Read Termanu YESKIAL 12 Bible Online

YESKIAL 12 - Termanu bible

YESKIAL 12

¹MANETUALAIN kokolak seluk no au nae,

² “Hai hataholi daebafak fo, manasapu-manalalok-konei, o leo nai hataholi malenalanga-masa'ba sook-kala tala'da heon. Sila mamatak, tehu ta lita fa; madi'idook, tehu ta lamanene fa, nana ala nau lalenalanga-lasa'basoo.

³Hu ndia de, hai hataholi daebafak fo, manasapu-manalalok-konei, poti-ma o bua-lo'am neu popotik esa dalek, bei dai le'do-a beita tenak ia fa, sama leo hataholi nanatu'u-tapak-kala biasa taon. La'oela o umam-ma no le'do-le'dok, nai fai lele'don-na, sama leo hataholi fo loon leo mamana tu'u-tapak neu. Nai hataholi malenalanga-masa'basook sila-la matan, tao bolok neu o umam-ma papalan-na, soona ho'i-ma o popotim-ma, fo kalua tunga bolok ndia. Masaa-ma, popotik ndia, fo makahatu kiu-kiu soona, la'o leona; potiketu o mata-panam, fo ela o boso mete mita enok fo o tunga ndia. Nemen-na fo, basa leoina Israel-la lala'en-na, lita basa hata fo o taon ndia, fo ela ana da'di nasanene'dak ba'eneu sila. Fafa'kama ala bubuluk, lae sila nde malenalanga-masabasook-ka.”

⁷Boema au tao tunga MANETUALAIN paletan neu au-a. Nai faik ndia boe, fo beita le'odae fa, boema au poti au bua-lo'ang neu popotik esa dalek, sama leo hataholi nanatu'u-tapak-kala biasa taon. Lelek le'odae boema, au tao bolok esa neu au umang-nga papala nanadaman-na, boema au kalua tunga bolok ndia. Au tao popotik ndia neu au alung lain, basa boema au la'o, de basa hataholi sila-la, ala mete au.

⁸Balahaa boema, MANETUALAIN kokolak no au nae,

⁹“Hai hataholi daebafak fo, manasapu-manalalok-konei, leoina Israel, fo leoina malenalanga-masa'basook ndia, natane o tao beek ndia.

¹⁰Hu ndia de, mafa'das hata fo Au, MANETUALAIN Fo Mademaina nafa'da neus. Au hala hehelung ndia, au fen neu manek manai Yerusalem-ma, ma neu basa laun manai kota ndia lala'en-na.

¹¹Mafa'da mangalele'dos, mae hata fo o taon ndia nde been-na, dulak beek fo, neukose ana la'e sila, fo nde: neukose sila da'di hataholi nanatu'u-tapak, ma hataholi nanafook.

¹²Neukose sila manen-na, ana lu'a-na popotin-na, fo ana la'o nai fai le'odaek. Neukose hataholi-la, ala tao bolok neu sila uman-na papala nanadaman-na, fo daenga ala tunga bolok ndia leo deak leu. Neukose, ana potiketu matan-nala, nalosa ala ta hapu lita ala la'ok tunga enok-ka fa.

¹³ Tehu neukose, Au pilu Au dalang-nga neu, fo Au ho'u-alan. Boema, neukose Au on leo kota Babel-la neu, fo nai naa, neukose ana beita nita kota ndia fa te, maten so.

¹⁴Basa hataholi fo, manaleo nai uma manek-ka, ma basa manek ndia hataholi manamanoli-mafa'dan-nala, ma basa hataholi manamanean-nala, neukose Au tao tapasasalas leo basa daebafak-ka bu'u-bu'un lala'en-na leu. Neukose, Au usis, fo Au taoisas.

¹⁵Nai lelek, Au tao tapasasalas leo leoina manai nusak dea-la tala'da heon soona, besak-ka ala bubuluk, lae Au nde MANETUALAIN-na.

¹⁶Neukose Au soi-tefa ala, sila lumanak leme natee-natatik dale, leme la'a-ndoes-sa, ma leme he'di-laus-sa mai, fo ela nai leoina nusa dea sila-la tala'daheon, neukose ala bubuluk, lae sila tatao-nono'in ta kandaak makandondook fa. Soona neukose, ala manaku, lae Au nde MANETUALAIN-na.”

¹⁷MANETUALAIN nafa'da au ae,

¹⁸“Hai hataholi daebafak fo, manasapu-manalalok-konei, o dele too-too, nai lelek o mu'a, ma o dele ngge'be-ngge'be no bibii-namata'uk-ka, nai lelek o minu.

¹⁹Mafa'da basa leoina lala'en-na, hata fo Au, Fo MANETUALAIN Mandemaina nafa'dan neu laun Yerusalem fo bei manaleo nai sila nusan-na. Neukose ala dele too-too nai lelek sila la'a, ma ala dele ngge'be-ngge'be no bibii-namata'uk-ka, nai lelek sila linu. Sila daen-na, neukose ana da'di dae tokotiik, nana basa hataholi manaleo nai ndia, ala la'olena Au hoholo-lalaneng nakandondoo henin.

²⁰Kota-kota fo, besak ia henuk no laun-na, neukose nanatao nakalulutuk, ma tina-osin-nala, neukose ala da'di moo solokaek. Soona besak-ka ala bubuluk, lae Au nde MANETUALAIN-na.”

²¹MANETUALAIN nafa'da au nae,

²²“Hai hataholi daebafak fo, manasapu-manalalok-konei, tao le'e de, hataholi Israel-la, ala nau seseik lahele dede'a lasik ia: ‘Le'do fai sapu-lalo, tehu dede'a nafa'da elak-kala, esa ta da'di boen’?

²³Nah, mafa'das mae Au, MANETUALAIN Fo Mademaina, fe natataan-na nde ia: Neukose Au loseheni dede'a lasik ndia, nalosa ala ta kokolak-kana nai Israel so'on. Mafa'das mae, dede'a lasik ndia nggatin-na nae fain-na losa so, de dede'a nafa'da elak lala'en-na, neukose ala da'di.

²⁴Ta hapu seluk ninitak, do dede'a nafa'da elak, pepekok nai Israel so'on,

²⁵Au, MANETUALAIN Fo Mademaina, kokolak neu leoina Israel-la, ma basa hata fo Au afa'dan, tao leo bee-o neukose ana da'di no lai-laik. Mamanene leon, hai leoina malenalanga-masa'basook-kala lemin! Nai tepo-lelek o maso'da, neukose Au akalala'ok basa hata lala'en fo, Au afa'dan neu o. Au, MANETUALAIN Fo Mademaina, nde manakokolak-ka.”

²⁶MANETUALAIN nafa'da au nae,

²⁷“Hai hataholi daebafak fo, manasapu-manalalok-konei, hataholi Israel-la lafa'da lae o ninitam, ma o dede'a nafa'da elam sila-la, neukose dook-ka nanseli, besak-ka ala da'di.

²⁸Hu ndia de mafa'das, mae Au, MANETUALAIN Fo Mandemaina, nafa'da nae: Au afa'da basa hata lala'en-na, neukose ana da'di no lai-laik. Au, MANETUALAIN Fo Mademaina, nde manakokolak-ka!”