Read Termanu DANIAL 10 Bible Online

DANIAL 10 - Termanu bible

DANIAL 10

¹Mane Koresh paleta Persia neu teu ka telun-na boema, hala heheluk esa nananafa'dak neu Danial fo nasi'a loken lae Beltsazar boe. Hala heheluk ndia tete'ek-ka, tehu tean-na seli soaneu lalelak sosoa-ndandaan. Lelek Danial sanga enok fo nalelak sosoa-ndandaan boema, ana sipo hala nafa'da mangale'dok esa la'eneu hala heheluk ndia sosoa-ndandaan nai ninitak esa dalek.

²Nai lelek ndia, au leo mesa-mesang-nga nai mamana nees esa, mamasok telu dalen-na.

³Nai lelek ndia, au ta u'a nana'a mala'da do paa boen; au ta inu angol ma au ta sau au langang-nga boen.

⁴Nai teuk ndia, fo nai hataholi Yahudi-la bula ka esan-na fain 24, au bei apadeik nai Lee Tigris matuaina ndia su'un-na.

⁵ Au anganalo boema, au ita hataholi esa bua papaken-na nanataok neme tema a'balutu, ma kalikeen-na neme lilopila isik-ka mai.

⁶Aon-na nangale'do sama leo poemata, mata-panan mangale'don-na sama leo ndela'sa mangale'don-na, ma matan-na pila lo'a-lo'a sama leo ha'i-a. Alun-na ma ein-na nangale'do sama leo liti nanalosek-ka, ma halan-na nene'nen soona sama leo hataholi makadotok halan-na.

⁷Ka'da au mesang-nga ita ninitak ndia. Hataholi fo sama-sama loo au-a, ta lita fan, tehu ala bii lanseli, nalosa lalai leu ke'ke.

⁸Ala la'oela au mesang-nga eme ndia, de au taoafik neu ninitak fo manatao nanggengek ndia. Mopo au balakaing-nga, ma au mata-panang fula.

⁹Lelek au amanene halan-na boema, au sapala'o losa au bala u dae lain.

¹⁰Basa boema, hapu limak esa koila'e au, de nafofo'a au no au asaka neu au limang-nga ma au lungulangang-nga.

¹¹Ata nusa so'dak ndia nafa'da au nae, “Danial, Manetualain sue-lai o. Fo'a fo mapadeik leona, fo nene'ne matalolole au hala kokolang ia. Au ia nananadenu basak fo mai leo o mai.” Lelek au amanene dede'ak ndia boema, au fo'a no au delengge'be-ngge'be.

¹²Boema nafa'da au nae, “Danial, boso bii. Manetualain namanene o huhule-haladoim neme faik makasososan fo o ho'i nakeketuk soaneu o makaloe-makadae o aom-ma, fo ela o da'di manatee-tenok. Au mai da'dileo natataak neu o huhule-haladoim.

¹³ Ata nusa so'dak manamasulu-mahapa nusa Persia, la'ban au kilo duahulu esa dalen-na. Boema Mikhael, fo ata nusa so'dak-kala mauli-malangan-na, ana mai tulu-fali au. Au la'oelan neme naa, fo nai Persia.

¹⁴Au mai fo fe o malelak hata fo mahani te, neukose ana da'di neu o leoinam-ma. Ninitak ia la'eneu fai manamaik-ka.”

¹⁵Lelek nafa'da dede'ak ndia boema, au akatele ma au ta hapu kokolak so'on.

¹⁶Basa boema, ata nusa so'da fo nalupa hataholi daebafak ndia, ana look liman-na mai, de ana koila'e au difadoong-nga. Boema au afa'dan ae, “Tuan, ninitak ndia tao-na au to'a-sota anseli, nalosa mopo makandondook au be'i-balakaing.

¹⁷Au sama leo ata fo napadeik nai tuan-na matan. Tao leo bee fo au hapu kokolak o Tuan? Basa au balakaing-nga so, ma au hahaeng-nga nakase'e.”

¹⁸Boema ana koila'e au la'i esa seluk, boema au ame'da au balakaing-nga, ana popo-tama.

¹⁹Nafa'da nae, “Manetualain sue-lai o, hu ndia de, dalem-ma boso susa do bii mamata'u, ayo, da'di balakaik leona!” Lelek nafa'da dede'ak ndia boema, au ame'da au mabe'i-balakaik seluk so, de au afa'da ae, “Kokolak leona Tuan. Tuan popo-tama au be'i-balakaing so.”

²⁰Boema nataa nae, “Te o bubuluk, tao le'e de au mai leo o mai? Sosoan-na nae, soaneu au afa'da o, hata fo nanasulak nai Susula Ndoos dale. Besak ia, au muse fali fo au atee ata'ti la'ban ata nusa so'dak manamasulu-mahapa Persia. Basa ndia soona, ata nusa so'dak manamasulu-mahapa Yunani-a, neukose ana mai. Ta hapu hataholi esa boen tulu-fali au fa, te ka'da Mikhael, fo ata nusa so'dak manamasulu-mahapa Israel, fo o nusam-ma.