Read Termanu YESKIAL 21 Bible Online

YESKIAL 21 - Termanu bible

YESKIAL 21

¹MANETUALAIN nafa'da au nae,

²“Hai hataholi daebafak fo, manasapu-manalalok-konei, Soo-supa mamana huhule-haladoik manai naa leona! Fe nasanene'dak neu dae Israel-la,

³mae Au, MANETUALAIN kokolak nae leo ia, ‘Au ia, emi musum-ma, Neukose, Au fe'a-a Au tafainang-nga, fo Au taoisa emi basam-mala, nau hataholi mangalauk, do hataholi malole boe.

⁴Au la'ban basa hataholi manai kii-la, losa manai kona-la, nenik Au tafainang-nga.

⁵Soona besak-ka hataholi-la bubuluk, lae Au, MANETUALAIN, fe'a-a Au tafainang-nga, de ta so'dok falik-kana so'ok fa.’

⁶Hai hataholi daebafak fo, manasapu-manalalok-konei, makadii-makau ma mahoo nai hataholi Israel-la matan, nono'kabai o dalem-ma he'dis-sa, ma ketu o namahehenam-ma.

⁷Metema latane o lae, tao le'e de o mahoo soona, mafa'da mae o dalem-ma he'dis-sa, nanahu halak esa, neukose ana mai. Metema halak ndia, ana losa soona, neukose ana tao-na dalen-nala makasufu; liman-nala lakamate, ma lungulangan-nala dele bee-too, ma neukose mopo manggaten-nala. Tete'ek-ka, fain-na losa so, de neukose basa sila-la, ala da'di. Au, MANETUALAIN Fo Mademaina, nde manakokolak-ka.”

⁸MANETUALAIN nafa'da au nae,

⁹“Hai hataholi daebafak fo, manasapu-manalalok-konei, mafa'da dede'a nananafa'da elak-ka leona! Mafa'da hataholi-la mae Au, fo MANETUALAIN nafa'da nae leo ia, ‘Hapu tafaina esa, tafaina nanafofolak, fo namatane.

¹⁰Fofola namatanen, fo ela ana bisa taonisa hataholi, fofolan fo ela isin-na nangale'do. Ta hapu seluk namahokok ba'eneu Au anang-ngala so'on, nana ala ta taoafik neu basa nasanene'dak ma hoholo-lalanek lala'en-na fa.

¹¹Fofola tafaina ndia, fo ela nanapakek tataas esa, boema fen leo hataholi kanisak esa neu.

¹²Hai hataholi daebafak fo, manasapu-manalalok-konei, kii-makaleleu, ma maloo bou-bou leona! Nana tafaina ndia, naheheleaon la'ban Au anang-ngala. Basa mauli-malangan Israel-la, sama-sama loo basa leoina lala'en-na, neukose nanapauk nenik tafaina ndia, losa mate-mopos, Soona toko emi fanam-mala, da'di leo ta'du-tana susa,

¹³nana Au fola Au anang-ngala, metema ala ta nau tao labebeu ha'da-tataon-nala fa soona, neukose basa sila-la tu'da la'es.’

¹⁴Nah, hai hataholi daebafak fo, manasapu-manalalok-konei, mafa'da dede'a nananafa'da elak-ka leona. Totoko o limam-ma leona, fo da'di leo ta'du-tana ba'eneu tafaina ndia, ana mulai do'do-pau hataholi. Tafaina ndia neni bibii-namata'uk nanseli.

¹⁵Ana tao-na Au leoinang-nga mopo palanin-nala, de ala tu'u fo'a. Au fe nasanene'dak mahelek neu sila kotan-na, nenik tafaina fo isin-na, nangale'do sama leo ndelas-sa, ma naheheleaon fo nado'do-napau ndia.

¹⁶Hai tafaina matane, leleuk leo kii ma leo kona neu, ma leo su'di bee neu fo tunga o dale hihiim-ma.

¹⁷Neukose, Au totoko Au limang-nga boe, boema neukose Au nasa-melung ana tenak. Au, MANETUALAIN nde manakokolak-ka.”

¹⁸MANETUALAIN nafa'da au nae,

¹⁹“Hai hataholi daebafak fo, manasapu-manalalok-konei, dulak-ma, enok dua, fo biasa manek Babel-la ho'i neni tafainan-na, fo ana la'ok tunga enok ndia. Enok ka duak sila-la, muse leme nusak fo esa mai; enok esa leo Raba, ma kota Amon-na neu; boema esak-ka leo Yerusalem, ma kota musu manai Yehuda neu. Pasak papak matu'du enok neu eno kaba'ek-ka.

