Read Termanu YESKIAL 22 Bible Online

YESKIAL 22 - Termanu bible

YESKIAL 22

¹MANETUALAIN nafa'da au nae,

²“Hai hataholi daebafak fo, manasapu-manalalok-konei, ade o maheheleaom basa, soaneu maketu-mala'di kota fo, henuk no kanisak ndia so do? Matu'dun basa tatao-nono'in fo, nanamaluak lala'en-na.”

³MANETUALAIN Fo Mademaina, nadenu au fo, anduku-alosak hala heheluk ia, neu Yerusalem nae, “O masala, nanahu o taomisa o laum makadotok so, ma o tao manggenggeo o aoinam-ma, nenik o sene-do'ok neu sosongo-tatangok fo, o tao-kala. Hu ndia de, o fai naketu-nala'dim-ma, ana deka so, fo no lai-laik, mopo o na'dem-ma. Au po'ilotak leoina-kala, ma basa nusak-kala, ala hakinonoli ma ala hika o.

⁵Nusak manai dook-kala, ma manadekak-kala, ala hakinonoli o, nanahu o la'olena Au hoholo-lalaneng ma Au nakaneneteng-ngala nakandondoo henin.

⁶Basa mauli-malangan Israel-la, lamahena be'i-balakain-nala, de ala tao tatao-nono'ikanisak.

⁷ Nai o laum-ma dalek, ta hapu hataholi esa boen fo, ana fe ha'da-holomata neu ina-aman fa. O ke'di-ndiu hataholi nusa dea-la, ma o ho'i nanalak, nai faluina anamaak-kala fai susan-na dalek.

⁸ O tao manggenggeo, Au mamana huhule-haladoing-ngala, ma o ta taoafik neu fai Sabat-ta fa.

⁹Nai o laum-ma dalek, hapu hataholi manatui dede'a pe'dak, fo lakasasa'ek dede'ak neu hataholi fe'ek, fo ela hataholi ndia nanahukunisak. Hapu nggelok boe, ala hii la'a paa fo, nanatunu-hotu basak neu sosongo-tatangok-kala so. Hapu nggelok seluk bai, ala hii tao tatao-nono'i manggenggeok.

¹⁰ Hapu nggelok fufu'di-oodok ma ana sungu no ina palan-na, inak fo ana hapu he'di bulak,

¹¹hataholi fe'ek saoinan, do manafeun-na, do fa'din fo esak inan, fo ana sungu non.

¹² Hapu nggelok boe, hataholi se'ba-baen, fo ana taonisa hataholi, ana da'di kelumatuk fo ana musi hataholi daan, ma ana lumu-ese nonoo hataholin-na. Sila basa-basas lafansele heni Au so. Au, MANETUALAIN Fo Mademaina, nde manakokolak-ka.

¹³Tehu besak ia, neukose Au hotu fe, basa o nakodaam-mala, ma kanisam-mala.

¹⁴Tehu nai lelek Au huku basa o soona, o bei mapalani, do o bei mabe'i-balakaik soaneu o so'uk o limam-ma do ta? Au, MANETUALAIN Fo Mademaina, kokolak basa so, de neukose Au tao hata fo, Au kokolak basan so.

¹⁵Neukose, Au tao tapasasala o laum-mala, leo basa nusak-kala ma leoina-kala leu, ma neukose Au tao ate'e, o tatao-nono'i mangalaum ndia.

¹⁶Neukose, leoina fe'ek-kala lakamumulu-lakamamaek o, soona besak-ka o bubuluk, mae Au nde MANETUALAIN-na.”

¹⁷MANETUALAIN nafa'da au nae,

¹⁸“Hai hataholi daebafak fo, manasapu-manalalok-konei, hataholi Israel sila-la, sosoa-ndandaan-nala ta, ba'eneu Au. Sila sama leo liti nanasese'dok-ka lulutun-na, sama leo liti, tima, besi ma tima nggeok-ka lulutun-na, nai lelek lilofulan-na, nananatanoe basak nai ha'i dale so.

