Read Termanu DANIAL 9 Bible Online

DANIAL 9 - Termanu bible

DANIAL 9

¹ Nai teu makasososak fo Ahasyweros anamanen Darius hataholi Media ndia, paleta nusa Babel-la boema, au Danial lees-lees agama susulan-nala. Au doo-doo ae, tunga MANETUALAIN dede'a-kokolan neu Nabi Yeremia soona, neukose kota Yerusalem-ma nakalulutuk nehele teuk hituhulu dalen-na.

³Boema au hule-haladoi no te'e-te'ek neu MANETUALAIN, ma au dokodoe susue-lalain. Au okaaong-nga boe, ma pake si'di kalong de au angatuuk nai afu dale.

⁴Au manaku basa au laoinang-nga sala-singon-nala neu MANETUALAIN fo au Manetualaing-nga. Au afa'da ae, “MANETUALAIN O matua-madema, de ami fe ha'da-holomata neu O. O tao matetu O hehelu-balataam do'e-do'e, ma O matu'du O susue-lalai manaketu basa tam-ma neu sila fo manasue-lai O, ma manatao-no'i hata fo O paletan.

⁵Ami masala-masingo basa so, ami tao tatao-nono'i mangalauk ma tao salak so. Ami la'ban ma la'olena O paletam-ma so, boema ami la'ok sala neme O nakanenetem-mala.

⁶Ami ta mamanene O atam fo nde nabi sila-la fa, ala kokolak basa nenik O na'dem-ma neu ami manem-mala, basa mauli-malangan-nala, basa ami bei-ba'i kaim-mala ma neu ami laoinam lala'en-na.

⁷Ou MANETUALAIN, O nakeketum-ma la'en tataas esa, ndoos ma matetuk tehu ami makamamaek ami aoinam-ma do'e-do'e fo nde: ami basa-basam fo manaleo nai Yudea ma Yerusalem, ma basa hataholi fo leoina esa lo ami, fo O fes tapasasala leo nusa dook-kala ma manadekak-kala, hu kande, ala ta lilineka neu O fa.

⁸Ami manem-mala, mauli-malangam-mala, ma ami bei-ba'i kaim-mala, ala tao-no'i dede'ak fo neni mamaek, de lasala-lasingo basa neu O so, ou MANETUALAIN.

⁹O henuk no do'o do ampon ma susue-lalaik, leomae ami la'ban basa O so.

¹⁰Ami ta mamanene O halam-ma fa, ou MANETUALAIN, fo ami Manetualaim-ma, nai lelek O madenu ami maso'da tunga O fe ami hoholo-lalanek-kala tunga nabi-nabi fo O atam sila-la.

¹¹Israel lala'en-na, la'olena O hoholo-lalanem, ma ta nau lamanene O halam-ma fa. Ami masala-masingo soaneu O, hu ndia de, O fe soo-supak fo nanasulak nai O atam Musa Susulan dale, tuni la'e ami.

¹²O nakeketum-ma la'en, sama leo O helu basan neu ami ma neu ami manakoasam-mala. O huku basa Yerusalem nenik huhukuk fo belan-na lena neme kota bee mai boe, nai daebafak ia.

¹³Susa-soe fo nanasulak nai Musa susula hoholo-lalanen lala'en-na dalek, O mapalunis neu ami so. Tehu leomae leondiak boe, ou MANETUALAIN fo ami Manetualaim, ami ta nau sipok-kana fo tao mamahoko O dalem-ma fa. Ami ta nau la'oela ami sala-singom makandondook fa, boeo ami ta nau taoafik neu O nanolim-mala fa.

¹⁴O, ou MANETUALAIN, fo ami Manetualaim, O huku basa ami nenik sua-soe fo O sadia basan so; O nakeketum-ma la'en tataas esa, ndoos ma matetuk, tehu ami ta nau mamanene O halam-ma fa.

¹⁵Ou MANETUALAIN, fo ami Manetualaim, O matu'du basa O koasam-ma nenik O moo O anam-mala kalua leme Masir mai, ma O koasam ndia bei nananafandendele nahelek. Ami masala-masingo ma tao salak so.

¹⁶O masala'e ami nai tepo-lelek makahulun-na so, hu ndia de, boso boe mamanasa Yerusalem, fo O kotam-ma, O pupuku malalao-malalafum-ma. Hu kande ami sala-singom, ma ami bei-ba'i kaim tatao-nono'i mangalaun-nala, boema basa hataholi manai ami boboa-kaisum-mala lakadadaek Yerusalem ma O anam-mala.

