Read Termanu YESKIAL 46 Bible Online

YESKIAL 46 - Termanu bible

YESKIAL 46

¹MANETUALAIN Fo Mademaina, nafa'da nae, “Lelesuina dulu, fo nasale leo uma so'dan manai dalek-ka neu, muse nanakena nahelek, nai faik nee dalek. Lelesuina ndia, bole nanasoik ka'da nai fai Sabat-ta, ma Feta Bula Beuk-ka.

²Nai faik sila-la dalek, manapaleta muse masok neme uma so'dan manai deak-ka, fo ana tunga kama matua dale, boema napadeik nai dii lelesuina boboan-na, fo imam-mala tunu-hotu manapaleta tutunu-hohotu nanatunun-na, ma tutunu-hohotu mole-damen-nala. Ana sanga la'o soona, muse ana sene-do'ok neu MANETUALAIN nai lelesuina ndia bafan-na. Basa soona, ta bole kena lelesuina ndia, losa le'odae fa.

³Tunga-tunga fai Sabat-ta, ma Feta Bula Beuk-ka, basa laun-nala lala'en-na, muse sene-do'ok neu MANETUALAIN, nai lelesuina ndia, bafan-na boe.

⁴Nai fai Sabat-ta, manapaleta muse tunu-hotu, bi'ilopoana nee, ma bi'ilopo mane esa, basa-basas ta lu'u-la'ak fa, da'di leo tutunu-hohotu nanatunuk, ba'eneu MANETUALAIN.

⁵Sama-sama no bi'ilopo mane ndia, boe muse tunu-hotu gandum litel sanahulu hitu seselik, ma sama-sama no bi'ilopo ana sila-la esa soona, muse tunu-hotu tutunu-hohotu gandum, tunga manatunu-hotuk ndia, dale hihiin-na. Basa tutunu-hohotu gandum-mala, muse sama-sama no tutunu-hohotu mina setun litel telu.

⁶Feta Bula Beuk-ka, tutunu-hohotun muse nalupa, sapi mane esa, bi'ilopoana nee, ma bi'ilopo mane esa, fo basa-basas, ta lu'u-la'ak-kala fa.

⁷Ana muse tunu-hotu gandum litel sanahulu hitu seselik, sama-sama no sapi mane esa ma bi'ihii mane esa, ma ana muse tunu-hotu gandum, tunga manatunu-hotuk ndia, dale hihiin-na, sama-sama no bi'ilopoana esa. Basa tutunu-hohotu gandum-mala, muse sama-sama no tutunu-hohotu mina setun, litel telu.

⁸Metema manapaleta, ana sanga sene-do'ok nai Au Umang soona, ana muse masok tunga kama matua dale, ma ana fali soona, ana tunga enok ndia boe.

⁹Nasafalin-na, metema nai fai matua, fo laun-na mai sene-do'ok neu MANETUALAIN, soona sila nde masok tunga lelesuina kii, ma ala sene-do'ok basa, fo ala fali soona, muse ala tunga lelesuina kona. Ma sila fo, manamasok tunga lelesuina kona, ala fali soona, muse ala tunga lelesuina kii. Hataholi-la hapu kekena-kaka'ik fo, ala boso fali tunga enok fo, nai lelek ala masok-ka; ala muse fali tunga lelesuina manai selik-ka.

¹⁰Manapaleta, ana muse masok sama-sama no laun-na, leo MANETUALAIN Uman neu, ma ala fali boeo, muse ala sama-sama.

¹¹Nai fai feta do fai malole boe, muse tunu-hotu sapi mane, ma bi'ilopo mane, sama-sama no gandum litel sanahulu hitu seselik, ma bi'ilopoana-na, tunu-hotus sama-sama no gandum, tunga manatunu-hotuk ndia, dale hihiin-na. Basa tutunu-hohotu gandum-mala, muse sama-sama tutunu-hohotu mina setun, litel telu.

¹²Metema manapaleta, nahiik fe MANETUALAIN tutunu-hohotuk tunga ndia dale hihii mesan-na, nau nalupa tutunu-hohotu nanatunuk, do tutunu-hohotu mole-dame boe, soona muse soi fen, lelesuina dulu, fo leo uma so'dan manai dalek-ka neu. Ndia muse tunu-hotu tutunu-hohotuk sila-la, sama leo ana tunu-hotun nai fai Sabat-ta, tehu ana fali soona, no lai-laik, muse kena seluk lelesuina ndia.”

¹³MANETUALAIN nafa'da nae, “Tunga-tunga fafain-na, muse tunu-hotu bi'ilopoana esa, teun esa, fo ta lu'u-la'ak fa, da'di leo tutunu-hohotu nanatunuk, ba'eneu MANETUALAIN.

¹⁴Fe'ek neme ndia mai, tunga-tunga fafain-na, muse tunu-hotu gandum kilo dua boe, ma sese'dok-kana no mina setun kilo esa. Ndia nde tutunu-hohotu gandum fo, muse tunga faik, tunu-hotu fen MANETUALAIN; pake nakanenetek ndia, losa dodoon-na.

¹⁵Tunga-tunga fafain-na, muse tunu-hotu tataas esa fe MANETUALAIN: bi'ilopoana esa, gandum ma mina setun.”

¹⁶MANETUALAIN Fo Mademaina, Ana fe paleta nae, “Metema manapaleta, ana fe dae pusaka-na seli leo anamanen-na neu soona, dae ndia, ana da'di anamanen-na pusakan, de dae ndia nalupa teidalen-nala hata-heton.

¹⁷ Tehu metema, manapaleta ndia, ana fe dae pusakan-na seli leo atan-na neu soona, neu Teuk Fo Fe Falik-ka te, neukose dae ndia, ana fali leo manapaleta ndia neu seluk. Dae ndia nde been-na, ka'da manapaleta ndia no anamanen-na, nde lanuu dae ndia losa dodoon-na.

¹⁸Manapaleta ndia, ta bole ho'i-na laun-na, daen faa anak boen. Ana bole fe ndia daen-na, leo anamanen-nala neu, fo ela Au anang-ngala, esa boen, ta bole pasi neme pusakan-na mai fa.”

¹⁹Basa boema, touk ndia noo au tunga lelesu manai lelesuina boboan-na, de ami meu leo kama-kama malalao-malalafuk fo, lasale leo kii neu. Kama-kama sila-la, nanasadiak soaneu basa imam-mala Touk ndia, natu'du leo kama manai pe'dak muli neu,

²⁰de nafa'da nae, “Nai mamanak ia, basa imam-mala muse nasu tutunu-hohotuk fo, sala-singok hapu do'o do ampon, ma tutunu-hohotuk fo bae huta-bu'uk-ka, boema ala dala tutunu-hohotu gandum-mala, fo ela boso leni tutunu-hohotuk fo, malalao-malalafuk ndia, faa anak boen, leo uma so'dan manai deak-ka neu, fo boso neni soe fe laun-na.”

²¹Basa boema, noo au leo uma so'dan manai deak-ka neu, de natu'du au, nae nai uma so'dak ndia bu'un haas, esa soona, hapu uma so'da anak seluk bai, nalun-na, metel duahulu, ma loan-na, metel sanahulu lima.

²³Uma so'dak sila-la, nanapa'a okofefeok nenik papala batu nanadamak, fo la'o-la lai papala batu nanadamak sila-la lain.

²⁴Touk ndia, nafa'da au nae, “Malalau-maoono nai MANETUALAIN Uman-na, la'onala nde ia, fo ala nasu laun-na tutunu-hohotu mole-damen nai ndia.”