¹⁹Hu ndia de besak ia, Au, MANETUALAIN Fo Mademaina, afa'das ae sila sama leo liti fo, sosoa-ndandaan ta ndia. Sama leo ala tao lilofulak, liti, besi, tima nggeok, tima fulak-ka leo ha'i dale neu fo latanoen, leondiak boe, neukose Au tao akabubuas, fo Au os leo Yerusalem leu. Neukose, sila nananatanoek nai Au nasa-melu manalua ponu-ponung-nga dalek, sama leo latanoe liti de'ek-kala nai ha'i dale.

²¹Hei, neukose Au tao akabubua emi nai Yerusalem, fo Au asapula Au ha'i nasa-melung-nga neu emi, fo ela emi nananatanoek nai ha'i nasa-meluk ndia dalek.

²²Sama leo lilofula-ka, nananatanoek nai ha'i dale, leondiak boe, neukose sila nananatanoek nai Yerusalem. Soona besak-ka, ala bubuluk lae Au, MANETUALAIN kalua Au nasa-melung neu sila.”

²³MANETUALAIN kokolak seluk no au nae,

²⁴“Hai hataholi daebafak fo, manasapu-manalalok-konei, mafa'da hataholi Israel-la, mae sila daen-na nanggenggeo, hu ndia de, Au amanasa de Au hukun.

²⁵Basa mauli-malangan-nala, sama leo singa kaa-na nana'an-na soona, nangao. Ala taolisa laun-na, ala loso-la hata-heton ma su'i-beten-nala, ma hu kande sila tatao-nono'in de, inak makadotok ala da'di inafalu.

²⁶ Basa imam Israel-la, ala la'olena Au hoholo-lalaneng, ma ala tao langgenggeo bua-lo'as fo nanafe hehelik soaneu Au. Ala ta mete kofe'ek, hata beek-kande nanakena-ka'ik ma hata beek-kande ta nanakena-ka'ik fa. Boeo, ala ta lanoli laun-na, fo ala mete kofe'ek, beek kande balisi, ma beek kande manggenggeok, tunga agama nakaneneten-nala. Ala ta taoafik neu fai Sabat-ta fa. No enok ndia de, leoina Israel-la, nakamumulu-nakamamaek Au.

²⁷Manapaletan-nala sama leo busa fuik-ka, ana sisii-lulu'i nana'an-na. Ala lanisa, ka'da soaneu sanga nanalak.

²⁸Basa nabin-nala, lafuni sala-singok sila-la, sila sama leo hataholi fo, ana lose ha'o neu papala nanadama manggenggeok-ka. Sila ninitan-nala, pepekok, leondiak boe, sila dede'a nananafa'da elan-nala. Ala manaku lae sila landuku-lalosak hala heheluk-ka nde been-na, sila sipon neme MANETUALAIN Fo Mademaina mai, te se'kona, Au ta kokolak o sila la'iesa boen.

²⁹Hataholi kamasu'i-makabetek-kala, ala ke'di-ndiu ma lamanako. Ala tuni-ndeni hataholi nuu taa-hata taak-ka, ma ala ho'i nanalak neme hataholi nusa dea-la mai.

³⁰Nai hataholi Israel-la dalek, Au sanga hataholi fo, ana bisa napadedeik papala nanadamak, do napadeik neu mamanak fo, papala nanadaman-na tu'u neu, fo nakataka nahele nusak ndia, metema Au sanga tao akalulutuk-kana, nai Au nasa-melung fo manalua ponu-ponung-nga dalek; tehu Au ta hapu hataholi esa boen.

³¹Hu ndia de besak ia, Au amanasas, de neukose Au tao amate-amopos nenik ha'i, nanahu sila tatao-nono'in lala'en-na. Au MANETUALAIN Fo Mademaina, nde manakokolak-ka.”