Read Termanu YESKIAL 29 Bible Online

YESKIAL 29 - Termanu bible

YESKIAL 29

¹ Nai hataholi Yahudi-la bula ka sanahulun-na, fain sanahulu dua, fo nai lelek ami nai mamana tu'u-tapak, nai teu ka sanahulun-na, MANETUALAIN nafa'da au nae,

²“Hai hataholi daebafak fo, manasapu-manalalok-konei, makamuu-makadau mane Masir-ra. Mafa'dan mae ndia no basa laun Masir-ra lala'en-na, neukose nanahukuk.”

³MANETUALAIN Fo Mademaina, nafa'da au nae, mafa'da mane Masir-ra, hala heheluk-ka nde ia nae, “O musum-ma nde Au ia, hai beis matuaina, fo o makandondoo nai lee-a tala'da. O malame'i mae Lee Nil-la nde been-na, o nuum ndia, ma o mae, o nde taolee ndia.

⁴Neukose Au kakai ai kakaik neu o timim-ma, ma Au akadiditak i'ak neu o unem-mala. Soona Au hela o, fo o kalua meme Lee Nil dale mai, mo basa i'ak fo lakadita lai o unem-ma ndia.

⁵Basa soona, Au tapa o moo basa i'ak sila-la lala'en-na, leo moo solokaek-ka neu. Neukose o mapoko dae lain, fo o makabebepa meme ndia. Neukose hataholi ta natoi-natono o fa. Au fe o leo manupui-la, ma bana fe'e-fe'ek-kala, fo la'aheni o.

⁶ Soona besak-ka laun Masir-ra, ala bubuluk lae Au nde MANETUALAIN-na.” MANETUALAIN nafa'da nae, “Hai leoina Masir-ra nei! Hataholi Israel-la, ala lamahena o tutulu-fafalim, tehu se'kona, o sama leo ka'da aitete'e manamalek mesak-kana.

⁷Nai lelek fo, ala lasala'da o, boema la'di o, de o pau la'e sila lilibolon-nala, nalosa sila mulih'ain-nala kosik.

⁸Hu ndia de Au, MANETUALAIN Fo Mademaina, afa'da o, ae neukose Au adenu solda'du-la leni tafaina fo leu sapu-la o, fo ala taolisa o laum-mala, ma o bana-manum-mala.

⁹Neukose, Masir da'di dae louk. Soona besak-ka emi bubuluk, mae Au nde MANETUALAIN-na.” MANETUALAIN nafa'da nae, “Hai mane Masir-ra nei! Hu kande o mafa'da mae Lee Nil-la nde been-na, o nuum, ma o mae o nde tao lee ndia,

¹⁰de o, ma o Lee Nil-la, musun-na, nde Au ia. Neukose Au tao dae Masir-ra lala'en-na, da'di dae louk, mulai neme kota Migdol-la, nai kii, losa leo kota Aswan-na, nai kona, fo leo Sudan dae toon-na neu.

¹¹Ta hapu hataholi do bana-manu, ala la'ok tunga ndia fa. Nai teuk haahulu dalen-na, neukose hataholi ta leo nai ndia fa.

¹²Neukose, Au tao-a Masir, da'di dae louk, nalosa nai nusa louk fe'ek-kala, Masir nde louk nanseli. Nai teuk haahulu dalen-na, kota-kota manai Masir-ra, neukose lalupa leo ai-batu manatapasasalak lena heni kota lala'en-na. Neukose, Au tao leoina Masir-ra, da'di hataholi manamai nusa fe'ek. Neukose, ala tapasasala leo basa nusak lala'en-na leu, fo ala leo lai leoina fe'ek-kala tala'da.”

¹³MANETUALAIN Fo Mademaina, nafa'da nae, “Hai leoina Masir-ra nei, basa teu ka haahuluk sila-la soona, neukose Au o falik emi, neme emi tapasasala nai nusa-nusak-kala mai.

¹⁴Neukose Au o falik emi, fo Au adenu emi meu leo nai Masir boboan kona, fo emi dae fua-funi ndalu-sitam-ma. Neukose, emi da'di nusa anak esa nai naa,

¹⁵fo nusak ndia, anak nanseli nai basa nusak manai daebafak-ka lala'en-na. Neukose, Au tao-a emi, tapandoe manseli, nalosa emi ta hapu paleta leoina fe'ek, do koao-ndaeao neu leoina sila-la fa.

¹⁶Neukose, Israel ta noke tutulu-fafalik neme emi mai so'on. Hai leoina Masir-ra nei, o ua-nalem ndia, ana fe nasanene'dak neu Israel, nae Israel sala nanseli, metema namahena Masir, sama leo ana tao hain nai makahulun-na so. Soona besak-ka Israel bubuluk, nae Au nde MANETUALAIN Fo, Mademaina.”

¹⁷Nai hataholi Yahudi-la, bula ka esan-na, fain esa, fo nai lelek ami nai mamana tu'u-tapak, nai teu ka duahulu hitun-na, MANETUALAIN nafa'da au nae,

¹⁸“Hai hataholi daebafak fo, manasapu-manalalok-konei, Mane Nebukadnezar-ra, neme Babel mai, neu sapu-na Tirus. Ana nadenu solda'du-la, ala lepa lelepa mabelaina, nalosa langan-nala da'di polik, ma kosuheni alu loun-nala, tehu nau manek-ka, do solda'du-la boe, ala ta hapu hata esa boen, neme sila sosota-mamangun ndia mai fa.

¹⁹Hu ndia de, Au MANETUALAIN Fo Mademaina, afa'da ae: Neukose Au fe dae Masir-ra, leo Mane Nebukadnezar-ra neu. Neukose namanako, ana kalo, ma ana foo neni la'iesak Masir su'i-beten, fo da'di neu ndia solda'dun-nala, ngga'din-na.

²⁰Au fe dae Masir-ra leo Mane Nebukadnezar-ra neu, da'di leo baba'ek esa neu tatao-nono'i malolen-nala, nana solda'dun-nala, ala tao-no'i soaneu Au. Au, MANETUALAIN Fo Mademaina, nde manakokolak-ka.

²¹Metema dede'ak ndia, ana da'di soona, neukose Au tao-a Israel da'di leoina matea-mahelek, de ana fe o fo Yeskial loak, soaneu kokolak su'di bebe'ik-ka, nalosa hataholi lala'en-na, hapu lamanene o. Soona besak-ka ala bubuluk, lae Au nde MANETUALAIN-na.”