Read Termanu YESKIAL 3 Bible Online

YESKIAL 3 - Termanu bible

YESKIAL 3

¹ Manetualain nafa'da nae, “Hai, hataholi daebafak fo, manasapu-manalalok-konei, mu'a susula nanadikuk ia leona, boema muu leona, fo kokolak-kana neu hataholi Israel-la.”

²Boema, au apook au bafang-na, de Manetualain fe susula nanadikuk ndia leo au mai, fo ela au u'an.

³Nafa'da nae, “Hai, hataholi daebafak fo, manasapu-manalalok-konei, mu'an leona! Ko'do heni susula nanadikuk ia, leo o teim dale neu.” Boema, au u'a susulak ndia, de au ame'da makeen-na, sama leo fanioe-a.

⁴Manetualain nafa'da seluk nae, “Hai, hataholi daebafak fo, manasapu-manalalok-konei, muu leo hataholi Israel-la leona, fo manduku-malosak basa Au hala hehelung lala'en-na neus.

⁵Nana, hu kande hataholi sila-la, de Au adenu o muu, te Au ta adenu o muu leo hataholi fo, dede'an-na tean-na seli, dede'an-nala, dede'a nusa dea, fo o ta malelak-kana fa. Leo uni'ka, Au adenu o muu leo leoina leondiak-ka, soona neukose ala lamanene hala-kokolak sila-la.

⁷Tehu, leoina Israel-la, ta nau lamanene o fa, lena-lenak Au bai, ala ta taoafik neu Au makandondook fa. Sila basa-basas, lalangabatu, ma ala hii ka'da lena-la'ban Au.

⁸Besak ia, neukose Au fe o malangabatu, ma o dalem-ma natea, sama leo sila boe.

⁹Neukose, Au tao o da'di batu piak, fo tean-na sama leo batu intan-na. Boso bii-mamata'u neu malenalanga-masabasook sila-la.”

¹⁰Basa boema, Manetualain nafa'da nae, “Hai, hataholi daebafak fo, manasapu-manalalok-konei, taoafik matalolole, ma mafandendelek basa hata lala'en fo, Au afa'dan neu o.

¹¹Muu leo o leoina, fo manai mamana okak ndia, fo manduku-malosak hata fo Au, MANETUALAIN Fo Mademaina, nafa'dan neu sila, su'di ala nau lamanene do ta.”

¹²Boema, Manetualain Duladalen-na, ana so'u-na au, de au amanene halak-ka, nanggulu nai au deang-nga nae, “Koa-kio MANETUALAIN manai nusa so'dak-ka, mandela-masa'an!”

¹³Au amanene mahahaek sila-la li'dan-nala, esa koila'e esa de lakalapa, ma ban sila-la benggoto, sama leo daebafak-ka nanggengo.

¹⁴MANETUALAIN koasa matuainan-na, ana mai leo au mai, de lelek Manetualain Duladalen-na so'u-na au de noo au, boema au ame'da daleng-nga makahe'duk, ma namahana.

¹⁵Boema, au losa hataholi nanatu'u-tapak-kala mamana leleo-na, nai Tel-Abib, fo nai Lee Kebar-ra, su'un-na; au angatuuk de au dodoo basa hata lala'en fo, besak-ka au amanenen ma au itan ndia.

¹⁶Basa faik hitu, MANETUALAIN nafa'da au nae,

¹⁷“Hai, hataholi daebafak fo, manasapu-manalalok-konei, Au so'u o da'di manamanea neu leoina Israel-la. Manduku-malosak nasanene'dak fo, Au fek ia-la neus.

¹⁸Metema, Au afa'da ae neukose mate hataholi mangalauk esa, tehu o beita fen nasanene'dak fo ana tukatei-saledalen-na, fo ela ana hapu so'dak, soona neukose ana mate, sama leo hataholi masala-masingok, de o nde lu'a-lepa hataholi ndia mamaten-na.

¹⁹Metema, o fe hataholi mangalauk ndia nasanene'dak, tehu ana ta nau tukatei-saledale fa, de ana mate sama leo hataholi masala-masingok, tehu neukose o maso'da.

²⁰Metema hataholi malole esa, ana tao sala-singok, fo Au fen nasasalematak no soe-a, de neukose maten, te metema o beita fen nasanene'dak fa. Neukose ana mate, nanahu sala-singon, de naukose Au ta afandele tatao-nono'i malolen-nala fa. Tehu neukose Au oke natataak neme o mai, la'eneu hataholi ndia mamaten-na.

²¹Metema, o fe hataholi malole ndia nasanene'dak, fo ana tunga o nanoli-nafa'dam, soona neukose Au ta huku hataholi ndia fa, ma neukose o maso'da.”

²²Au ame'da ita, MANETUALAIN mamain-na be'i-balakain, de au amanene nafa'da au nae, “Fo'a leona, fo muu leo bafak dale muu. Neukose Au kokolak o, o nai naa.”

²³Boema, au u leo bafak dale u, de nai ndia, au ita mangale'dok-ka, nandela-nasa'a, fo natu'du MANETUALAIN mamain-na, sama leo au ita basan neme Lee Kebar-ra su'un-na. Boema, au tu'u atotonokala neu dae lain,

²⁴tehu Manetualain Duladalen-na, ana masok leo au dalek mai, de ana hela nafofo-a au. Boema MANETUALAIN nafa'da au nae, “Fali mu'um-ma, fo mahele meme uma dale.

²⁵Hai, hataholi daebafak fo, manasapu-manalalok-konei, neukose o nanahengek nenik tali, nalosa o ta hapu kalua meme uma dale mai, ma o ta hapu matongo moo hataholi fa.

²⁶Neukose Au fe o maam-ma balakai, fo o ta hapu fe nasanene'dak neu leoina fo, malenalanga-masabasook ia-la fa.

²⁷Mahani te, metema Au kokolak seluk o o, fo Au fe falik o be'i-balakaim, fo o hapu kokolak seluk soona, o muse manduku-malosak hata fo Au, MANETUALAIN Fo Mademaina, afa'dan neu leoina ndia. Neukose, sila nggelok lamanene, tehu nggelok soona ta, nanahu memak sila, leoina malenalanga-masabasook.”