Read Termanu HOSEA 9 Bible Online

HOSEA 9 - Termanu bible

HOSEA 9

¹Hai leoina Israel-la lemin, boso boe tao seluk emi fai malolem-mala, sama leo leoina fe'ek-kala bai. Emi la'oela emi Manetualaim-ma so, ma emi ta lilineka neu fan. Nai popo'de gandum-mala esa-esak, emi mase'o emi aoinam-ma da'di leo manasosoa-piaok, ba'eneu lamatua daebafak Baal-la, ma emi mamahoko sipo gandum fo emi mafa'da mae, lamatua daebafak ndia, ana fe emi ngga'dim-ma nde ndia!

²Tehu, ta dook-ka so'on te, neukose emi to'a-taa gandum, boema mina setun, ma neukose basa angol-la boe.

³Hai emi, fo leoina Israel-la lemin, neukose emi ta leo mahele nai dae fo MANETUALAIN fe emi-a fa. Emi muse fali me'um-ma leo Masir meu, ma emi muse mi'a nana'a nananalulik nai Asyur.

⁴Nai nusak sila-la, neukose emi ta hapu tunu-hotu angol, ma tutunu-hohotu bana-manu soaneu tao mamahoko MANETUALAIN Manakoasa dalen-na. Neukose emi nana'am-ma, ana tao-na basa hataholi mana'ak-kala, da'di langgenggeo, sama leo na'a nana'ak manai feta natoi mamates-sa. Nana'ak ndia, sosoa-ndandaan nde ka'da, soaneu tao-na emi makabete. Neukose, emi ta meni faaanak boen, leo MANETUALAIN Uman neu, fo tunu-hotun nai naa fa.

⁵Nai lelek emi tao agama fai malolen-nala, emi ta hapu tao hata esa boen, soaneu fe ha'da-holomata neu MANETUALAIN fa.

⁶Metema, soe-a losa, ma loo emi leo nusa fe'ek meu, soona ela emi see soona, neukose hataholi Masir-ra tao lakabubuas soaneu taolisas, fo latoi-latonos nai Memfis! Neukose na'u ma dila-nggauk moli ketu emi uma mamanam-mala, ma emi bua-lo'a lilofula kabelim-mala.

⁷ Fai huhukuk ka losa so, faik soaneu sipo babalak neu basa tatao-nono'ik lala'en-na. Neukose Israel name'dan. Emi mafa'da mae, “Nabi ia nggoak! Namulu so!” Emi mafa'da mae leondia, nanahu emi ta mahiik au nanseli fa, ma emi sala-singom ba'un-na seli.

⁸Manetualain nadenu au, da'dileo nabi, soaneu fe nasanene'dak neu emi, fo anan-nala, tehu au u leo bee u boe, emi sanga enok, fo makahihi'ik au sama leo manupui-a. Laun-na musu no ami fo Manetualain nabin-nala, nai Manetualain nusan-na.

⁹ Emi tatao-nono'im, mangalaun-na seli, sama leo hataholi manai Gibea-la tao hain so. Neukose Manetualain nafandele emi sala-singom, ma neukose Ana huku emi, nanahu emi sala-singom-mala.

¹⁰ Manetualain nafa'da nae, “Lelek Au hapu Israel makasososan-na, Au amahoko sama leo hataholi-a hapu angol boak-ka nai moo solokaek-ka. Lelek Au ita emi bei-ba'i kaim makasososan-na, Au amahoko, sama leo hataholi-a nita kaa boa makasososak-ka. Tehu, lelek leu leo Letek Peor-ra leu, ala mulai sene-do'ok neu Baal-la, nalosa ala da'di langgenggeo, sama leo lamatua daebafak fo ala sue-lain ndia.

¹¹Neukose Israel matua-mademan ana lapu, fo mopon sama leo manupui-a. Neukose inak-kala ta lailu so'on, fo ta hapu ni'iana nanabongik so'on.

¹²Tehu leomae hapu ni'iana-la nanabongik, fo lakaboboin losa namatua boe, neukose Au ho'i alas. Neukose, Au ta po'ilotak esa boen, bisa naso'da fa. Hai leoina Israel-la lemin, metema Au la'oela emi soona, soe ba'eneu emi!”

¹³MANETUALAIN, au ita hataholi usi anan-nala, de ala taolisas.

¹⁴Ade au muse oke beek neme O mai, soaneu hataholi sila-la? Fe inan-nala da'di kalate'dis! Taom-malas, ta lasu'u ana beuanan-nala fa!

¹⁵MANETUALAIN nafa'da nae, “Basa sila tatao-nono'i mangalaun-na, ana mulai neme Gilgal mai. Nai ndia nde, Au mulai ta ahiik anseli o fas. Hu ka nde sila tatao-nono'i mangalaun-na, de neukose Au usi henis leme Au nusang ia mai. Neukose, Au ta sue-lai seluk-kasa so'on. Basa sila mauli-malangan-nala, ala lena-la'ban Au so.

¹⁶Neukose Au huku hataholi Israel-la. Neukse ala da'di sama leo bubu'u-palusa boa taak-ka, ma okan-nala lamatuu so. Neukose ta lanuu anak fa; tehu leomae lanuu anak boe, neukose Au taoisa sila ana susue-lalain sila-la.”

¹⁷Manetualain fo au alalau-aoonon ndia, neukose Ana ta sipok anan-nala fa, nanahu ala ta lamanene fan. Neukose laleu-lalaak lai leoina-la tala'da.