Read Termanu YESKIAL 7 Bible Online

YESKIAL 7 - Termanu bible

YESKIAL 7

¹MANETUALAIN kokolak no au nae,

²“Hai, hataholi daebafak fo, manasapu-lalok-konei, Au, MANETUALAIN Fo Mademaina, sanga afa'da dede'ak-ka nde ia la'e dae Israel-la: Tutuik ia nde been-na, tutuik la'eneu nusak ia, mate'en-na!”

³MANETUALAIN nafa'da nae, “Hai Israel, besak ia, o fai mate'em-ma, ana losa so. Au aketu-ala'di o, nandaa no o tatao-nono'i ta kandaam-ma fa.

⁴Neukose, Au daleng-nga ta tu'da kasian neu o, do fe do'o do ampon neu o fa. Neukose Au huku o, nandaa no o tao tatao-nono'i ta kandaak lalaena. Soona besak-ka, o bubuluk mae Au nde MANETUALAIN-na.”

⁵MANETUALAIN Fo Mademaina, nafa'da leoina Israel-la, dede'ak-ka nde ia, “Neukose soe esa basa soona, soe esa mai, fo ana tuni-ndeni-na emi.

⁶Besak ia, basa hata lala'en-na, nate'e so. De o fai mate'em-ma nde ia. Ta hapu namahehenak seluk, ba'eneu o so'on.

⁷Basa hata lala'en-na, nate'e ba'eneu o, hai leoina fo, manaleo nai dae ia dalek-ka. Besak ia, ta hapu seluk feta nai mei tunu-hotu letelepak-kala, te hapu ka'da tasi'bu mesak-kana.

⁸Ta dook-ka so'on te, neukose emi mame'da mita, Au nasa-melung fo manalua ponu-ponung-nga. Au aketu-ala'di emi, nandaa no emi tatao-nono'im. Neukose, Au balas emi tatao-nono'im fo, ta kandaak lala'en-na.

⁹Neukose, Au daleng-nga ta tu'da kasian neu emi, ma Au ta fe do'o do ampon neu emi fa. Neukose, Au huku emi, nandaa no emi tao, tatao-nono'i ta kandaak-kala. Soona besak-ka emi bubuluk, mae Au nde MANETUALAIN ma Au nde huku emi.”

¹⁰Fai susa-soe ba'eneu leoina Israel-la, ana losa so. Naseti-nalakak-ka, nai basa mamanak lala'en-na. Koao-ndaeaok-ka, popo-tama nakandoo.

¹¹Tatao-nono'ik fo ta nalelak susue-lalaik-ka, neni tatao-nono'i mangalauk makadotok. Basa sila su'i-beten, namatutua-namadedeman ma sila tetu-teman lala'en-na, neukose mopok-kasa.

¹²Le'do-fain, ana mai no lai-laik, fain-na ana deka so! Mana asa ma manamase'ok-ka, ala ta hapu nanalak hata esa boen, nanahu neukose Manetualain huhukun-na, la'e basa hataholi lala'en-na.

¹³Ta hapu manadangan fo, neukose ana hapu falik bua nase'on-na fa, nana Manetualain nasa-melun la'e su'di see-a. Hataholi mangalauk-ka, neukose ta naso'da fa.

¹⁴Pupuuk-ka nalii, fo basa hataholi-la laheheleao. Tehu ta hapu hataholi esa boen, neu leo natee-natatik dale neu, nana Manetualain nasa-melun, la'e basa hataholi lala'en-na.

¹⁵Natee-natatik-ka, nai enok-kala lain nai kota dale, ma he'di-laus-sa nai uma-la. Su'di see fo nai kota deak, neukose maten nai natee-natatik dale, ma manaleo nai kota dale-la, neukose maten, nanahu he'di-laus ma la'a-ndoes-sa.

¹⁶Neukose, nggelok laladeak, fo lalai leo letelepak-kala leu. Nai ndia, neukose sila sama leo manupui kuu fo, nanausihenik neme bafak-kala mai; neukose basa-basas hoo-nggu'u, nanahu sala-singon-nala.

¹⁷Hataholi lala'en-na, neukose liman-nala lakamate, ma lungulangan-nala makei.

¹⁸Neukose, ala pake si'di kalong, ma neukose basa aon-na lala'en-na, dele ngge'be-ngge'be. Neukose nggeu dilak langan-nala, ma lakamamaek-kasa.

¹⁹Neukose, ala tapaheni lilopila-lilofulan-nala leo enok lain neu, sama leo kadafuk-ka, nana nai faik fo, MANETUALAIN kalua nasa-melun te, lilopilas-lilofulak, ta hapu soi-nala sila fa, te ka'da nenis leo sala-singok-ka dalek neu. Ala ta mete lilopilas lilofulak sila-la, fo lakabete, do ala ko'dos leo tein-nala dalek leu fa.

²⁰Makahulun-na, dalen-nala lamatua neu sila poemata mana'a hiin-na, tehu ala ho'i-lan de, ala taon neu dodoki-dudula sosongo-tatangok nanamaluak-ka, de MANETUALAIN tao-na sila hata-heton sila-la, da'di hata esa fo, neni bibii-namata'u matuaina.

²¹MANETUALAIN nafa'da leoina Israel-la nae, “Neukose, Au po'ilotak hataholi nusa dea-la, ala bonga emi umam-mala. Hataholi mangalauk-kala neukose ala loso-la emi hata-hetom, fo ala tao langgenggeon.

²²Neukose, Au mete leo fe'ek neu, metema nakodaa sila-la, ala tao lalutu Au Umang-nga, ma ala tao langgenggeon.

²³Tasi'bu-a, ana da'di nai nusak-ka lala'en-na; nai mamanak lala'en-na, hapu kanisak ma tatao-nono'ik fo, ta lalelak susue-lalaik-ka fa.

²⁴Neukose, Au fe leoina nasa-melu mangalauk-kala mai, fo ala ho'i-la emi umam-mala. Emi hataholi palani tatibatum-mala, neukose ala dele bengge'be, metema Au po'ilotak leoina sila-la, ala tao lakalulutuk emi mamana huhule-haladoim-mala.

²⁵Dale he'dik-ka, ma ketu namahehenak-ka, tuni-ndeni nalas, boema ala sanga mole-dame-a, tehu ala ta hapu fan.

²⁶Susa-soe ma tutui-bebenga ta malole-la, ala mai tataas esa. Neukose, emi dokodoe, fo ela basa nabi-la, lafa'da ela emi, dede'a-kokolak, tehu ala ta bisa fa. Basa imam-mala, nanolin ta, soaneu lanoli salanik-kala, ma mopo mauli-malangan nanoli-nafa'dan so.

²⁷Neukose Manek-ka, ana kii-makaleleu, ma ketu maneana namahehenan-na, boema neukose laun-na, ana dele ngge'be-ngge'be no bibii-namatauk-ka. Neukose, Au huku emi nandaa no emi tatao-nono'im lala'en-na, ma Au aketu-ala'di emi, sama leo emi maketu-mala'di hataholi fe'ek. Soona besak-ka, emi bubuluk mae Au nde MANETUALAIN-na.”