Read Termanu RATAPAN 1 Bible Online

RATAPAN 1 - Termanu bible

RATAPAN 1

¹Besak ia, Yerusalem nee-nee lino-linok nanseli, kota fo makahulun-na henuk no makaseek nanseli. Makahulun-na nai leoina-la uluk, tehu besak ia, ana da'di sama leo inafalu so. Makahulun-na kota fo nanakoa-nanakiok nanseli, besak ia, ana da'di ata so.

²Le'odae katemak esa dalen-na, ana kii no dale he'dik, luuoen-na titi nai nasebu'un-na. Ta hapu hataholi esa boen, neme basa tou-ta'e susuen-na nau kokoe-nanasik fan. Tia-lain-nala lalelesin de lasafali da'di musu nok.

³Laun Yehuda-la la'oela nusan-na, nanahu nanataok da'di ata de ana doi-doso nanseli. Besak ia, ala leo nai leoina-la tala'da ta lanuu mamanak fo fes mole-dame ma so'da-molek fa. Nai lelek ala doi-doso-a, musu nakahapi-nalas.

⁴Nai fai malole-la ta hapu hataholi esa boen mai leo Manetualain Uman mai fa. Anafe'oanak makameek manai naa-la doi-doso, ma imam-mala hoo-nggu'u. Ta hapu hataholi esa boen, nai lelesuina-la lelesun-na fa. Kota Sion na, henuk no dale he'dik.

⁵Musun-nala lalole-lanapu, nanahu ala hapu koasa-lan. MANETUALAIN tao-nan doi-doso, nanahu sala-singon makadotok nanseli. Foo leni laun-na so, de loos leo mamana tu'u-tapak neu.

⁶Kota Yerusalem-ma lole-napun, ka'da tutui makahuluk mesan. Mauli-malangan-nala bendole-bendaku sama leo nusa kamala'ak-ka. Sila balakain ta soaneu la'ban musu manausik-ka.

⁷Yerusalem tu'da ma doi-doso basa boema, nafandele neu tepo-lelek maneu ka, fo nai lelek hata-heton bei makadotok; tao leo beek de laun-na tu'da leo musu liman dale neu, de ta hapu hataholi esa boen, mai tulu-fali fan. Musu noon-nala ka'da hika mete tutu'dan-na.

⁸Yerusalem tao nanggenggeo aoinan-na mesak-kana nenik tao sala-singo manggenggeok makadotok. Basa hataholi fo makahulun-na fen ha'da-holomata, besak ia, lakadadaek-kana nanahu lita makaholan-na. Ana hoo-nggu'u, nanahu ana mae so.

⁹Manggenggeon-na, nananitak no mangale'dok, tehu ta nafaduli, neukose hata da'di la'eneu aoinan-na fa. Tutu'dan-na ba'un-naseli, tehu ta hapu hataholi esa boen, kokoe-nanasi fan. Boema ana dokodoe susue-lalaik neme MANETUALAIN mai, nanahu musun-nala sengi so.

¹⁰Musun-nala loso leni la'iesak hata-heton-nala so. Nakalenak bai, ana muse mete ala masok Manetualain Uman-na, tatao-nono'ik esa, MANETUALAIN kena-ka'in ba'eneu hataholi fo ta Ndia anan fa.

¹¹Laun-nala sanga so'dan-na no hoo-nggu'uk; ala tuka bua-lo'a kabelin-nala nenik loti, ka'da soaneu laso'da lahele fo boso mates. Yerusalem naloo bou-bou nae, “Ou MANETUALAIN, mete au leona, taoafik neu au doi-dosong lala'en-na.”

¹²“Hai hataholi manala'ok tunga enok-ka lemin, mete leon ma taoafik! Ade fefepa-lili'uk baba'un-na sama no besak ia au doidosok-ka, fefepa-lili'uk fo MANETUALAIN tunin neu au, nanahu nasa-melun manapila lo'a-lo'an ndia do?

¹³Nakona ha'i-a neme lalai mai fo na'a losa au daleng dale. Ana lona hihi'ik nai au matang-nga, fo au tu'u u. Boema Ana po'ilotak au mesang-nga doi-doso fai katemak esa dalen-na.

¹⁴Ana ho'i-na basa au sala-singong, boema Ana pa'an da'di esa, de Ana bokoliin neu au botolii nga, nalosa belan-na tao-na au ndole-ndaku. MANETUALAIN fe au leo musu nook-ka neu; au be'i-balakaing ta soaneu la'ban-nasa fa.

¹⁵MANETUALAIN nakadadaek basa au palani ta'ti batu ao kaheleng-ngala. Ana hoka solda'du-la, fo ela ala tao lamopo-lamate basa au hataholi muli-solung-ngala. Ana heheta-aa'i au leoinang-nga losa beelutu, sama leo hataholi-a he'e angol-la boan-na.

¹⁶Hu ndia de, au luuoeng-nga titi henin, ta hapu hataholi fe au manggatek ma kokoe-nanasik fa. Au leoinang-nga lamopo hata lala'en-na so, nanahu musu-a koasan-na lena.

¹⁷Au so'uk au limang-nga fo au oke tutulu-fafalik, tehu ta hapu manafe kokoe-nanasik fa. MANETUALAIN haitua musu, neme bu'u-bu'uk lala'en-na mai; ala mai latee-lata'ti loo au. Ala tao au, sama leo kadafuk-ka, ma buas fo nanamaluak nai sila tala'da heon.

¹⁸Tehu MANETUALAIN nde la'en, nana au la'olena paletan-na so. Hai leoina-la lemin, mamanene au leona, mitak au nai doidosok dale. Basa au ta'eanang-anafe'oanang-ngala nanafook, de loos leo mamana tu'u-tapak neu.

¹⁹Au aloo au tia-laing-ngala tehu lalelesi au. Mate basa imam-mala ma mauli-malangan leoina-la nai kota enon-nala lain. Nai lelek ala sanga nana'a-neninuk fo laso'da lahele.

²⁰Ou, MANETUALAIN! Taoafik neu au, nana au daleng-nga ta tesa-tama ma tasibu, nakalulutuk nanahu au nalelesi makahulung-nga. Nai enok-kala lain, hapu kanisak, Nai uma dale, hapu mamates.

²¹Ou, MANETUALAIN! Mamanene au hoo-nggu'ung leona, ta hapu hataholi kokoe-nanasi au fa. Au musung-ngala lamahoko, nanahu O taom-ma au soe. Faik fo O heluk ndia, mai leona; tao malas doi-doso sama leo au.

²²Taoafik neu basa sila tatao-nono'i mangalaun sila, ma taos sama leo O tao au, nanahu basa sala-singok fo au taon soaneu O. Au ahoo nai doidosok dale, au daleng-nga he'dis-sa ma male-tale.”