Read Termanu YESKIAL 19 Bible Online

YESKIAL 19 - Termanu bible

YESKIAL 19

¹Manetualain nadenu au akamee, nakamee kikii-makaleleuk ia, soaneu maneana Israel dua. Nae leo ia:

²O inam sama leo singa ina fo, mabe'i-balakaik ma palani. Nakaboboi anan-nala nai singa ao makadelek-kala tala'da.

³Nanoli anan esa, enon-na tao leo beek, fo ana sanga nana'an-na Boema singa ana namatua, de ana da'di singa makaak, ma mana'a hataholi.

⁴Leoina-la, lamanene la'eneu singa ana ndia, boema lakabubua, fo ala ho'u-lan. Lakahihi'ik-lan, neme bolok dale, de ala pa'an, boema, ala pa'an nenik ai kakaik, de ala lele'a-loloson leo Masir neu.

⁵Inan bubuluk, nae ana ta hapu falik anan-na so'on boema ketu namahehenan-na. Boema nanoli anan esa seluk, fo ana da'di singa ba'unasa, ma ao kahelek.

⁶Singa ana ndia namatua, de ana leo-napalasa no singa fe'ek-kala. Ana nanoli sanga nana'an-na, de ana da'di singa mana'a hataholi boe.

⁷Ana hona nakalulutuk kota musu-la, ma ana tao nalutu kota-kota-la. Nusak-ka laun-nala lala'en-na, ala dele bee-too, nai lelek lamanene singa nangao

⁸Tehu leoina-la, leme nusak manai titia-tatain-nala mai, de lakahapi-lan neme mamanak lala'en-na mai. Ala pilu dala neu, fo sue kande ala ho'u-lan, boema ana masok leo hataholi sila hihi'in dale neu.

⁹Ala taon leo longa singa dale neu boema lenin leo nusa Babel-la neu, fo neu nataa manek-ka. Lanea lahelen, fo ela boso boe lamanenen, nangao seluk nai Israel pupuku mademainan-nala poin-na bai.

¹⁰O inam, sama leo ai angol mana'a hiik-ka, fo ana moli nai osi fo nai lee anak-kala su'un-na Ana da'di ai fo, doon makadotok, ma naboa, nanahu oe ba'u nai ndia.

¹¹Ndanan-nala tean-na seli, de ta la'dis no lai-laik fa de nandaa taon da'di aitete'e manek. Poin-na, namadema losa ko'as-sa. Basa hataholi-la lasamanan, nana deman-na seli ma doon makadotok nanseli.

¹²Tehu hataholi ba'unasa-la, ala fe'ahenin, basa boema, ala tapan neu dae lain. Ani timu-a ana mai, boema ana tao-na boa momo'don-nala, lamatuu. La'di ndanan-nala, de lamatuu, boema ala hotuhenin.

¹³Besak ia, ai angol ndia, nanaselek nai moo solokaek-ka, nai dae tokotik ma oe ta.

¹⁴Ha'i-a, ana pila nasalolo'de mai, de na'aheni, angol ndia ndanan-nala, ha'i-a, na'aheni ndanan-nala ma boan-nala. Besak ia, ndanan-nala, ta matea-la so'on; ta bisa taon da'di, aitete'e manek so'on Nakamee kikii-makaleleuk ndia nde, hataholi-la lakamee fali-fali loon.