Read Termanu YEREMIA 9 Bible Online

YEREMIA 9 - Termanu bible

YEREMIA 9

¹Malole lenak, au langang-nga sama leo oedolu, fo oe henun, ma au matang-nga da'di oelolok, fo ana faa nakandoo! Boema au kii lele'do-le'odaen, kii-makaleleu hataholi fo, ami leoina esa, de musu nok-ka taonisas.

²Ela leo been-na, au hapu mamana susunguk, nai moo solokaek-ka, ba'eneu hataholi fo, nai leleo-lala'on-na dalek! Soona neukose, au la'oela au leoinang, fo au alai leo naa u, fo au dook-ka eme sila mai. Sila basa-basas manatipu-daik-kala, hataholi manalilineka tak, bubuak esa,

³ma laheheleaon tataas esa, fo lasapepeko-lasandandali. Ndoos-sa ta koasan-nai nusak-ka lala'en-na fa, nakalenak puta-paik feo nusak-ka. MANETUALAIN nafa'da nae, “Au anang-ngala, ta hahae tao tatao-nono'i mangalauk fa, Ala ta manaku Au, da'di leo sila Manetualain fa.”

⁴Hataholi-a esa-esak, muse nanea besa-besa soaneu nonon-na, ma tolano bongik-ka boeo, ta hapu nananamahelek fa. Nana, sila boeo, sama leo Yakob, de sila esa-esak ke'di-ndiu seluk tolanon-na. Hataholi-a esa-esak, la'ok su'di leo bee neu, fo kokolak nanggenggeo hataholi na'den, ma kokolak dede'a masapepeko-masandandalik.

⁵Basa-basas, lake'di-landiuao, ta hapu hataholi kokolak ndoos fa; Bafan-nala, biasa lasapepeko-lasandandali so, ala ta tuka tei-sale dale labe'i sala-singon-nala fa. Tatao-nono'ik ha'da hataholi taak-ka, latutungao, ke'di-ndiuk-ka, latutungao, ala taon lakandondoo henin ala ta sipok MANETUALAIN makandondook fa.

⁷Hu ndia de MANETUALAIN Fo Manakoasan-nafa'da nae, “Neukose Au fola Au anang-ngala sama leo liti-a, fo ela ala boso da'di nanasese'do-babalik. Au hapu tao seluk beek soaneu Au anang fo, manatao tatao-nono'i mangalauk-ka so

⁸Dede'a-kokolan-nala, mangalauk nanseli, nanisa, sama leo kokouisi malasok-ka. Hala-kokolan-nala, ka'da masapepeko-masandandalik mesan. Dede'a-kokolan-nala leo mina noo-a, tehu tunga ndoon-na, lakahihi'ik hataholi ndia.

⁹Tao le'e de, Au ta fe huhukuk fo nandaa, neu leoina matak leo ia-ka fa? Neukose Au balas sila tatao-nono'in; Au, fo MANETUALAIN nde manakokolak-ka!”

¹⁰Au, fo Yeremia afa'da ae, “Au sanga kii ma teisusa dale he'dik, nanahu moo mana'uk manai moo solokaek-ka, ma manai letek-kala, lamatuu-tongo so, de hataholi ta tunga ndia fa Ta tamanene bana-manu halan-nala so'on, manupui ma bana-manu fe'e-fe'ek-kala lalai, de mopok-kasa so.”

¹¹MANETUALAIN nafa'da nae, “Neukose Au tao Yerusalem da'di ai-batu madodouk, fo ana da'di, busa fuik-kala mamana keke'ken. Kota-kota Yehuda-la, neukose ala da'di nee-nee lino-linok, mamanak fo, hataholi ta leon so'on.”

¹²Boema au atane ae, “MANETUALAIN, tao le'e de, po'ilotak nusak ia, ana da'di nusa tokotiik ma tuuk, sama leo moo solokaek-ka, nalosa ta hapu hataholi la'ok tunga ndia fa? Ade hapu hataholi malelan-na dai, soaneu nalelak basa ia-la do? Au afa'da mangalele'don neu see, fo ela ana hapu nakalala'ok-kana leo hataholi fe'ek neu?”

