Read Termanu HOSEA 12 Bible Online

HOSEA 12 - Termanu bible

HOSEA 12

¹MANETUALAIN nafa'da nae, “Leoina Israel-la, okofeo-la Au nenik masapepeko-masandandalik ma tipu-daik. Leoina Yehuda lena la'ban lahele Au, Manetualain fo Malalao-malalafuk, ma manalilinekak.

²Basa hata lala'en fo hataholi Israel-la tao-no'in, neme fafaik losa le'odae, sosoa-ndandaan ta, te neni ka'da momopo-mamatek sama leo ani timu-a. Dale manake'di-ndiun-nala, ma tatao-nono'i ha'da hataholi taan-nala, boetai nakadele nai sila dalek. Ala tao hehelu-balataak loo Asyur, ma leni mina leo Masir neu, fo da'di leo ta'du-tana tia-laik.”

³ MANETUALAIN nanuu dede'ak no leoina Yehuda. Boeo, neukose Ana huku Israel, nanahu ha'da-paliin-nala. Neukose Ana balas tatao-nono'in-nala.

⁴ Lelek nai inan tein dale, Yakob fo sila bei-ba'i kain-na, tipu-dai tolanoo takalapan Esau baba'en-na. Lamatua boema, Yakob naho'uk no Manetualain.

⁵Naho'uk no ata lalais esa, de ana sengi. Boema ana kii, ma noke fe ndia baba'e-papalak. Basa boema, Manetualain mai leo Yakob fo ita bei-ba'i kain ndia neme Betel, de Ana kokolak non.

⁶Manetualain ndia nde MANETUALAIN Fo Manakoasa. Na'den-na nde MANETUALAIN. No na'dek ndia, nde Ana nau hataholi-a sene-do'ok neun.

⁷Hai emi fo Yakob tititi-nonosin-nala lemin, mamahele neu emi Manetualaim-ma, ma fali ma'im-ma leo Ndia meu. Maso'da no susue-lalaik, ma tunga ka'da ndoon-na, ma mahani no boso haelai mamanasa, losa emi Manetualaim-ma ho'i nakeketuk.

⁸MANETUALAIN nafa'da leoina Israel-la nae, “Emi dalem-ma ta ndoos, sama leo hataholi Kanaan-nala. Emi manadangam-mala nau tipu-dai sila hataholi manaasa lahele nai sila, nenik tatais ta matetuk fa.

⁹ Lafa'da lae, ‘Besak ia, ita tamasu'i, Ita hapu nanalak! Ta hapu hataholi esa boen, bisa ana kalaak ita, nae ita hapu su'i-betes sila-la, nenik enok tipu-daik fa.’

¹⁰Tehu Au, fo emi MANETUALAIN fo no emi kalua neme Masir mai-a, neukose Ana fe emi leo seluk nai lalaa temak-kala dalek, sama leo makahulun-na, fo nai lelek Au mai leo emi mai, nai moo solokaek-ka.

¹¹Au kokolak basa o nabi la so, ma Au fes ninitak ba'uk-ka. Tunga nabi sila-la, nde Au afa'da Au dale tutu'ung-nga neu emi, fo Au anang-ngala,

¹² tehu leomae leondiak boe, bei hapu hataholi sene-do'ok neu sosongo-tatangok manai Gilead, ma ala tunu-hotu sapi nai mei tunu-hotuk lain nai Gilgal. Tehu, neukose mate sila-sila fo manasene-do'ok neu sosongo-tatangok ndia, ma neukose, mei tunu-hotuk manai Gilgal sila-la, ala da'di batu madodouk nai tina-la dalek.”

¹³ Yakob fo ita bei-ba'i kain-na, nalai leo Mesopotamia neu, boema soaneu hapu saoinak, de ana da'di ata neu hataholi manai naa-la, ma ana foo hataholi ndia bi'ilopon-nala.

¹⁴MANETUALAIN nadenu nabi esa, fo noo hataholi Israel-la kalua leme Masir, mamanak fo ala da'di ata, ma soaneu naneas.

¹⁵Hataholi Israel-la, ala tao-la MANETUALAIN namanasa nanseli so; sila landaa nahukuk, nanahu sila tatao-nono'i managalaun-nala. Neukose MANETUALAIN hukus, nana hu kande sila de, hataholi-a nakamumulu-nakamamaek Manetualain.