¹⁷Ou ami Manetualaim, mamanene au huhule-haladoing ma dokodoeng-nga. Tao matalolole O Umam fo nakalulutuk ndia, tao matalololen leona, fo ela basa hataholi-la bubuluk lae O nde Manetualain.

¹⁸Mamanene ami leona, ou Manetualain, mete ami ma taoafik neu ami doidosom boema kota nalutuk fo loken nenik O na'dem-ma. Ami hule-haladoi neu O, ta hu kande ami tatao-nono'im malole neu O fa, tehu hu kande O henuk no susue-lalaik.

¹⁹MANETUALAIN, mamanene ami, fe do'o do ampon neu ami, taoafik neu ami ma ho'i nakeketuk no lai-laik! Boso makadodook-kana, fo ela basa hataholi-la bubuluk lae O nde Manetualain. Nana O nuu matetum Yerusalem ma O anam-mala.”

²⁰Au hule-haladoi akandoo fo manaku au sala-singong ma au leoinang Israel sala-singon-nala, boema au dokodoe neu MANETUALAIN fo au Manetualaing-nga, fo tao matalolole uma malalao-malalafun-na.

²¹ Lelek au bei hule-haladoi te, Gabrial fo au ita basan nai au ninita makahulung-nga dalek ndia, ana laa nasale leo au mai. Ndia te, nandaa no hataholi-la fain fo tunu-hotu tutunu-hohotu le'donoson-na.

²²Boema Gabrial nafa'da mangalele'don-na nae leo ia, “Danial, au mai soaneu tulu-fali o, fo o malelak hala nafa'da elak manamaik ndia.

²³Lelek o mulai dokodoe neu Manetualain-na, Ana fe natataak. Au mai tui-bengan, nana Ana sue-lai o. Nah, mamanene matalolole, nai lelek au afa'da mangalele'do ninitak ndia sosoa-ndandaan.

²⁴Teuk hituhulu la'i hitu ndia nde faik fo Manetualain naketun soaneu Ana soi-po'i o leoinam-ma, ma o kotam fo malalao-malalafuk ndia neme sala-singok ma tatao-nono'i mangalauk-ka mai. Basa sala-singok lala'en-na, neukose hapu do'o do ampon ma napadedeik natetu ndoos ma matetuk fo manaketu basa taak-ka, nalosa ninitak ma hala nafa'da elak ndia, neukose ala da'di, ma MANETUALAIN Uman fo malalao-malalafuk ndia, neukose pake falik-kana soaneu MANETUALAIN.

²⁵Sulak-ma dede'ak ia, fo o malelak-kana: Teuk 7 la'i hitu neukose ala seli, mulai neme faik fo Ana kalua paleta soaneu nafofo'a falik Yerusalem, losa Manetualain hele mauli-malangan esa ana mai. Nai teuk 62 la'i hitu dalen-na, Yerusalem enon-nala ma lalaak nanean-nala, neukose nananafofo'a falik, tehu tepo-lelek ndia, henuk no toto'a-tataak.

²⁶Nai tepo-lelek ndia mate'en-na, mauli-malangan fo Manetualain helek sila-la, neukose nanataonisak, te se'kona salan ta. Soona mane mabe'i-balakaik esa solda'dun-nala mai, boema ala tao lakalulutuk kota Yerusalem-ma ma MANETUALAIN Uman-na. Neukose tepo-lelek ndia mate'en-na, ana mai sama leo faa matuaina, fo neni natee-natatik, ma nakalulutuk, sama leo Manetualain naketu basan so.

²⁷ Neukose manek ndia tao hehelu-balataa matea-mahelek no hataholi makadotok nai teuk 7 dalen-na. Nai tepo-lelek ndia tala'da, neukose ana tao nate'e tutunu-hohotuk ma tunu-hotuk. Basa soona, hata esa nakatata'u fo loken soona lae, Mangalauk fo manatao nakalulutuk, neukose nanape'dak nai MANETUALAIN Uman-na, neukose nahele neme ndia, losa hataholi manape'dan neu mamanak ndia, momopo-mamates tuni-nalan; fo nde momopo-mamates fo Manetualain naketu basa soaneun so.”