Read Termanu YESKIAL 11 Bible Online

YESKIAL 11 - Termanu bible

YESKIAL 11

¹Boema, Manetualain Duladalen-na, so'u-na au de noo au leo MANETUALAIN Uman-na lelesuinan Dulu neu. Au ita hataholi duahulu lima lai ndia, de nai hataholi ka duahulu limak sila-la dalek, hapu mauli-malangan leoina dua lai dalek, fo nde Yaazanya, fo Azur anan-na, ma Pelaca, fo Benaya anan-na.

²Manetualain nafa'da au nae, “Hai hataholi daebafak fo, manasapu-lalok-konei, hataholi ia-la nde, tutu'u tatao-nono'i mangalauk-ka nai kota ia, ma ala sele-nggali nanoli-nafa'dak fo, neni fe hataholi-a natofa-natalak.

³Hu ndia de, hai hataholi daebafak fo, manasapu-manalalok-konei, manduku-malosak Au hala hehelung-nga la'eneu sila huhukun-na. Nana lafa'da lae, ‘Ta dook-ka so'on te, neukose ita tafofo'a falik uma ia-la. Kota ia da'di ulek, ma ita da'di paa nai ulek dale. Neukose ita ta hapu ha'i-a haan-na fa, nanahu ulek ia nasulu-nahapa ita.’ ”

⁵Basa boema MANETUALAIN Duladalen-na poti-na au, de MANETUALAIN nadenu au, fo au afa'da hataholi Israel-la ae, “Hai leoina Israel-la, Au bubuluk hata fo emi mafa'dan, ma hata fo emi tutu'un nai emi dalem dale.

⁶Emi taomisa hataholi de'u-de'u basa ndia so, nalosa eno-enok manai kota dale-la, henuk no hataholi manamatek-kala popolan-na.

⁷Hu ndia de, Au, Fo MANETUALAIN Mademaina, Au afa'da o ae, Memak kota ia da'di ulek, tehu paa manai ulek dale-a, ta nde emi fa, te nde hataholi fo, emi taomisak-kala! Tehu ba'eneu emi soona, neukose Au usiheni emi, fo emi kalua meme kota ia dalek mai!

⁸Ade, emi bii-mamata'u neu tafaina do ta? Neukose, Au adenu hataholi neni tafaina, fo ana sapu-na emi.

⁹Neukose, Au o emi kalua meme kota ia dalek mai, fo Au fe emi leo hataholi nusa dea-la neu. Au ta aketu huhuku mamates neu emi fa.

¹⁰Neukose, emi mate nai natee-natatik dale, nai emi nusam dale, soona besak-ka emi bubuluk, mae Au nde MANETUALAIN-na.

¹¹Da'di, neukose emi ta leo no nee-nee lino-linok nai nusak ia dalek, de ta sama leo paa nai ulek esa dalek fa. Neukose Au usi emi, fo Au huku emi nai nusak Israel-la.

¹²Soona besak-ka emi bubuluk, mae Au nde MANETUALAIN-na, ma Au huku emi, nanahu emi la'olena Au nakaneneteng-ngala, ma emi ta taoafik neu Au paletang-ngala fa, nenik emi tunga leoina manai emi titia-tataim-mala, hoholo-lalanen.”

¹³Au bei kokolak dede'ak sila-la te, no kaiboik, Pelaca tu'u neu, de maten. Boema au senek, de au aloo bou-bou ae, “Awi, MANETUALAIN Fo Mademaina! Ade, O sanga taomisa la'iesak hataholi Israel fo, bei elak ia-la lala'en-na do?”

¹⁴Boema MANETUALAIN nafa'da seluk au nae,

¹⁵“Hai hataholi daebafak fo, manasapu-manalalok-konei, laun Yerusalem-ma, ala kokolak o moo o nonoom fo, manai mamana tu'u-tapak. Lafa'da lae, ‘Hataholi nanatu'u-tapak sila-la, dook-ka leme uma mamasok manai Yerusalem-ma mai. MANETUALAIN fe dae Israel-la, leo ita mai so.’

¹⁶Hu ndia de, manduku-malosak Au hala hehelung-nga nde ia, neu o nanoom fo manai mamana tu'u-tapak, mae Au nde o sila leo leoina manai dook eli-la. Tehu nai lelek fo sila bei leo lai naa, neukose Au sama-sama o sila.

¹⁷Au, Fo MANETUALAIN Mademaina afa'da, ae neukose Au tao akabubuas leme nusa-nusak fo nai bee, sila tapasasala, boema Au fe falik dae Israel-la leo sila neu.

¹⁸Metema ala fali soona, neukose ala tu'u-tapaheni basa sosongo-tatangok fo, ta kandaak ma nanamaluak manai nusak ndia dalek-ka.

¹⁹ Neukose Au fes dale beuk ma ha'da palii beuk. Neukose Au ho'i-heni, sila dalen fo natea sama leo batu-a, fo Au nggatin nenik dalek fo, manatunga neu Au.

²⁰Boema, neukose ala tunga Au nakaneneteng-ngala, ma ala tunga basa Au paletang lala'en-na, no dale katematuan-nala. Neukose ala da'di Au anang, ma Au da'di sila Manetualain.

²¹Tehu hataholi fo, ana nau sene-do'ok neu sosongo-tatangok fo, ta kandaak ma nanamaluak-ka, neukose Au hukus, nanahu sila ha'da-tatao mangalaun ndia.” MANETUALAIN Fo Mademaina, Ana kokolak nae leondia.

²² Mahahaek sila-la, ala mulai laa, de ban sila-la, ala tunga boe. Mandela-masa'ak fo, manada'di ta'du-tana esa neu Israel Manetualain, mamain-na, nai mahahaek sila-la lain.

²³Basa boema, mandela-masa'ak ndia, ana la'oela Yerusalem, de ana lali leo letek manai kota ndia boboan dulu.

²⁴Nai ninitak ndia dalek, au ita Manetualain Duladalen-na, ana so'u-na au, de no falik au leo hataholi nanatu'u-tapak manai Babel-la neu. Basa boema, ninitak ndia, mopok-kana.

²⁵Boema, au tui hataholi nanatu'u-tapak-kala, basa hata lala'en fo, MANETUALAIN natu'dun neu au.