Read Termanu YESKIAL 31 Bible Online

YESKIAL 31 - Termanu bible

YESKIAL 31

¹Nai hataholi Yahudi-la, bula ka telun-na, fain esa, fo nai lelek ami nai mamana tu'u-tapak, nai teu ka sanahulu esan-na, MANETUALAIN nafa'da au nae,

²“Hai hataholi daebafak fo, manasapu-manalalok-konei, mafa'da Au hala hehelung-nga nde ia, neu Firon fo mane Masir-ra, no basa leoinan lala'en-na mae: See kande bisa sama leo o! Nai o matua-mademam-ma dalek!

³Mitak, Au akasasamak o, sama leo ai kaiou manai Libanon fo, henuk no ba'e mana'ahiik-kala, ma doon-na, makadotok nanseli; ana moli de deman-na seli, pe'dan-na losa lalai.

⁴Lee-la tao lan namatua, tasi maloaina, ana tao nan, namadema; ndia tao-na lee-a, ana faa okofefeok huun-na; ma oelolok-kala, ala faa leo basa ai manai mook-ka lala'en-na.

⁵Hu ndia de ana moli, boema dema lena heni basa ai manai mook-ka lala'en-na; ndanan-nala boetai lamaba'uk-ka, ba'en-nala lamanalu, nanahu oe makadotok faa leo huun-na neu.

⁶Basa manupui manai lalai lala'en-na, landunu lai ndanan-nala lain, bana fuik-kala lu'u lai ndanan-nala dae, fo ala bongi anan-nala. Basa leoina matuaina manai daebafak-ka lalaena, langatuuk fo ala hahaeaon-nala lai huun-na.

⁷Ndia mana'ahiik nanahu, huun-na matuaina, ma hu kande, ndanan-nala manaluina. Ma hu kande, okan-nala landondolo losa oe manalifuk-kala.

⁸ Basa ai kaiou manai Manetualain osin dale-la, ta bisa nakasasamak-kasa loo fan. Boeo ai kaiou fe'ek-kala, ndanan-nala ta bisa nakasasamak-kasa loo ndia ndanan-nala fa, ma ba'en-nala ta bisa nakasasamak-kasa loo ba'en-nala fa. Basa ai manai Manetualain osin dale-la, ta bisa nakasasamak lole-napun loo ai ndia lole-napun fa.

⁹Au tao-a ai ndia, te'e-te'e manahiik nenik ndana makahuhupun-nala. Basa ai manai osi Eden-na, fo Manetualain osin-na dalek, ala ta hii mete ai ndia fa.

¹⁰Hu ndia de Au, MANETUALAIN Fo Mademaina, afada o hata fo, neukose ana da'di neu ai fo pe'dan-na losa ko'as-sa ndia. Nana ana boetai namademak-ka, ana boetai koao-ndaeao.

¹¹Hu ndia de, Au ta sipok-kana fa, de neukose Au fen leo manakoasa nusa dea-la neu, fo neukose ala taon, nandaa no tatao-nono'i mangalaun-nala.

¹²Solda'du nusa dea fo, ta lalelak susue-lalaik ndia fa, neukose ala lo'ohenin, boema ala po'ilotak-kana lee-lee neme ndia. Ndanan fo la'dihenik-kala, neukose ala tu'da beepoko nai basa letek-kala poin-na, ma nai bafak manai nusak ndia. Basa leoina fo, ala hahae lai huun-na, neukose lalai la'oelan.

¹³Neukose manupui-la ala mai, fo ala sa'e leu ai manatu'uk ndia, ndanan-nala lain, ma bana fuik-kala ala mai, fo heheta-aa'i ndanan-nala.

¹⁴Basa sila-la ala da'di, fo ela nai hatematak ia, neukose ta hapu seluk ai fo, ana moli dedemak ndia so'on; ta hapu seluk ai fo, pe'dan-na losa ko'as-sa, leomae ana moli nai oe-a tala'da boe. Basa-basas manamatek mesa-mesan, sama leo hataholi daebafak fo, manasapu-manalalok-ka, fo leu lakabubua loo hataholi manamatek-kala, nai hataholi manamatek-kala mamanan-nala.”

¹⁵MANETUALAIN Fo Mademaina, nafa'da nae leo ia, “Metema ai ndia, ana kona leo hataholi manamatek-kala mamanan-na neu soona, Au adenu oe manai dae dale-a, fo ala enen da'di leo ta'du-tana manasusak. Neukose Au akaneteisa lee-la, fo ala boso faa, ma Au bakate'teisa, lee anak-kala. Hu kande, ai ndia maten so, de neukose Au fe makahatuk-ka poti-na basa letek Libanon-nala, ma ana tao-na, basa ai manai nula dale-la, ala male.

¹⁶Nai lelek fo, Au akonaheni ai ndia, leo hataholi manamatek-kala mamanan-nala neu soona, nafanduu, fo ana tao-na leoina-kala, ala dele. Basa ai manai Eden dalek-ka, ma basa ai nanahelek manai Libanon fo, ala hapu oe manafaa dolo-dolok-ka, ma manakona basak leo daebafak-ka buin-na leu, neukose lamahoko, hu kande ai ndia tutu'un-na.

¹⁷Neukose, ala tungan leo hataholi manamatek-kala mamanan-na leu, fo lakabubua loo hataholi manatu'da makahuluk-kala. Fo makahulun-na, sila basa-basas langatuuk leme ai ndia huu-na, neukose nanatao tapasasalak leo leoina-kala tala'da leu.

¹⁸Ai ndia, nakandandaan-na nde, mane Masir-ra no laun-nala. Ta hapu ai madema, ma ai nanakoa-nanakiok leondiak-ka, nai Eden dalek fa. Tehu besak ia, sama leo ai manai Eden-nala boe, de ai ndia boeo, neukose ana kona leo hataholi manamatek-kala mamanan-na, fo nakabubua no hataholi fo ta lalelak Manetualain-na, ma no hataholi fo ala mate nai natee-natatik dale. Au, MANETUALAIN Fo Mademaina, nde manakokolak-ka.”