Read Termanu DANIAL 12 Bible Online

DANIAL 12 - Termanu bible

DANIAL 12

¹ Ata nusa so'dak fo manapake bua-lo'a a'balutu ndia, nafa'da seluk nae, “Nai faik ndia, neukose ata nusa so'da matuaina Mikhael fo manamasulu-mahapa o leoinam-ma, ana to'da mai. Basa boema, neukose hapu tepo-lelek to'a-sota matuaina nanseli nai lelek bei hapu leoina-la nai daebafak-ka. Tehu hataholi fo leme o leoinam-ma na'den-nala nanasulak nai Manetualain susulan dalek-ka, neukose nanasoi-tefak.

² Hataholi manamate basak sila-la ba'uk-ka, neukose laso'da falik; neukose nggelok hapu so'da manaketu basa taak-ka, ma neukose nggelok bai soona, nananakadadaek ma ala hapu toto'a-sosota matuaina fo manaketu basa taak-ka boe.

³Basa mauli-malangan manatee-tenok-kala, neukose landela-lasa'a sama leo lalai-a mangale'don-na. Ma ba'eneu sila fo lanoli hataholi makadotok soaneu tao-no'i hata malole, ndoos ma matetuk-ka, neukose landela-lasa'a sama leo nduuk-kala losa dodoon-na.”

⁴ Boema ata nusa so'dak ndia nafa'da seluk au nae, “Danial, tatana susulak ndia besak ia leona, ma tao segel neun, fo ela nanatatanak nahele losa tepo-lelek mate'ek-ka. Neukose hataholi ba'u ala so'ba palisak matalolole hata fo ana da'di. Tehu sosoa-ndandaan ta.”

⁵Basa boema, au ita touk 2. Esa napadeik nai lee selik ia, ma esa nai lee selik eli.

⁶Esak-ka natane manamapadeik deka no lee su'un-na nae, “Faihi'da manada'di matabeuk ia-la late'e?”

⁷ Hataholi ndia so'uk liman duas leo lalai neu. Au amanenen ana soo nenik Manetualain fo manaketu basa taak-ka na'den-na nae, “Manada'dik sila-la neukose ala da'di teuk telu seselik. Lelek ala hahae fepa-li'u Manetualain anan-nala soona, manada'di matabeuk sila late'e.”

⁸Memak au amanene nafa'da basa dede'ak sila-la, tehu au ta alelak sosoa-ndandaan fa. Boema au atanen ae, “Tuan, tao leo bee fo basa ia-la late'e?”

⁹Boema nata nae, “Besak ia, muu leon Danial, nana dede'ak ia-la muse nananafunik ma nanabibila-babaak losa tepo-lelek mate'ek-ka.

¹⁰ Neukose hataholi ba'uk-ka nanaso'bak ma nanatao neuisik. Sila fo manatao tatao-nono'i mangalauk-ka, neukose ta lalelak ma ala tao tatao-nono'i mangalauk lakandoo; ka'da sila fo manatee-tenok-kala nde neukose lalelak.

¹¹ Mulai neme hahae tutunu-hohotu fai-faik-ka, ma hata esa fo neni bibii namata'u matuaina, fo loken lae Mangalauk fo manatao nakalulutuk ndia, napadeik natetu soona, neukose seli faik 1.290.

¹²Maua-manalek neu sila fo lilineka lahele losa fai ka 1.335 ndia.

¹³O Danial, lilineka mahele losa mate'en-na. Neukose mate o, tehu neukose o maso'da falik soaneu sipo o ngga'dim-ma nai tepo-lelek mate'ek-ka.”