Read Termanu DANIAL 6 Bible Online

DANIAL 6 - Termanu bible

DANIAL 6

¹Ala taolisa basa Belsyazar boema, Darius hataholi Media ndia nangatuu-na Belsyazar kandela manen-na. Ndia te Darius teun 62.

²Darius ba'e nusan-na neu propensi 120, de propensi esa soona, gobelnol esa paleta.

³Ana so'u Danial no nonoo ka dua-nala da'di manamanea neu gobelnol sila-la, fo sue kande ala boso tao lakatutu'dak manek-ka.

⁴Tu'tik-ka no lai-laik, ala bubuluk se'kona Danial tatao-nono'in malole lena neme gobelnol-lala ma manamanea fe'e-fe'ek-kala mai. Hu ndia de, manek-ka nau so'un da'di manakoasa nai nusak-ka lala'en-na.

⁵Tehu basa gobelnol-lala loo manamanea-la sanga enok, fo ala sanga Danial salan-na nai nakalala'ok paletan-na dalek, tehu ala ta hapu salan-na fa, nanahu Danial lilineka ma ana tao tunga ndoon-na, boema ana ta pela-bale do ana tao salak hata esa boen.

⁶Boema lafa'da lae, “Ita hapu Danial salan-na nai ka'da dede'ak fo natutik no agaman-na.”

⁷Basa boema basa-basas leu leo manek-ka leu de lafa'da lae, “Ou Ama Manek Darius, so'dak ba'eneu Ama Manek losa dodoon-na!

⁸Ami basa-basam-mala nde ito-ato Ama Manek nusan-na, nau basa manamanea-la, basa gobelnol-lala, gobelnol-lala lima boakona-nala, ma manapaleta fe'ek-kala; ami-mala halak basa, fo ami meni ami halam-ma mai, fo ela Ama Manek kalua susula paleta, fo muse tungan no te'e-te'ek. Ela leo been-na, Ama Manek fe paleta, fo ela nai faik teluhulu dalen-na, boso fe hataholi esa boen loak, fo neni hala haladoin-na neu lamatua daebafak esa, do neu hataholi daebafak fa, te ka'da neni hala haladoin ndia neu Ama Manek mesak-kana. Ba'eneu see, fo ana la'olena paleta ndia soona, tapan leo singa lean dale neu.

⁹Ami dokodoe, fo ela Ama Manek limalee susula paleta ndia, fo ela ana da'di Media no Persia susula nakeketun, fo pake nahelen leona.”

¹⁰Boema Mane Darius-sa limalee susulak ndia.

¹¹Lelek Danial namanene dede'ak ndia boema, ana fali leo uman neu. Kaman-na nai ta'dak manai lain-na, fo jendelan-nala lasale leo Yerusalem neu. Ma sama-na leo mandoo fai-a, ana hule-haladoi neu Manetualain, ma faik esa soona, ana koa-kion la'i 3 nenik ana senek nai jendela nanasoik sila-la matan-na.

¹²Lelek Danial musun-nala lita Danial hule-haladoi neu ndia Manetualain-na boema,

¹³basa-basas leu leo manek-ka leu, fo ala kalaak Danial lae, “Ade, Ama Manek ta limalee basa susula paleta fo kena-ka'i basa hataholi-la, fo nai faik teluhulu dalen-na ia, boso leni sila dokodoen-nala neu lamatua daebafak esa, do neu hataholi daebafak, te ka'da leni sila hala haladoin ndia neu Ama Manek mesak-kana hetu? Ma boeo nae ba'eneu see, fo ana la'olena paleta ndia soona, tapan leo singa lean dale neu hetu?” Boema manek-ka nataa nae, “Memak tete'ek-ka, susula paleta ndia, ana da'di Media ma Persia susula nakeketun, fo pake nahelen leona.”

¹⁴Boema lafa'da manek-ka lae, “Danial fo hataholi nanafook esa neme Yehuda mai, ana ta paluu Ama Manek, ma ana ta taoafik neu Ama Manek paletan-na fa. Faik esa soona, ana hule-haladoi la'i 3.”

