Read Termanu YESKIAL 5 Bible Online

YESKIAL 5 - Termanu bible

YESKIAL 5

¹MANETUALAIN nafa'da nae, “Hai, hataholi daebafak fo, manasapu-manalalok-konei, ho'i-ma tafaina matane esa, fo nggeuheni o nggolomeim-ma, ma o langadoom-ma. Basa soona, tai langadook ndia neu tatais-sa, fo ba'en neu baba'ek telu.

²Metema, musu-a hahae nakahapi-na kota ndia soona, o muse hotuheni langadook ndia, baba'ek esa nai kota ndia tala'daheon. Ho'i-ma o tafainam-ma, fo muse tete'te baba'ek esa okofefeok kota ndia. Ma o muse nggali baba'e mate'ek-ka leo lalai neu, fo Au usin nenik Au tafainang-nga.

³Ho'i ela langadook ndia faa anak, fo potin leo o ba'du manalum-ma, didikun dale neu.

⁴Basa soona, tapa seluk langadook ndia faa anak leo ha'i dale neu, fo ha'i na'ahenin. Neukose ha'i-a, sii lapa-lapa leo basa leoina Israel-la lala'en-na neu.”

⁵MANETUALAIN Fo Mademaina, nafa'da nae, “Mete te, ia nde been-na Yerusalem. Au pe'da kota ia nai daebafak-ka usen-na, boema nusaina fe'ek-kala, lai boboa-kaisun.

⁶Tehu, Yerusalem ta sipok Au paletang-nga fa, te se'kona ndia mangalaun-na lenaheni leoina fe'ek-kala, lena-lenak langabatun-na lenaheni basa nusaina manai boboa-kaisun-na. Yerusalem la'olena Au paletang-ngala, ma ana ta nau tunga Au hoholo-lalaneng fa.”

⁷MANETUALAIN Fo Mademaina, nafa'da nae, “Hai, Yerusalem, mamanene leona! Te o ta tunga Au paletang-ngala ma Au hoholo-lalaneng fa; o malenalanga-masabasoom-ma, lenaheni leoina manai o boboa-kaisum-ma, de o tunga leoina sila-la ha'dan-na.

⁸Hu ndia de, Au, MANETUALAIN Fo Mademaina, afa'da ae o musum-ma nde been-na, nde Au. Neukose, Au huku o nai leoina fe'ek-kala matan.

⁹Hu kande, Au ta hii o tatao-nono'i mangalaum lala'en-na fa, de neukose, Au huku o laum-mala nenik huhuku mabela, fo Au beita tao ita fan, ma neukose Au ta taon so'ok.

¹⁰ Nekose hataholi lasik-kala, la'a seluk ana bongin-nala, ma anan-nala la'a seluk ina-aman. Neukose, Au hukus leondiak, ma Au tao tapasasala laun fo, bei maso'dak-kala, leo basa daebafak-ka bu'un-nala leu.

¹¹Au nde been-na, Manetualain fo maso'dak, MANETUALAIN Fo Mademaina, de Au dede'a-kokolang nde ia: Hu kande, o tao manggenggeo Au Umang-nga, nenik o tatao-nono'i mangalaum ma nanamaluak-ka, de neukose Au tao akalulutuk o, no ta fe ampon neu o fa.

¹²Metema, ba'e o laum-ma neu baba'ek telu soona, Au taoisa baba'ek esa, nanahu he'di-laus ma la'a-ndoes-sa da'di nai kota dale. Baba'ek esa, nanado'do nisak nai kota deak, ma neukose Au nggenggela-ngganggali baba'ek esa seluk, leo basa daebafak-ka bu'un-nala leu, ma neukose Au usis tataas esa nenik tafaina.

¹³Neukose o mame'da mita, Au nasa-melung ma Au fefepa-lili'u matuainang-nga, losa Au daleng-nga tesa-tama. Basa sila-la ala da'di soona, neukose o mamahele mae Au, MANETUALAIN kokolak o o so, nanahu Au amanasa o ta lilineka fa.

¹⁴Neukose, o da'di ai-batu manatapasasalak, ma leoina manai o boboa-kaisum-mala, neukose ala hakinonoli o; neukose basa hataholi manala'ok tunga ndia, ladook aoinan-nala neme o mai.

¹⁵Metema, Au amanasa o, ma Au huku o soona, basa leoina manai o boboa-kaisum-ma, lame'da bibii-namata'uk nanseli. Neukose, ala hakinonoli o, ma ala pela-malua mete o.

¹⁶Neukose, Au tao akalulutuk o mamana pepe'da nana'am-ma, ma Au po'ilotak o laum-ma, lamala'a-lamandoe. Neukose, ala la'ola'di la'a-ndoes, makee-makahe'dun, sama leo kokouisi matane, fo ana tola o, ma ana tao namate-namopo o.

¹⁷ Fe'ek neme susa-soe la'a-ndoes-sa mai, neukose Au fe la'a-ndoes, tatao-nono'ik fo ta nalelak susue-lalaik-ka, natee-natatik soaneu taonisa o laum-mala, ma bana makaa-makisuk soaneu taonisa anan-nala. Au, fo MANETUALAIN, nde manakokolak-ka.”