Read Termanu YESKIAL 15 Bible Online

YESKIAL 15 - Termanu bible

YESKIAL 15

¹MANETUALAIN nafa'da au nae,

²“Hai hataholi daebafak fo, manasapu-manalalok-konei, ade ai angol-la, lenan-na nde bee, de nalosa ain-na, lenaheni ai fe'ek manai nula dale-la? Ade, ai angol-la, malolen-na nde bee, de nalosa ain-na, lenaheni basa ai manai nula dale-la?

³Ade, hapu pake ain-na, fo tao buas esa do? Ade, hapu taon da'di ai lolo'ek, fo lolo'e bua-lo'as neu do?

⁴Sosoa-ndandaan ta, te ka'da taon da'di ai ha'i. Ma metema, ha'i-a na'aheni pe'dan duas, fo tala'dan-na, ana da'di ha'ikaak soona, ade bei hapu paken do ta?

⁵Ta hapu paken fan! Nakalenak, beita pake fan te, sosoa-ndandaan ta so. Mu'da hata no, taon leo ha'i lain neu, fo ha'i-a na'ahenin bai!”

⁶Hu ndia de, MANETUALAIN Fo Mademaina, nafa'da nae, “Sama leo ho'i angol-la ain-na neme nula dale mai, fo hotuhenin, neukose Au tao laun Yerusalem-mala, leondiak boe!

⁷Neukose, Au hukus. Leomae lala ha'i-a deak, tehu neukose, ha'i-a tao namate-namopos boe. Soona besak-ka emi bubuluk, mae Au nde, MANETUALAIN-na.

⁸Ala ta lilineka neu Au fa, hu ndia de, Au tao dae ndia da'di moo solokaek. Au MANETUALAINFo Mademaina, nde manakokolak-ka.”