Read Termanu YESKIAL 6 Bible Online

YESKIAL 6 - Termanu bible

YESKIAL 6

¹MANETUALAIN nafa'da au nae,

²“Hai, hataholi daebafak fo, manasapu-manalalok-konei, makanae leo Israel leten-nala neu, fo manduku-malosak Au hala hehelung fo, la'eneu sila huhukun-na.

³Madenus, fo lamanene ma ala taoafik neu hata fo Au, MANETUALAIN Fo Mademaina, nafa'dan neu letek sila-la, neu pupukuk-kala, bafak-kala, ma bafak-kala boe. Tete'ek-ka, neukose Au haitua tafaina ne'i, fo ana tao nakalulutuk mamana sosongo-tatangok-kala.

⁴Neukose, ana tao nakalulutuk mei tunu-hotun-nala, ma ana tao naba'e mamana tutunu boomenin-nala. Neukose, ana taonisa basa hataholi manai sila-la, nai sosongon-tatangon-nala matan.

⁵Neukose, Au tao-ala hataholi Israel-la popolan-nala lalefu-le'ak; ma neukose Au nggenge-la duin-nala neu mei tunu-hotuk sila-la, boboa-kaisun.

⁶Basa kota Israel-la, neukose nanatao nakalulutuk, ma basa mei tunu-hotun-nala ma sosongo-tatangon-nala lakalulutu, mamana tutunu boomenin-nala heaba'es, fo besenggela-besenggali, ma sila lima tataan lala'en-na, neukose mopos.

⁷Nai mamanak lala'en-na, hapu hataholi nanataonisak nai ndia, soona hataholi bei maso'dak-kala, neukose ala bubuluk, lae Au nde MANETUALAIN-na.

⁸Neukose, Au fe sila lumanak, lala kanisak ndia deak, tehu neukose sila nanatao tapasasalak nai leoina-la tala'da;

⁹nai naa, ala laso'da nai mamana tu'u-tapak dalek. Boema, neukose ala lafandele neu Au, boema ala bubuluk, lae Au huku sila, ma Au akamumulu-akamamaek sila, nana sila dalen-nala, ta lilineka loo Au fa. Ala la'oela Au, de ala hele sosongo-tatangok-ka nggati Au so. Boema, neukose ala malua seluk aoinan-nala, nanahu basa tatao-nono'i mangalaun lala'en-na, ma tatao-nono'i ta kandaan-nala fa.

¹⁰Soona neukose, ala bubuluk, lae Au nde MANETUALAIN-na, ma lae Au fe sila nasanene'dak-kala, ta nasanene'da bafalouk fa.”

¹¹MANETUALAIN Fo Mademaina, nafa'da nae, “Totoko limam-ma, ma henak o eim-ma dae lain, fo maloo mae: Manea! Te hu kande leoina Israel-la. Tatao-nono'i ta kandaan-nala, ma tatao-nono'i mangalaun lala'en-na, de neukose ala bala leu dae fo mates, nanahu tafaina, la'a-ndoes-sa, ma he'di-laus-sa.

¹²Neukose, sila basa-basas lame'da lita Au nasa-melung nininin-na. Hataholi manai mamana dook-kala, fonde mamana tu'u-tapak, neukose ala tu'u he'dis, boema mates; hataholi manadekak-kala, neukose ala mate nai natee-natatik dale, ma bei elak-kala, neukose mates hu kande la'a-ndoes-sa.

¹³Neukose hataholi manamatek-kala, lalefu-le'ak lai sosongo-tatangok-kala tala'da, ma lai mei tunu-hotuk-kala boboa-kaisun, beelenga basa pupukuk mademaina-la poin-na, ma lai basa letek-kala poin-na, lai ai doo manaleloakak-kala huun-na, ma lai basa ai matuaina-la huun-na; dede'a keke'un-na, su'di nai mamanak bee, fo ala tunu tutunu-hohotuk fe sila sosongo-tatangon soona, hapu mamates nai ndia. Soona besak-ka basa hataholi-la, ala bubuluk lae Au nde MANETUALAIN-na.

¹⁴Hei, neukose Au so'uk au limang-nga, fo Au tao akalulutuk sila nusan-na, mulai neme Mook Solokaek Kona, losa kota Ribla nai kii. Nai hataholi Israel-la mamana leleon-nala, neukose ta hapu hataholi maso'dak esa boen. Soona besak-ka basa hataholi-la, ala bubuluk lae Au nde MANETUALAIN-na.”