Read Termanu YESKIAL 2 Bible Online

YESKIAL 2 - Termanu bible

YESKIAL 2

¹“Hai, hataholi daebafak manasapu-laloko nei, fo'a mapadeik leona. Au ahiik kokolak o, o.”

²Nai lelek au amanene halak ndia boema, Manetualain Duladalen-na, ana masok leo au aoinang dale neu, de ana tao-na au apadeik atetu. Basa boema, au amanene seluk halak ndia nafa'da nae,

³“Hai, hataholi daebafak manasapu-lalok-konei, Au adenu o muu leo hataholi Israel fo, manalena-la'ban neu Au-a. Hataholi sila-la, malenalanga-masabasook-kala, sama leo sila bei-ba'i kain-nala boe.

⁴Ala lalangabatu, ma ala ta fe ha'da-holomata neu Au fa. Au adenu o muu leo hataholi sila-la, fo manduku-malosak hata fo Au, MANETUALAIN Fo Mademaina, afa'da neus,

⁵su'di ala nau lamanene do ta; te Au paluuk-kande, sila muse bubuluk, lae hapu nabi nai sila tala'da.

⁶Tehu o, hai hataholi daebafak manasapu-lalok-konei, boso bii-mamata'u neu basa malenalanga-masabasook sila-la, ma neu sila hala-kokolan-nala. Neukose, ala lena-la'ban o, ma lakamumulu-lakamamaek o, nalosa o maso'dam-ma, nono'kabai nai kulak-ka tala'da. Leomae leondiak boe, boso bii-mamata'u.

⁷Manduku-malosak Au hala hehelung lala'en-na neus, su'di ala nau lamanene do ta. Mafandendelek te, hataholi sila-la, malenalanga-masabasook-kala.

⁸Hai, hataholi daebafak manasapu-lalok-konei, mamanene hata fo, Au afa'dan neu o. Boso da'di malenalanga-masabasook boe. Mapook o bafam-ma, fo mu'a hata fo, Au fen neu o.”

⁹Basa boema, au ita limak esa, ana look-kana leo au mai. Nai limak ndia dalek, hapu susula nanadikuk,

¹⁰fo nanasulak nai boboan duas. Boema nai susula nanadikuk ndia dalek, nanasulak, kikii-makaleleuk, haladoik-ka, ma hoo-nggu'uk-ka.