Read Termanu YESKIAL 18 Bible Online

YESKIAL 18 - Termanu bible

YESKIAL 18

¹MANETUALAIN nafa'da au nae,

² “Tao le'e de, ala kokolak dede'a bini-a nakandoo, nai nusa Israel-la? ‘Ina-amak, la'a angol makeis, tehu anak-kala, nisin-nala nde makeis-sa.’

³No Au, Manetualain fo maso'dak-ka na'den-na, MANETUALAIN Fo Mademaina, dede'a bini ndia, neukose ta nanakokolak nai Israel so'on.

⁴Hataholi lala'en-na, samanen-na nde been-na, Au nuung, nau ina-amak samanen-na, do anan-nala samanen-na boe. Hataholi masala-masingok-ka, neukose nde ndia mate-a.

⁵Metema hataholi esa nde been-na, hataholi ndoos, ana tao tunga matetun-na, ma dalen-na ndoos.

⁶Ana ta sene-do'ok neu hataholi Israel-la, sosongo-tatangon fa, do na'a tutunu-hohotuk, fo nanatunu-hotuk nai mamana sene-do'ok neu lamatua daebafak-kala. Ana beita fufu'di-oodok nita, hataholi fe'ek saoinan fa, do ana sungu no inak fo, ana hapu he'di bulak.

⁷Ana beita tipu-dai nita, do namanako fa. Ana fe falik hataholi mahutak-kala, bua pepe'dan soaneu hutan-nala. Ana fe hataholi kamala'ak-kala la'a, ma ana fe hataholi ba'du tak-kala, bua papakek.

⁸Ana ta fe hataholi manatonak-kala, fe bunak fa. Ana ta nau tao, tatao-nono'i mangalauk fa, ma naketu tunga ndoon-na, nai basa nale'a-napilik lala'en-na dalek.

⁹ Ana tunga Au paletang-ngala, ma ana tao tunga Au hoholo-lalaneng-ngala. Hataholi leondiak-ka, nde hataholi fo manatao tunga ndoon-na, de neukose naso'da nahele. Au, MANETUALAIN Fo Mademaina, nde manakokolak-ka.

¹⁰Tehu metema, hataholi ndia anan-na, ana hii ka'da namanako, nanisa, ma ana tao tatao-nono'i mangalauk fe'ek makadotok

¹¹fo aman beita tao nita tatao-nono'ik sila-la fa. Na'a tutunu-hohotuk fo, nanatunu-hotuk nai mamana sene-do'ok neu lamatua daebafak-kala. Ana fufu'di-oodok ma ana sungu no hataholi fe'ek saoinan.

¹²Ana hii ke'di-ndiu, hataholi nuu taa-hata taak-ka, namanako, ana besila-na, hataholi mahutak-kala bua pepe'dan soaneu hutan-nala. Neu leo hataholi dinitiu-la uma sosongon-na, ma ana sene-do'ok neu sosongo-tatangok fo nanamaluak-kala.

¹³Ana fe hataholi manatonak-kala, fe bunak. Ade, hataholi leondiak-ka, neukose naso'da do ta? Ta naso'da fa! Ana tao basa tatao-nono'ik fo, nanamaluak sila-la so, de neukose maten! Tatao-nono'in nenenin-na nde, mamates ndia.

¹⁴Tehu metema, hataholi manatao tatao-nono'i mangalauk makadotok ndia maanak, de ni'iana ndia, nita aman tatao-nono'in lala'en-na, tehu ana ta tao tunga fan.

¹⁵Ni'iana ndia, ana ta nau sene-do'ok neu hataholi Israel-la sosongo-tatangon fa, do na'a tutunu-hohotuk fo, nanatunu-hotuk nai mamana sene-do'ok neu lamatua daebafak-kala. Ana beita fufu'di-oodok nita hataholi fe'ek saoinan fa,

¹⁶do ana tuni-ndeni, do namanako su'di beek-ka. Ana fe falik hataholi mahutak-kala bua pepe'dan soaneu hutan-nala. Ana fe hataholi kamala'ak-kala, la'a, ma ana fe hataholi ba'du tak-kala, bua papakek.

¹⁷Ana beita tao nita, tatao-nono'i mangalauk, do ana fe hataholi manatonak-kala, fe bunak. Ana tunga Au hoholo-lalaneng, ma ana tao tunga Au paletang-ngala. Neukose, ta mate ni'iana ndia, hu kande aman sala-singon-nala fa, tehu naso'da nahele.