¹³MANETUALAIN nataa nae, “Ndia da'di, nanahu Au anang-ngala, ta taoafik neu Au fes nanolik-kala so'on. Ala ta tunga Au, ma ala ta nau tunga Au paletang-ngala fa.

¹⁴Lalanga batu, ma ala sene-do'ok neu sosongo-tatango Baal-la, sama leo hata fo, sila bei-ba'i kain-nala nanolis-sala.

¹⁵Hu ndia de, mamanene hata fo Au, MANETUALAIN Fo Manakoasa, fo Israel Manetualain-na, neukose taon nde: Neukose Au fe anang-ngala la'a bubu'u-palusa makahe'duk, ma linu laso.

¹⁶Neukose, Au tao tapasasalas leo leoina fo ta lelak-kasa, tala'da leu, do sila bei-ba'i kain nala leu. Neukose Au adenu solda'du-la leu latee-latati loos nakandoo, losa Au tao amopo-amate la'iesak-kasa.”

¹⁷MANETUALAIN Fo Manakoasan-nafa'da anan-nala nae, “Taoafik neu hata fo ana da'di nai nusak ia, ma lai-lai, meu maloo basa manamakaleleuk-kala. Madenus ala mai fo lakamee nakamee fafaluk.”

¹⁸Hataholi Yehuda-la lafa'da lae, “Madenus, fo no lai-laik lakamee fe emi basa-basam-mala nakamee fafaluk, fo ela luuoe-a ana faa, fo nakadoe ita nasebu'un-na.”

¹⁹Hala kikii-makaleleuk-ka, nananamanenek nai Sion nae, “Ita mate-mopo, ma nananakamamaek nanseli. Ita muse la'oela ita nusan-na, ita uman-nala, nanatao nakalulutuk so.”

²⁰Boema au afa'da ae, “Hai basa inak-kala lemin! Mamanene MANETUALAIN dede'a-kokolan leona, Manoli emi anafe'om-mala, nakamee kikii-makaleleuk, manoli emi tia-laim-mala, nakamee fafaluk.

²¹Mamates-sa, ana masok tunga jendela, de ana tola nakandoo leo uma manek-ka neu so; ana kaa-na ni'iana-la lai enok lain, boema hataholi muli-soluk-kala, lai mook-ka.

²²Hataholi manamatek-kala, popolan-nala lalefule'ak nai mamanak lala'en-na, sama leo kadafuk-ka nai dae lain; sama leo gandum nanake'di henik, boema nanala'o elak, de ta nanahele nakabubuak so'on. Au tui-benga MANETUALAIN hala hehelun-na, nde ndia.”

²³MANETUALAIN nafa'da nae, “Hataholi manatee-tenok-ka, ta bole namatutua-namadedema aoinan-na fa, hu kande manatee-tenon-na, hataholi mabe'i-balakaik-ka, hu kande be'i-balakain-na, ma hataholi kamasu'i-makabetek-ka, hu kande su'i-beten-na.

²⁴ Se nau namatutua-namadema aon-na la'eneu hata esa, soona muse dalen-na namatua nae ana nalelak ma bubuluk Au; nae ana bubuluk Au manasue-laik losa dodoon-na ma Au tao atetu huhukuk-ka ma ndoos ma matetuk-ka nai daebafak. Basa sila-la tao namahoko Au daleng-nga. Au, MANETUALAIN, fo manakokolak-ka.”

²⁵MANETUALAIN nafa'da nae, “Neukose losa fain-na Au huku hataholi Masir, Yehuda, Edom, Amon, Moab, ma laun lete lepak fo mananggute keke'u langa doon-na. Sila basa-basas nanasunat sama leo hataholi Israel, tehu leomae sila do leoina Israel-la ha'da tataon-na sama leo hataholi fo nanasunat taak-ka, hu ka nde sila ta tunga hehelu-balatak fo nakasasamak no sunat ndia.”