Read Termanu HOSEA 4 Bible Online

HOSEA 4 - Termanu bible

HOSEA 4

¹MANETUALAIN kalaak nusak ia laun-na. Hai Israel, mamanene hata fo nafa'dan nae, “Ta hapu lilinekak, do susue-lalaik nai nusak ia fa, de laun-na ta manaku Au da'di leo Manetualain fa.

²Ala soo-supa tehu ala ta tao tunga fan; ala lasapepeko-lasandandali, lanisa, lamanako, ma ala hohonge. Tatao-nono'i mangalauk-ka boetai nakadele, ma kanisak-ka ana da'di, latutungao.

³Hu ndia de, nusak ia neukose ana da'di dae ma'dak, ma neukose, mate la'iesak basa hata fo laso'da lai ndia. Neukose mopo-mate la'iesak bana-manu mata-matak manai lalai, dae ma'dak-ka, ma manai tasi dale-la.”

⁴MANETUALAIN nafa'da nae, “Hai basa imam-mala lemin, esa boso fe salak neu esa, do mamanasa Au anang-ngala, nana emi nde, Au fe salak-ka dei!

⁵Lele'do-le'odaen, emi tao salak, leondiak boe, basa nabi la. Hu ndia de, neukose Au tao amopo-amate emi inam Israel.

⁶Emi, fo basa imam mala, ta taoafik neu Au fa, boema Au anang-ngala boeo, ala ta tatao-afik neu Au fa, nalosa ala hapu soe. Emi ta nau sipok Au nanoling-nga fa. Da'di, tao leo bee o, neukose Au boeo, ta sipok emi boen, ma Au ta manaku emi anam-mala, da'di leo Au imam-mala fa.

⁷Hai imam mala lemin! Emi boetai mamade'uk-ka, de emi boetai tao sala-singok neu Au! Hu ndia de, neukose Au tao asafali emi ha'da-tataom: Neukose emi ta nanafe ha'da-holomatak fa, tehu emi nananakadadaek.

⁸Emi da'di kamasu'i-makabetek, hu kande Au anang-ngala sala-singon, hu ndia de, emi mahiik, fo ela ala tao sala-singok lakandoo.

⁹Boema, neukose emi doi-doso sama-na leo sila! Neukose Au huku emi, nandaa no emi tatao-nono'im-mala.

¹⁰Neukose, emi mi'a neme tutunu-hohotuk fo nanatunu-hotuk-ka mai, tehu neukose emi mamala'a mahele. Neukose emi sene-do'ok neu lamatua daebafak, fo ala lamaheles fe bubu'u-palusa lalole, tehu emi laum-ma ta namade'u fa, nana emi la'oela Au so, de emi meu sene-do'ok neu lamatua daebafak fe'ek-kala.”

¹¹MANETUALAIN nafa'da nae, “Hai, Au anang-ngala lemin, nau angol palaak do angol beuk boe, ana tao namopo emi dudu'a-aafi neulaum-ma so.

¹²Emi moke natutu'duk neme ai bibiak esa mai! Ai tete'ek esa, nafa'da emi hata fo emi hii bubuluk-kana! Emi sama leo saoinak esa, ana da'di manasosoa-piaok; Emi la'oela Au, de emi fe emi aoinam-ma neu lamatua daebafak fe'ek-kala.

¹³Emi tunu-hotu tutunu-hohotuk nai mamana sosongo-tatangok manai pupukuk-kala, ma letek-kala poin-na, ma emi tunu boomenik nai ai matuaina manaleloakak manai naa-la huun-na, nanahu mamanak ndia sa'on-na malole. Tehu, mate'en-na beek da'di? Emi anafe'oanam-mala, ala da'di manasosoa-piaok, ma emi manafeu inam-mala hohonge!

¹⁴Tehu, neukose Au ta huku sila tatao-nono'in ndia fa, nana emi boeo, meu leo manasosoa-piaok fo lalalau-laoono nai uma sosongok-kala, ma emi basa-basam-mala, tunu-hotu tutunu-hohotuk neu lamatua daebafak-ka. Tete'ek-ka dede'ak ia la'en, nae, ‘Leoina fo ta nanuu malelak la'eneu MANETUALAIN fa, neukose mopo-mates.’

¹⁵Hai emi fo hataholi Israel-la lemin, emi ta lilineka neu Au fa! Tehu Au amahena, Yehuda ta tao salak leondiak-ka fa. Boso makaluku-makatele nai Gilgal do Betel. Boso soo-supa nai naa, menik MANETUALAIN fo maso'dak-ka, na'den-na.

¹⁶Hai hataholi Israel-la lemin, emi langa batu manseli! Tao leo bee fo Au bisa foo emi, sama leo bi'ilopo-a nai moo mana'uk-ka?”

¹⁷Hataholi Israel-la, dalen-nala latea lahele neu sosongo-tatangok so. Hu ndia de, po'ilotak-kasa.

¹⁸Linu basa angol bauk-ka, fo ala mafuk soona, ala sosoa-piao no dale namahokok. Ala nau hataholi nakadadaek-kasa, neme fes ha'da-holomata.

¹⁹Hu ndia de, neukose ala sapu-lalo, sama leo anin-na fuu nenis. Neukose ala hapu mamaek, hu kande tutunu-hohotuk fo ala tunu-hotun neu lamatua daebafak-kala.