nala.

³⁵Laun Sion, mafa'da nae, “Neukose Babel hapu makata'ak fo ana tao neu ita!” Yerusalem laun-nala mafa'da mae neukose Babel hapu nakata'ak fo nasasa'es neu ita.

³⁶Hu ndia de MANETUALAINnafa'da neu Yerusalem laun-nala nae, “Neukose Au ho'u emi dede'a ma fo Au balas falik musu-la tatao-nono'i fo ala tao neu emi. Oe mata-la ma lee-la neukose Au tao ama'das.

³⁷Neukose nusan ndia da'di bua-lo'a bibiak, ma busa fuik-ka mamana nafunin. Hataholi litan soona ala bii ma esa ta nau leo nai na.

³⁸Hataholi Babel-la langao sama leo meo asu-a.

³⁹Boema sila lahik la'a, neukose Au sadia nana'ak fe sila ma Au tao alas langan-na laleo fo ala sungu ma ta fo'a fa.

⁴⁰Neukose Au inis fo tao nisas sama leo bi'i lopo anak-ka, bi'i hiik ma bi'i lopo mane anak-ka. Au, MANETUALAIN de manakokolak-ka.”

⁴¹MANETUALAIN nafa'da nae, “Babel fo nanakoak nai basa daebafak-ka nanaloso nak boema lamatuk lan so! Nusak ndia da'di bibik leo inak-kala.

⁴²Tasi oe lua leo Babel neu; lii-na fo'a sa'e la nusak ndia.

⁴³Kota-kota-nala da'di mamana bibik nan seli, sama leo moo loak ma'da-ka. Ta hapu hataholi fo tunga ndia ma nau leo nai na fa.

⁴⁴Neukose Au huku Bel lamatua daebafak Babel, neukose Au tao-an fe falik hata fo ana loso nak-kala. Leoinak-kala ta sene-do'ok neu ndia so'on. Papala-nanadamak Babel-la tu'u heni so.

⁴⁵Hu ndia de malai neme ndia leo, hei Au anang Israel! Soi-ma o sala-singong neme Au nasa-melung-nga mai.

⁴⁶Boso bii ma nggenge neu dede'ak pa'dak fo emi mamanenek-kala — tunga teuk halak fe'ek-kala-hapu halak mangalauk nai nusak ndia-ma ndia tatao-nono'in mangalaun-nala ma esa fe salak neu esa.

⁴⁷Mamahele leo, neukose fain-na losa fo Au huku manasongo-tatangok Babel. Neukose basa nusak ndia nananakadadaek ma basa laun-nala nanataonisak.

⁴⁸ Basa hata manai lalai ma daebafak-ka lamahoko-setele hu ka nde Babel tu'da nai leoina kii-la liman dale fo manatao nakalulutuk-kala.

⁴⁹ Mate-mopo basa hataholi manai daebafak-ka hu ka nde Babel, tehu besak ia Babel tu'da neu hataholi Israel fo nanatao nisak-kala. Au, MANETUALAIN de manakokolak-ka.”

⁵⁰MANETUALAIN kokolak neu hataholi Israel fo manai Babel nae, “Emi kalua neme kanisak-ka mai so! Besak ia meu leo! Boso mahani! Leomae emi dook-ka neme uma, mafandele neu Au, emi MANETUALAIN, ma neu Yerusalem.

⁵¹Emi kokolak mae, ‘Ami nananakadadaek ma nakamamaek hu ka nde hataholi manamai-la lamatuk-la mamana neulauk manai MANETUALAIN Uman.’

⁵²Hei mafandele neu Au halang-nga ia. Neukose fain-na losa fo Au huku Babel sosongok-tatangon-nala. Hataholi-la lakadii nai basa nusak ndia hu ka nde lakahina matua.

⁵³Leomae Babel hapu kae leo lalai, ma nafofo'a kota musu fo ta hapu dai fas, neukose Au haitua hataholi fo neu tao nakalulutuk-kana. Au, MANETUALAIN de manakokolak.”

⁵⁴Kokolak nae, “Mamanene! Hataholi-la doi doso ma ala ki nai Babel hu ka nde makalulutuk-ka da'di nai nusak ndia.

⁵⁵Au tao akalulutuk Babel ma Au tao ate'e hala hihika-nakasoek-kala. Musu mai sama leo li nai tasi oe lain, ma soloda'dun-nala sapu-las nenik hala natee-natatik.

⁵⁶Sila mai tao nakalulutuk Babel, ho'u leni soloda'du ma helula'di sisilon-nala. Au, MANETUALAINfo nde manahuku tatao-nono'i mangalauk, ma neukose Au balas Babel tunga ndia tatao-nono'ik.

⁵⁷Neukose Au tao amafuk manaho'u paleta Babel — basa hataholi malelak-kala, mauli-malanga ma soloda'du. Sila ta fo'a soon, sungu losa dodoon-na. Au nde makokolak so; Manek-ka nde Au, Au MANETUALAIN Fo Manakoasa.

⁵⁸Papala-nanadamak mahelek manai Babel-la neukose Au tao akalulutuk-kana fo ala bela leu dae. Basa lelesu ina madema-nala neukose Au de'de henis. Leoina-la sosota-mamangun sosoa-ndandaan ta, hu ka nde neukose ha'i na'a henis. Au, MANETUALAIN Fo Manakoasa de manakokolak.”

⁵⁹Manamanea Manek Zedekia nde been-na Seraya fo Neria anan-na Mahseya upun ndia. Zedekia fo Manek Yehuda ana paleta nai teuk ka haan-na boema Seraya tunga Zedekia leo Babel. Hu ndia de Au fen tatao-nono'ik esa.

⁶⁰Susa-soe fo manada'dik nai Babel ma dede'a manada'di nai nusak ndia Au sulak as nai buku nanalunuk esa dalek.

⁶¹Boema Au kokolak neu Seraya ae, “O losa Babel soona sanga enok fo les basa buku isin-na neu hataholi manai na-la.

⁶²Basa ndia soona hule-haladoi mae leoia, ‘MANETUALAIN, O kokolak basa mae neukose O tau makalulutuk kota ia fo hataholin-nala ma bana manun-nala mopo-mate la'iesak-kana, boema mamanak ia ana da'dik mook solokaek losa dodoon-na.’

⁶³ O les basa susulak-ka isin-na neu hataholi sila-la soona pa'a batu neu susulak ndia fo tapan leo lee Efrata tala'dan-na.

⁶⁴Ma o kokolak mae, ‘Ia nde been-na neukose ana da'di neu Babel. Neukose nusak ia tenak heni ma ana ta fo'a soon hu ka nde ala hapu susa-soe neme MANETUALAIN mai.’ ” Yeremia dede'a kokola-na nate'e losa ia.