Read Termanu YESKIAL 37 Bible Online

YESKIAL 37 - Termanu bible

YESKIAL 37

¹Boema MANETUALAIN koasan-na, ana poti-na au, de Duladalen-na no au leo bafak esa, henuk no duik-kala.

²MANETUALAIN ho'u au limang-nga, de ami la'ok okofefeok bafak ndia, de au ita dui tuuk makadotok nanseli, besenggela lai basa bafak ndia dalek lala'en-na.

³MANETUALAIN natane au nae, “Hai hataholi daebafak fo, manasapu-manalalok-konei, ade duik ia-la, bisa laso'da seluk do ta?” Boema au ataa ae, “MANETUALAIN Fo Mademaina, ka'da O mesam-ma nde, bubuluk-ka.”

⁴Boema MANETUALAIN nadenu au, fo au anduku-alosak hala hehelun-na neu dui tuuk sila-la nae,

⁵“Au MANETUALAIN Fo Mademaina, fuu ani hahaek leo emi aoinam dale neu, fo ela emi maso'da falik.

⁶Au fe emi uak ma isik, boema Au potiketu emi nenik louk. Neukose Au fe emi ani hahaek, fo emi maso'da. Soona emi bubuluk, mae Au nde MANETUALAIM-ma.”

⁷Boema au fo Yeskial kokolak o duik sila-la, nandaa no MANETUALAIN paletan-na. De au bei kola-kola te, au amanene halak-kala nono'kabai, helu la'di ai-a fo ggoto-nggoto, nanahu duik sila-la, esa mulai natutik no esa.

⁸Lelek au mete atalololes te, duik sila-la mulai mauak ma maisik, boema malouk boe, tehu aopaak sila-la, ala beita hae fa.

⁹Boema Manetualain nafa'da au nae, “Hai hataholi daebafak fo, manasapu-manalalok-konei, kokolak moo anin-na. Mafa'da mae Au, MANETUALAIN Fo Mademaina, nafa'da neun, fo ela ana mai neme bu'u-bu'uk lala'en-na mai, fo ana fuu ani hahaek leo aopaa manamatek sila-la dalek neu, fo daenga ala laso'da falik.”

¹⁰ Boema au kokolak sama leo MANETUALAIN paletan-na, de anin-na boeo, ana fuu ani hahaek leo aopaak sila-la dalek neu, boema ala fo'a de lapadeik. Sila dede'un-na, makadotok nanseli, dai soaneu lapadedeik-la, solda'du bubuaina esa.

¹¹Manetualain nafa'da au nae, “Hai hataholi daebafak fo, manasapu-manalalok-konei, duik ia-la, ala da'di ta'du-tana neu leoina Israel-la. Ala haladoi lae sila duin-nala lamatuu, de mopo sila namahehenan-na, ma mopo sila maso'dan nai fai manamaik-kala.

¹²Hu ndia de, mafa'da Au anang Israel sila-la mae Au, MANETUALAIN Fo Mademaina, neukose soiheni sila laten-nala. Neukose Au kaluahenis leme ndia mai, fo Au fe falik-kasa leo dae Israel-la leu.

¹³Metema, Au tao basa sila-la soona, neukose Au anang-ngala, ala bubuluk lae Au, nde MANETUALAIN-na.

¹⁴Neukose, Au fuu ani hahaek leo sila aoinan-na dale neu, fo Au tao aso'das, boema Au fes ala leo lai sila nusan-na. Soona besak-ka ala bubuluk, lae Au nde, MANETUALAIN-na. Au, fo MANETUALAIN nde manakokolak-ka, de tao leo bee-o, neukose nanatao natetuk.”

¹⁵MANETUALAIN nafa'da seluk au nae,

¹⁶“Hai hataholi daebafak fo, manasapu-manalalok-konei, ho'i-ma aitete'ek esa, fo sulak dede'ak ia-la neu lain, nae, ‘Nusa Yehuda’. Soona, ho'i-ma aitete'ek esa seluk, fo sulak dede'ak ia-la neu lain, nae, ‘Nusa Israel-la’.

¹⁷Basa soona, ho'u matalolole aitete'e ka duak sila-la, fo pe'dan duas lakabubua, fo ala da'di aitete'ek esa.

¹⁸Metema, leoina Israel-la, latane sosoa-ndandaan soona,

¹⁹mafa'da mae Au, MANETUALAIN Fo Mademaina, neukose Ana ho'i-na aitete'ek fo, manada'di ta'du-tana neu Israel-la, fo Ana tao nakabubuan no aitete'ek fo, manada'di ta'du-tana neu Yehuda. Au Neukose Au tao aitete'e ka duak sila-la da'di esa, fo Au ho'us nai Au limang dale.

²⁰Ho'u-ma, aitete'e ka duak sila-la, fo matu'dun neu leoina ndia.

²¹Boema mafa'das mae Au, MANETUALAIN Fo Mademaina, neukose aloo falik basa Au leoina lala'en-na, leme nusa-nusak fo nai bee, ala leo lai ndia. Neukose Au tao akabubuas, fo Au o falik-kasa leo sila nusan-na leu.

²²Neukose, Au taos da'di leoina esa nai dae ndia, fo nai letelepak Israel-la Neukose manek esa paletas, ma neukose ta heaba'en da'di leoina dua, do nusak dua so'on.

²³Neukose, ala ta tao langgenggeo seluk aoinan-nala, nenik ala tao sala-singok, ma sene-do'ok neu sosongo-tatangok fo, nanamaluak ndia so'on. Neukose, Au soi-po'is leme mamanak fo ala tao sala-singok-ka mai, nalosa ala mulai lalelesi Au. Neukose Au tao alalaos, fo ala da'di Au anang, ma Au da'di sila Manetualain.

²⁴ Neukose ala da'di esa nai manek esa paletan-na dae, sama leo Mane Dauk-ka, fo ana paleta losa dodoon-na. Neukose, ala tunga Au hoholo-lalaneng no lilinekak. Sila, boema sila tititi-nonosin-nala, neukose ala leo dae ndia, dae fo Au fen neu Yakob, ma sila bei-ba'i kain-nala leon losa dodoon-na.

²⁶Neukose, Au tao hehelu-balataa mole-dame o sila, fo neukose ndia da'di hehelu-balataa manaketu basa tak no sila. Neukose, Au fes baba'e-papalak, ma Au fes boetai lamade'u. Neukose, Au afofo'a Au Umang-nga neu sila daen dale, fo nahele neme ndia, losa dodoon-na.

²⁷ Neukose, Au leo sama-sama os, fo Au da'di sila Manetualain, ma sila da'di Au anang.

²⁸Metema, Au Umang-nga nai sila tala'da heon losa dodoon-na, soona besak-ka leoina fe'ek-kala bubuluk, lae Au MANETUALAIN, hele basa Israel da'di Au anang mesang so.”