Read Termanu YESKIAL 43 Bible Online

YESKIAL 43 - Termanu bible

YESKIAL 43

¹Basa boema, touk ndia noo au leo lelesuina fo, nasale leo dulu neu,

² de nai ndia nde, au ita managale'do-ka, nangale'do neme dulu mai, fo ta'du-tana la'eneu Israel Manetualain mamain-na. Manetualain halan-na, nananamanenek sama leo tasi maloaina nangguu, ma daebafak-ka mangale'dok, nanahu Manetualain mangale'don-na.

³Ninitak ndia, sama leo au itan nai lelek, Manetualain mai tao nakalulutuk Yerusalem-ma, ma sama leo au itan neme Lee Kebar-ra. Boema au bala u dae, de au sene-do'ok.

⁴Mangale'dok ndia, nakababale tunga lelesuina dulu, boema neu leo MANETUALAIN Uman dale neu.

⁵MANETUALAIN Duladalen-na, ana so'u-na au, de noo au leo uma so'dan manai dalek-ka neu; nai ndia, au ita Manetualain mandela-masa'an, poti-na MANETUALAIN Uman-na.

⁶Lelek touk ndia bei napadeik nai au boboang-nga, au amanene MANETUALAIN nafa'da au, neme MANETUALAIN Uman dale mai, nae,

⁷“Hai hataholi daebafak fo, manasapu-manalalok-konei, Au kandela maneng-nga nde ia. Neukose Au leo nai ia, fo nai hataholi Israel-la tala'da heon, fo Au paletas losa dodoon-na. Nau sila, do sila manen-nala boe, neukose ala ta tao langgenggeo seluk Au na'de malalao-malalafung-nga, nenik sene-do'ok neu sosongo-tatangok, do nenik latoi-latono sila manen-nala popolan-na, nai mamanak ia.

⁸Makahulun-na, sila manen-nala tao lelesu dook, ma sila uma manen-na diin-nala, lai Au Umang-nga lelesu doon, ma diin-nala boboan-na, nalosa hapu ka'da papala esa nai tala'da. Ala tao langgenggeo basa Au na'de malalao-malalafung-nga, nenik sila tatao-nono'in fo, nanamaluak-ka. Hu ndia de, Au tao amate-amopos, nai Au nasa-melung dale.

⁹Tehu neme besak ia, sila muse hahae sene-do'ok neu sosongo-tatangok, ma ala pe'daheok sila manen-nala popolan-nala. Basa ndia soona, neukose Au leo nai sila tala'da heon, losa dodoon-na.”

¹⁰Boema MANETUALAIN nafa'da seluk nae, “Hai hataholi daebafak fo, manasapu-manalalok-konei, mafa'da hataholi Israel-la, la'eneu Au Umang ia, ma madenus fo, ala mete matalolole uma ia tao taon leo beek. Taom-malas ala mae, nanahu basa sila sala-singon lala'en-na.

¹¹Ma lelek ala mae basa, nanahu sila tatao-nono'in-nala soona, mafa'da mangalele'dos, Au Umang ia tao taon leo beek: uma matak leo beek-ka, lelesu masok, ma lelesu kalua-na leo beek, uma-la lakananatok tao leo beek, basa nakanenetek ma hoholo-lalanen lala'en-na. Sulak fes basa sila-la, fo ela ala mete, ma ala taoafik neu ito-ato basa hata lala'en-na, eno-dalan leo beek, boema ala tunga basa nakaneneten-nala.

¹²Nakeketuk la'eneu MANETUALAIN Uman-na nde ia: Basa mamanak manai letek ndia poin-na lala'en-na, nde been-na malalao-malalafuk.”

¹³ Mei tutunu-hohotuk-ka, uuku-dodoun nde ia, tunga uuku-dodouk fo nanapakek soaneu uku-dou MANETUALAIN Uman-na. Oelolok esa, ana okofefeo-na mei tunu-hotuk-ka ein-na. Oelolok ndia, deman-na senti limahulu, loan-na, senti limahulu boe, su'udoon manai deak-ka, deman-na senti duahulu lima.