¹⁸Nasafalin-na, aman fo ana hii ka'da tipu-dai, namanako, ma ana tao tatao-nono'i mangalauk fe'ek-kala, neukose maten, hu kande sala-singon-nala.

¹⁹Tehu, fafa'kama hapu hataholi natane nae, tao le'e de, ni'iana ndia ta lu'a-lepa fali aman, sala-singon-nala fa. Natataa-na nae, hu kande, ni'iana ndia malole, ma ana tao tunga ndoon-na. Ana tunga Au hoholo-lalaneng, ma ana taon no dale katematuan-na, de naso'da nahele.

²⁰ Neukose matek-ka nde, hataholi fo manatao sala-singok-ka. Anak-ka, ta nde muse lu'a-lepa, aman sala-singon, ma amak-ka, ta nde muse lu'a-lepa anan-na, sala-singon fa. Hataholi malole-a, neukose ana sipo baba'e-papala malole, nanahu tatao-nono'i malolen-na. Ma hataholi manatao mangalauk-ka, neukose ana doidoso, hu kande tatao-nono'i mangalaun-nala.

²¹Metema, hataholi mangalauk esa, ana ta tao sala-singok so'on, fo ana mulai tunga Au hoholo-lalaneng, boema ana tao tatao-nono'i malole ma tatao-nono'i ndoos soona, neukose ta mate fan.

²²Neukose, basa sala-singon lala'en-na, hapu do'o do ampon; neukose naso'da, nanahu ana tao ndoos.

²³Ade, o dodoo mae, Au MANETUALAIN Fo Mademaina, namahoko, metema mate hataholi mangalauk-ka do? Ta makandondook! Au hii, ana tukatei-saledale neme sala-singon-nala mai, fo ela naso'da nahele.

²⁴Tehu metema, hataholi malole esa, ana ta tao tatao-nono'i malole so'on, boema ana mulai tao tatao-nono'i mangalauk, ma tatao-nono'i nanamaluak lala'en fo, hataholi mana tao tatao-nono'i mangalauk-kala biasa tao-no'in; ade, hataholi ndia, neukose naso'da nahele do? Ta! Neukose, lafandele heni basa tatao-nono'i malolen sila. Neukose maten, hu kande sala-singon, ma ana ta lilineka neu Au fa.

²⁵Fafa'kama, nggelok lafa'da lae leo ia, ‘MANETUALAIN tatao-nono'in ndia, salan.’ Mamanene leon, hai hataholi Israel-la lemin! Ade, Au tatao-nono'ing ndia, salan do? Emi nde sala dei.

²⁶Metema hataholi malole-a, ana ta tao malole so'on, fo ana mulai tao tatao-nono'i mangalauk soona, neukose maten, nanahu tatao-nono'i mangalauk fo, ana tao-no'ik-kala.

²⁷Tehu metema, hataholi manatao tatao-nono'i mangalauk-ka, ana ta tao sala-singok so'on, te ana mulai tao tatao-nono'i ndoos ma malole soona, neukose samanen-na naso'da.

²⁸Ana mulai nasasale dale, boema ana tukatei-saledale neme sala-singok fo, ana tao-no'ik-kala mai, soona tao leo bee-o naso'da, de ta mate fan.

²⁹Ma emi, hai hataholi Israel-la lemin! Emi mafa'da mae MANETUALAIN tatao-nono'in ndia, salan. Hai hataholi Israel-la lemin! Ade, Au tatao-nono'ing ndia, salan do? Ta! Emi nde sala dei!”

³⁰MANETUALAIN Fo Mademaina, nafa'da nae, “Hai hataholi Israel-la lemin! Neukose Au aketu-ala'di hataholi lala'en-na, nandaa no tatao-nono'in-nala. Tukatei-saledale meme emi sala-singom mai. Boso po'ilotak emi sala-singom, tao nakalulutuk emi aoinam-ma

³¹Hahae tao basa tatao-nono'i mangalauk lala'en-na, fo tao mabebeu o dalem-ma, ma o dudu'a-aafim leona. Tao le'e de, emi muse mate?

³²Metema, mate hataholi esa soona, Au susa. Tukatei-saledale meme emi sala-singom mai, fo ela emi maso'da mahele. Au, MANETUALAIN Fo Mademaina, nde manakokolak-ka.”