Read Termanu YESKIAL 26 Bible Online

YESKIAL 26 - Termanu bible

YESKIAL 26

¹ Nai bulak esa, fo bulak ndia na'den-na ta nanasulak fa, fain esa, fo nai lelek ami nai mamana tu'u-tapak, nai teu ka sanahulu esan-na boema, MANETUALAIN kokolak no au nae,

²“Hai hataholi daebafak fo, manasapu-manalalok-konei, Tirus laun-nala ala eki, boema lafa'da lae, ‘Yerusalem nakalulutuk so! Ana ta dangan so'on, nanahu ana tu'da so! Ana ta da'di musu nai ita dangan dale so'on!’ ”

³MANETUALAIN Fo Mademaina nafa'da nae, “Hai Tirus, Au ia, o musum-ma. Neukose, Au adenu leoina makadotok ala mai, sama leo lii nai tasi lai, fo ala sapu-la o.

⁴Neukose, ala tao lakalulutuk o papala nanadama-mala, ma ala tao latu'u o umam-mala puni mademan-nala. Neukose Au sasapu heni dae sopuk manai naa-la, nalosa ela ka'da batu esa nai tasi tala'da.

⁵Neukose, basa hataholi tasi-la, ala ho'i sila dalan-nala nai batu ndia lain. Au, MANETUALAIN Fo Mademaina, nde manakokolak-ka. Neukose leoina-kala, ala mai fo, ala kalo leni Tirus hata-heton-nala.

⁶Neukose lamanako, ma ala taolisa laun manai Tirus kota letelepan-nala. Soona besak-ka laun Tirus-sala, ala bubuluk lae Au nde MANETUALAIN-na.”

⁷MANETUALAIN Fo Mademaina, nafa'da nae, “Hai Tirus, neukose Au o Mane Nebukadnezar-ra neme Babel mai, fo ana sapu-na o. Manek fo be'i-balakain ba'un-na seli ndia, neukose ana mai neme kii mai, fo no solda'du bubuaina esa loo ndala makadotok, ma kaleta musu-la, boema solda'du manasa'e ndala-la.

⁸Nai natee-natatik ndia dalek, neukose ala taolisa laun manai kota letelepak-kala lala'en-na. Neukose musu-a kali oelolok fo ala ke'ke lai dalek, ma ladodou dae fo da'di papala nanadamak, ma ala ho'i-la sila babaa fana matuaina-la, fo lakaduduluk-kasa da'di leo kota musu, soaneu ala la'ban o.

⁹Neukose ala hona lakalulutuk o papala nanadamam-mala nenik taka-besi, ma ala tao latu'u o umam-mala puni mademan-nala, nenik besi kali dae.

¹⁰Sila ndala-nala makadotok nanseli, nalosa ein-nala fofoti-la dae sopuk-ka ana lapu, de ana poti-na o. Solda'du manasa'e ndala fo, manahela kaleta manafua tua-lepa-la, ma kaleta musu-la ei ndu'un-nala, neukose ala tao-la o papala nanadamam-mala ala dele, nai lelek ala masok tunga o lelesuinam-mala leo kota fo, ana da'di ai-batu manatapasasalak ndia dalek leu.

¹¹Solda'du manasa'e ndala sila-la, neukose ala sapu-la o laum-mala, lai o enom-mala lain, fo ala taolisas lenik sila tafainan-nala. Neukose ala tao lakalulutuk lutubatu fo o koa-kiok-kala.

¹²O musum sila-la, neukose ala kalo leni basa o hata-hetom, ma o bua dangam-mala lala'en-na. Neukose, ala tao lakalulutuk o papala nanadamam-mala, ma ala tao latu'u o uma mana'ahiim-mala. Neukose ala ho'i-la batun-nala, papan-nala, ma daen-nala, fo ala tapas leo tasi dale leu.

¹³ Neukose Au tao ate'e o nakameem lala'en-na, ma o sasanu kecapim-ma.

¹⁴Fo Au la'oela kande, ka'da batu esa mesak-kana, fo hataholi tasi-la, mamana ho'i dalan-nala. Kota ndia, neukose ta nananafofo'a falik so'on. Au, MANETUALAIN Fo Mademaina, nde manakokolak-ka.”

¹⁵MANETUALAINFo Mademaina, nafa'da kota Tirus-sa nae, “Laun manai tasi su'uk-kala neukose ala dele bee-too hu kande bibii-namata'uk-ka, metema lamanene ala eki lae o kala, ma lamanene hataholi nanado'dok-kala hoo-nggu'un.

¹⁶ Leoina manai tasi su'uk-kala, manen-nala lita o ua-nalem da'di tao leondiak soona, neukose ala fo'a leme kandela manek lain mai, fo ala o'duheni sila ba'du manalu matua-madema-na, ma sila ba'du nanaseu bunga-na, fo langatuuk dele bengge'be leu dae lain. Neukose ala bii-lamata'u lanseli, nalosa dalen-nala ta tesa-tama fa.

¹⁷Basa soona, neukose lakamee fe o, nakamee natoi-natonok-ka nde ia nae: Kota fo nanakoa-nanakiok-ka, nakalulutuk so! Ofan-nala lala'en-na, nanasapu balisik neme tasi maloaina mai. Makasososan-na, laun-nala koasa nai tasi-a, de ala tao-la hataholi tasi su'uk-kala, ala bii-lamata'u.

¹⁸Besak ia, nai faik fo o kala, laun manai pulu-pulu-la, ala dele bee-too. Ala lita o nakalulutum fo, nanauku-dou tak ndia, boema basa-basas nggenge-la.”

¹⁹MANETUALAIN Fo Mademaina, nafa'da nae, “Au tao o da'di kota fo, nee-nee lino-linok, sama leo kota fo, laun ta. Neukose Au fe oe-a neme tasi maloaina buin-na mai, fo ana poti-na o.

²⁰Boema Au haitua o leo, hataholi manamatek-kala mamananna neu, fo makabubua moo hataholi makahulun eli-la. Au po'ilotak o, mahele meme hataholi manamatek sila-la mamanan-na, fo nai ai-batu manatapasasalak manaketu-basa taak-ka, tala'daheon, ma sama-sama moo hataholi manamatek-kala Soona neukose hataholi ta leo o daem-ma so'on, ma neukose, o ta nanalekek nai hataholi maso'dak-kala dalek so'on.

²¹ Neukose Au tao o da'di natutu'duk fo, neni bibii-namata'uk matuaina, fo ndia nde da'di o so'da mete'em-ma. Hataholi-la neukose ala sanga o, tehu ala ta hapu o fa. Au, MANETUALAIN Fo Mademaina, nde manakokolak-ka.”