¹⁵Manek-ka namanene dede'ak ndia boema, dalen-na he'dis-sa ma ana bii, nalosa ana sanga enok, fo ana soi-tefa-na Danial. Le'donoso so, tehu manek-ka bei dudu'a-dodoo nahele dede'ak ndia.

¹⁶Basa boema, hataholi sila-la leu lafa'da manek-ka lae, “Ama Manek, ela leo been-na Ama Manek mafandendelek te, tunga Media ma Persia susula nakeketun-na, metema manek-ka kalua susula paleta soona, ta bisa ngati-nggati no fan.”

¹⁷Boema mate'en-na manek-ka fe paleta, fo ela leu ho'u-la Danial fo tapan leo singa lean dale neu. Manek-ka nafa'da Danial nae, “Ela leo been-na o Manetualaim fo o sene-do'ok-kana no lilinekak ndia, Ana soi-tefa-na o.”

¹⁸Basa ndia boema, ala tatana ketu leak ndia bafan-na nenik batu matuaina esa, ma manek-ka de'dek batu ndia, nenik nusak-ka dede'den-na, ma basa hataholi matua-madema-la dede'den-na, nalosa ta hapu hataholi esa boen, bisa po'i Danial neme singa sila-la mai fa

¹⁹Basa boema, manek-ka fali leo uma manek-ka neu. Ana ta nau na'a-ninu do kokoe-nanasi fan boe. Ma le'odaek ndia, ana ta bisa sungu fa.

²⁰Lolebalahak boema, manek-ka fo'a, de neu lai-lai leo singa-la lean-na neu.

²¹Ana losa naa boema, naloo no halan-na do'e-do'e nae, “Danial, fo Manetualain maso'dak-ka atan-na! Ade, o Manetualaim fo o sene-do'ok-kana no lilinekak-ka, napalani soi-tefa-na o neme singa sila-la mai so do?”

²²Boema namanene Danial hala natataan-na nae, “So'dak ba'eneu Ama Manek losa dodoon-na!

²³Atam-ma Manetualain-na haitua ata nusa so'dan-nala mai so, de ala ko'o ketu singa sila-la bafan-na, nalosa ala ta tao atam-ma le'e fa. Manetualain soi-tefa-na atam-ma, nana Ana bubuluk nae, atam-ma ta tao salak soaneun, ma soaneu Ama Manek fa.”

²⁴Manek-ka namahoko nanseli, de ana paleta fo kalua heni Danial neme leak ndia dalek mai. Lakalala'ok basa paleta ndia boema, ala mete te ta hapu hinak faa anak boen nai Danial aon-na fa, nanahu namahele neu ndia Manetualain-na.

²⁵Basa boema, manek-ka paleta hataholi, fo leu ho'u hataholi manakalaak Danial-la. Ala mai boema, ala ho'u-lalas de ala tapas loo anan-nala ma saoinan-nala, leo singa lean dale leu. Ala beita losa leak ndia buin-na boen te, singa sila-la kaa lalas, de ala hehengu-la duin-nala beelutu.

²⁶Basa ndia boema, mane Darius-sa haitua susulak leo hataholi maleme leoina ma dede'ak manai daebafak-ka lala'en-na nae, “So'da molek!

²⁷Au fe paleta neu basa hataholi manai au nusang-nga dalek, fo ela ala bii ma fe ha'da-holomata neu Manetualain fo Danial sene-do'ok-ka! Ndia nde been-na Manetualain fo maso'dak losa dodoon-na neu, Paletan-na manaketu basa tak. Tao leo bee-o, nusan-na ta mopo-mate fan. Koasan-na manaketu basa tak.

²⁸Ana soi-tefa ma Ana soi-po'i, Ana tao manada'di beuk ma dede'a matabeuk nau nai lalai do nai daebafak-ka boe. Ana soi-tefa-na Danial neme singa-la bafan-na mai so.”

²⁹Leondiak Danial hapu nagatutuu madema nahele nai Darius ma Koresh fo hataholi Persia ndia paletan-na dalek.