Read Termanu YESKIAL 47 Bible Online

YESKIAL 47 - Termanu bible

YESKIAL 47

¹ Touk ndia, no falik au leo lelesu masok leo, MANETUALAIN Uman neu. Au ita oe-a, ana faa neme lelesu ndia dae mai, de ana faa leo dulu neu, sama leo MANETUALAIN Uman-na boeo, nasale leo dulu neu boe. Oe ndia, ana faa neme MANETUALAIN Uman-na, lelesu doon manai boboan kona mai, de ana tunga mei tunu-hotuk-ka, su'udoon kona.

²Basa boema, touk ndia, noo au kalua tunga lelesuina kii, boema ana ho'u-na au limang-nga, de ana hela au leo lelesuina dulu neu. Leeanak ndia, ana faa neme lelesuina ndia, su'udoon kona mai.

³Touk ndia, ana uku nenik ai uukun-na, basa boema noo au tunga lee ndia faa-faan-na leo dulu neu, dodoon-na metel natun lima, boema nadenu au lena leo selik u. Nai mamanak fo lena tunga ndia, oen-na ka'da losa au ei bu'ung-nga.

⁴Basa boema, ana uku-na, metel natun lima seluk, de nai mamanak ndia, oen-na losa au lungulangang-nga. Ana uku-na, metel natun lima seluk bai, de oen-na losa au tala'dang-nga.

⁵Ana uku-na metel natun lima la'i esa seluk, de nai ndia, oen-na deman-na seli, de hataholi manala'o eik ta tunga ndia fa. Metema, hataholi sanga neu leo selik neu soona, muse ana suik.

⁶Boema hataholi ndia nafa'da au nae, “Hai hataholi daebafak fo, manasapu-manalalok konei, Taoafik matalolole neu basa ia-la.” Basa boema, noo au fali tunga lee ndia,

⁷de au ita, ai makadotok nanseli, lai lee ndia su'un duas.

⁸Boema nafa'da au nae, “Lee ia, ana faa tunga nusak ia leo dulu neu, fo ana tunga Lee Yarden-na Doken-na, fo nakandoo leo Tasi Mates-sa neu.

⁹Lee ia, ana faa leo bee neu boe, hapu i'ak mata-matak-kala, ma bana fe'ek-kala lai ndia boe. Lee ndia oen-na, ana tao-na Tasi Mates-sa oen-na, da'di mamin, ma lee ndia oen-na, ana faa su'di leo bee neu boe, neukose hapu maso'dak-ka nai ndia.

¹⁰Hataholi manadolu-dala, ala ho'i sila dalan-nala, leme oemata manai En-Gedi-a su'un-na, losa oemata manai En-Eglaim-ma, su'un-na. Basa i'ak mata-matak lala'en-na, lai oe ndia dalek, sama leo nai Tasi Tala'dak-ka dalek boe.

¹¹Tehu puuk ma dano manandolo tasi su'uk ndia oen-nala, neukose ala ta da'di oe mamis fa, te ala da'di oemasik lahele.

¹² Basa ai maboa mata-matak lala'en-na, lai ndolo-ndolo lee ndia su'un duas. Ai sila-la doon-na, ala ta male lita fa, ma ta basa boan-nala fa. Ai sila-la, neukose labuna-laboa ai boa beuk tunga bulak, nana lee ndia oen-na, ana faa neme MANETUALAIN Uman-na mai. Ai sila-la boan-nala, ala da'di nana'ak, ma doon-nala, ala da'di mo'do-akidok.”

¹³MANETUALAIN Fo Mademaina, nafa'da nae, “Dae fo neukose, nanaba'ek neu leo Israel ka sanahulu duak-kala, too-lanen nde ia. Leo Yusuf-fa, sipo baba'ek dua.

¹⁴Au soo basa, ae neukose Au fe dae ndia, neu o bei-ba'i kaim. Hu ndia de, muse baba'e dae ndia neu emi hataholim-mala, fo ala hapu beke baba'uk.

¹⁵Dae too manai boboak kii, ana mulain neme Tasi Tala'dak leo dulu neu, fo ana losa kota Hetlon-na, soona ana leo Hamat neu, fo nakandoo leo kota Zedad-ta neu,

¹⁶fo ana leo Berota ma Sibraim neu, (kota sila-la lai kota Damsyik-ka no kota Hamat-ta tala'da), basa soona, ana leo kota Hazar-Enan-na, fo nai kota Hauran-na, dae toon-na.

¹⁷Da'di, dae too kii, ana mulain neme Tasi Tala'dak, losa leo dulu neu, fo leo kota Hazar-Enan-na neu; boema dae Damsyik-ka no Hamat, lai dae too ndia, boboan kii.

¹⁸Dae too manai boboak dulu leo kona neu, fo neme mamanak esa nai dae Damsyik-ka no dae Hauram tala'da. Da'di, Lee Yarden-na nalupa dae too no dae Israel-la nai boboak muli, ma Gilead nai boboak dulu, losa leo Tamar neu, fo nai Tasi Mates-sa su'un-na.

¹⁹Dae too manai boboak kona, ana leo muli kiik neu, fo neme Tamar leo oemata Kades-Meriba neu, boema ana leo muli konak neu, fo ana ndolo Masir dae toon-na, fo ana losa Tasi Tala'dak.

²⁰Dae too manai boboak muli, ana okofeo-na Tasi Tala'dak, boema ana leo kii neu, fo leo mamanak esa nai eno masok leo Hamat neu-a, boboan muli.

²¹Baba'e dae ndia neu emi, tunga leo-leo Israel-la;

²²de dae ndia, ana da'di emi pusakam, losa dodoon-na. Hataholi nusa dea fo, ala leo lahele lai emi tala'da heom, boema ala bongi anan-nala lai mamanak ndia, de sila boeo, muse hapu baba'ek neme dae ndia mai. Muse taos da'di leo, leoina Israel matetuk, fo sila boeo tunga tu-u batu, soaneu ala hapu dae, nai lelek dae ndia, nanababa'ek neu leo-leo Israel-la.

²³Da'di metema, hataholi nusa dea-la, ala leo lai, leo Israel esa tala'da heon soona, ba'e fen dae pusaka, nai mamanak ndia boe. Au, MANETUALAIN Fo Mademaina, nde manakokolak-ka.”