²¹Nana, manek Babel-la napadeik neu eno kaba'ek-ka, fo ana mete, ana tunga enok beek-ka, fo neu noke natutu'duk neme ndia sosongo-tatangon-nala mai, nakalolokok kokouisik, ma ana palisak bana fo, besak-ka nanatunu-hotuk-ka, aten-na.

²²Metema, kokouisik-ka tu'da leo lima konan dale neu soona, la'e Yerusalem! Fo ndia sosoa-ndandaan nae manek-ka, muse sapu-na kota Yerusalem-ma, soona ana eki eeki natee-natatik-ka, fo ela solda'dun-nala lakaduduluk taka-besi, soaneu ala hona lakalulutuk Yerusalem lelesuinan-nala, ma ala tao ladodou dae fo ana da'di papala nanadamak manata'da musu, ma ala kali oelolok.

²³Laun Yerusalem-mala, neukose ta lamahele lae manek Babel-la neu sapu-na sila, nanahu ala tao basa hehelu-balataak loo manek Babel-la so. Tehu dede'a nanafa'da elak ia, ana fe sila nasanene'dak nae neukose, sila nanaho'u-nak, nanahu sila sala-singon-nala.

²⁴Au, MANETUALAIN Fo Mademaina, afa'das ae, ‘Emi sala-singom, nanabubuluk basak so, de basa hataholi-la, ala bubuluk lae emi masala. Emi tatao-nono'i mangalaum-ma, nananitak nai basa emi tatao-nono'im lala'en-na dalek so. Besak ia, fain-na losa, emi nanahukuk so, de neukose Au fe emi leo emi musum-ma neu.’

²⁵Ma Au afa'da manek Israel-la ae, ‘Hai manek fo mangalauk ma malelesik-konei! O fai huhuku mate'em-ma, ana deka so.

²⁶Au, MANETUALAIN Fo Mademaina, kokolak basa so. Makonaheni o ti'ilanga manem-ma, ma se'iheni o fefeo langam-ma leona. Besak ia, o ha'da-tataom nasafali so. So'u madema hataholi nuu taa-hata taak-kala, fo fes koasa. Makonaheni basa manakoasa-la, na'de matua-mademan-nala!

²⁷Neukose, Au tao akalulutuk la'iesak kota ia, nalosa ai-batu manatapasasalak-kala, lalefu-le'ak lai basa mamanak lala'en-na. Tehu, metema Au hele hataholi fo, ana huku kota ia, ana mai soona, besak-ka dede'ak ndia, ana da'di. Neukose Au fe kota ia, neu hataholi ndia dei.’ ”

²⁸ “Hai hataholi daebafak fo, manasapu-manalalok-konei, kokolak dede'a nananafa'da elak leona! Mafa'da hataholi Amon fo, lakamumulu-lakamamaek basa Israel so, mae Au, MANETUALAIN Fo Mademaina nafa'da nae, ‘Tafaina esa, nanasadia basak soaneu nado'do-napau so; tafaina ndia, nanafofola basak so, de isin-na nangale'do, sama leo ndelas-sa, fo ela naheheaon soaneu nanisa.

²⁹Ninitak fo, emi mitak-ka nde been-na, pepekok, ma emi kokolak dede'a nananafa'da elak-ka boeo, pepekok. Emi, hataholi mangalauk ma malelesik, de emi huhuku mate'em-ma, ana deka so. Neukose, tafaina ndia, ana te'teheni emi lesuha'im-ma.

³⁰Hai hataholi Amon-nala lemin, so'dok falik emi tafainam-ma! Neukose, Au aketu-ala'di emi nai mamanak fo, emi nananakadada'dik, ma nanabongik-ka

³¹Neukose, Au kaluaheni Au nasa-melung fo, manalua ponu-ponung-nga neu emi. Neukose, Au fe emi leo hataholi fo, dale susue-lalai tak-kala neu, fo ala tao lamate-lamopo emi.

³²Neukse, ha'i-a, na'aheni emi. Emi daam-ma, neukose ana faa nai emi nusam dale, fo ta hapu hataholi esa boen, nafandele emi so'on. Au MANETUALAIN nde manakokolak-ka.’ ”