Read Termanu YESKIAL 14 Bible Online

YESKIAL 14 - Termanu bible

YESKIAL 14

¹Leoina Israel-la, mauli-malangan de'ubee, ala mai leo au mai, fo latane MANETUALAIN hihii-nanaun.

²Boema, MANETUALAIN nafa'da au nae,

³“Hai hataholi daebafak fo, manasapu-manalalok-konei, hataholi ia-la, lase'o basa so'dan-nala neu sosongo-tatangok so, nalosa ala tu'da leo sala-singok dale leu. Masa bole ala nau latane Au dale hihiing-nga?

⁴Hu ndia de, mafa'da mae Au, MANETUALAIN Fo Mademaina, helu nai leo ia, ‘Ba'eneu hataholi Israel fo, ana nase'o basa so'dan-na neu sosongo-tatangok-ka so, ma ana po'ilotak aoinan-na tu'da leo sala-singok-ka dale neu, boema ana mai noke nanoli-nafa'dak neme nabi esa mai soona, neukose Au nde ataan nenik natataak fo nandaa, ba'eneu sosongo-tatangok makadotok sila-la!

⁵Basa sosongo-tatangok sila-la, ala tao-la Au anang-ngala, dook-ka leme Au mai, tehu sa'di leo been-na, no Au natataang ndia de, Au anang-ngala fali ma'is leo Au mai.’

⁶Boeo, mafa'da hataholi Israel-la mae Au, MANETUALAIN Fo Mademaina, nafa'da nae, ‘Tukatei-saledale, neme o sala-singom-mala mai, ma tu'u-tapa heni, o sosongo-tatangom fo, nanamaluak ndia.’

⁷Ba'eneu hataholi Israel do hataholi nusa dea fo, manaleo manai leoina Israel-la tala'da, fo dook-ka leme Au mai, ma lase'o aoinan-nala neu sosongo-tatangok, boema loke nanoli-nafa'dak neme nabi esa mai soona, nemen-na fo Au nde fe natataan-na.

⁸Neukose Au la'ban-nana, fo Au taon da'di natutu'duk esa, ba'eneu fe'ek-kala. Neukose, Au kalua henin neme Au anang-ngala dalek mai, soona besak-ka, Au anang-ngala bubuluk lae Au nde, MANETUALAIN-na.

⁹Metema, nabi esa nanake'di-ndiu basak, nalosa ana fe natataa masalak soona, Au nde ke'di-ndiu nana. Au, MANETUALAIN Fo Mademaina, neukose kalua henin neme hataholi Israel-la dalek mai.

¹⁰Nau nabi ndia, do sila fo, loke nanoli-nafa'dan boe, neukose ala hapu huhukuk matak esa.

¹¹Au tao basa sila-la, fo ela hataholi Israel-la, boso boe dook-ka leme Au mai, ma boso boe tao langgenggeo aoinan-nala, nenik sala-singok-ka. No enok ndia, neukose ala da'di Au anang, ma Au da'di sila Manetualain.” Au, MANETUALAIN Fo Mademaina, nde manakokolak-ka.

¹²MANETUALAIN nafa'da au nae, “Hai hataholi daebafak fo, manasapu-manalalok-konei,

¹³metema nusak esa nasala-nasingo, ma ta lilineka neu Au fa soona, neukose Au huku nusak ndia. Neukose, Au tao akalulutuk mamana pepe'da nana'an-nala, ma Au fe soe la'a-ndoes-sa mai, ma Au taoisa, nau hataholi do bana-manu boe.

¹⁴Leomae Noh, Danel ma Ayub, ala leo leme mamanak ndia, tehu sila telu tatao-nono'i malolen-na, hapu soi-tefa-na ka'da sila telu samanen-na mesak-kana. Au, MANETUALAIN Fo Mademaina, nde manakokolak-ka.

¹⁵Bole da'di, Au fe bana makaa-makisuk-kala mai, fo ala kaa-la nusak ndia laun-nala, nalosa nusak ndia, ana da'di mamana mangalauk nanseli, fo ta hapu hataholi esa boen, napalani la'ok tunga ndia fa.

¹⁶Leomae Noh, Danial ma Ayub, ala leo leme ndia, tehu no Au, MANETUALAIN fo maso'dak-ka, na'den-na, neukose ala ta hapu soi-tefa-la, su'di see boen, lena-lenak sila anan-nala boeo, ta. Ka'da sila mesak-kasa, nde laso'da, tehu nusak ndia, neukose ana da'di moo solokaek.

¹⁷Bole da'di, Au fe natee-natatik-ka leo nusak ndia neu, ma Au haitua fes tafa-sisilo, soaneu tao lamate-lamopo, nau hataholi do bana-manu boe.

¹⁸Ma leomae, na'kasa hataholi ka teluk-kala, ala leo leme ndia, tehu no Au, MANETUALAIN fo maso'dak-ka, na'den-na, neukose ala ta hapu soi-tefa-la, su'di see boen, lena-lenak sila anan-nala boeo, ta. Ka'da sila mesak-kasa, nde laso'da.

¹⁹Bole da'di, Au fe he'di-laus leo nusak ndia neu, ma Au nasa-melung lua ponu-ponu soaneus, nalosa nau hataholi do bana-manu boe, neukose mate-mopos.

²⁰Ma leomae Noh, Danial ma Ayub, ala leo leme ndia, tehu no Au, MANETUALAIN fo maso'dak-ka, na'den-na, neukose ala ta hapu soi-tefa-la, su'di see boen, nakalenak sila anan-nala boeo, ta. Ka'da sila mesak-kasa, nde laso'da, nanahu sila tatao-nono'i malolen-na.”

²¹ MANETUALAIN Fo Mademaina nafa'da nae, “Neukose, Au huku Yerusalem nenik Au huhukung haa, belan-na seli, fo Au tao amate-amopo, nau hataholi do bana-manu boe. Huhuku ka haak sila-la nde: natee-natatik-ka, la'a-ndoes-sa, bana makaa-makisuk-ka, ma he'di-laus-sa.

²²Leounik-ka, hapu nggelok laladeak, fo ala soi-tefa-la anan-nala, fo metema ala mai leo o mai soona, taoafik neus. Mete tatao-nono'i mangalaun-nala leo beek, soona neukose emi mamahele, mae Au nakeketung-nga nandaa, soaneu huku Yerusalem.

²³Boema, neukose emi boeo, bubuluk mae Au tatao-nono'ing sila-la, nanuu ne'ek. Au, MANETUALAIN Fo Mademaina, nde manakokolak-ka.”