¹⁴Neme oelolok-ka losa oeloloanak manai mei tunu-hotuk-ka dae, dedeman-na, metel esa. Tala'dan-na, dedeman-na, metel dua, ma makabi'ak-ka, nana ka'da senti limahulu neme oeloloanak fo, manaokofefeon-na mei tunu-hotuk-ka ein-na. Baba'e ka telu-a, fo nde mei tunu-hotuk-ka poin-na, boeo senti limahulu, fo makabi'ak-ka, neme tala'dan-na mai.

¹⁵Baba'e ka telu ia nde, mamana tunu tutunu-hohotuk; deman-na, metel dua. Bu'un haas, lamadema, de sama leo bana susulak-ka.

¹⁶Mei tutunu-hohotuk ndia poin-na, balakak; boboak esa soona, nalun-na, metel nee.

¹⁷Tala'dan-na boeo, balakak; boboak esa soona, nalun-na, metel hitu, no su'udook esa, nai su'udoon deak, fo deman-na, senti duahulu lima. (Oelolok-ka loloan-na, senti limahulu.) Nai su'udoon dulu, hapu e'dahuuk leo mei tunu-hotuk-ka poin-na neu.

¹⁸ MANETUALAIN Fo Mademaina, nafa'da au nae, “Hai hataholi daebafak fo, manasapu-manalalok-konei, mamanene hata fo, Au afa'dan neu o. Metema, tao basa mei tunu-hotuk ndia soona, o muse makateman, nenik tunu tutunu-hohotuk neu lain, ma pisin nenik bana tutunu-hohotuk daan-na.

¹⁹Ka'da imam fo, leme Zadok neme leo Lewi-a, tititi-nonosin, nde bole mai leo Au matang mai, fo ala tao mamasok. Au, MANETUALAIN Fo Mademaina, nde fe paleta ndia. Fes sapi maneanak esa, soaneu tutunu-hohotuk fo, sala-singok hapu do'o do ampon.

²⁰Ho'i-ma daan faa anak, fo losen neu bana susulak manai mei tunu-hotuk-ka bu'u ka haan sila-la, boeo neu bu'u-bu'uk manai tala'dan-na, boema lose okofefeok neu, mei tunu-hotuk ndia, su'udoon-na. No enok ndia nde, o tao malalao-malalafu mei tunu-hotuk ndia, ma nanafe hehelik ba'eneu Au.

²¹Basa soona, ho'i-ma sapi mane fo, soaneu sala-singok hapu do'o do ampon ndia, fo tunun nai mamanak fo nananaketu basak so, fo nde nai MANETUALAIN Uman-na, mamana malalao-malalafun-na, deak.

²²Balahaa soona, o muse tunu-hotu bi'ihii mane esa, ta lu'u-la'ak, soaneu tutunu-hohotuk fo, sala-singok hapu do'o do ampon. Tao malalao-malalafu mei tunu-hotuk ndia, nenik bi'ihiik ndia daan-na, sama leo o taon nenik sapi maneanak ndia.

²³Metema, o tao basan soona, ho'i-ma sapi maneanak esa, ma bi'ihii maneanak esa, tehu bana ka duak sila-la, ta lu'u-la'ak-kala fa,

²⁴fo menis leo Au mai. Basa imam-mala, muse nggali masik neu bana ka duak sila-la, fo tunun da'di tutunu-hohotuk ba'eneu Au.

²⁵Nai faik hitu dalen-na, tunga faik, o muse tunu-hotu bi'ihiik esa, sapi maneanak, ma bi'ihii mane, soaneu tutunu-hohotuk fo, sala-singok hapu do'o do ampon. Bana sila-la, ta bole lu'u-la'ak-kala fa.

²⁶Imam-mala, muse ala tao feta soaneu nakatema mei tunu-hotuk ndia, faik hitu dalen-na, ma ala sadia basa hata fo, bisa paken.

²⁷Basa fai ka hituk sila-la soona, imam-mala muse mulai fe tutunu-hohotuk, nai mei tunu-hotuk ndia lain, tutunu-hohotu nanatunuk, ma tutunu-hohotu mole-dame soaneu laun-nala. Soona neukose, Au sue-lai emi basa-basam-mala. Au, MANETUALAIN Fo Mademaina, nde manakokolak-ka.”