Read Termanu YOEL 2 Bible Online

YOEL 2 - Termanu bible

YOEL 2

¹Puu pupuuk-ka, ma fepa malii besi ta'du-tana soe-a nai pupuku Sion fo malalao-malalafuk fo Manetualain mamana leleon-na. Dele bengge'be leon, hai laun Yehuda-la lemin! Nana MANETUALAIN, Fain-na deka, de ana losa lai-lai.

²Faik ndia makiuk ma makahatuk, henuk no makamamasuk ma'u-ma'uk-ka. Lamak bubuaina esa mai osu-osu sama leo ko'as fo natabaa nai letelepak lain. Manada'dik leondiak-ka, beita da'di nita fa, ma neukose ana ta da'di seluk losa dodoon-na.

³Ala tao lisa basa bubu'u-palusa lala'en-na, sama leo ha'i na'as de putus. Makahulun-na, nusak ndia sama leo Eden, fo MANETUALAIN osin-na, Basa ndia boema, nalupa leo mo solokaek fo na'u-aiana ta moli fan. Ta ela hata esa boen, ta hapu hata esa boen, fo naladeak neme lamak sila mamain-na fa.

⁴ Lamak sila mata-panan, sama leo ndala, nalain-na, sama leo ndala nalaik nai mamana foti ndala dale.

⁵Lakaboboku nai letelepak-ka poin-na, ei ndu'un-na, sama leo kaleta musu lulu-tata ma sama leo ha'i na'a na'u-aiana tuuk-ka, de poto-poto. Ala la'ok lakadadalak, sama leo solda'du ao makadelek, fo naheheleaon leo musu dale neu.

⁶Lelek ala tutulumatak, basa hataholi-la dele bengge'be, basa mata-panak befula ma bema'u.

⁷Sama leo palani ta'ti batu, ala tutulumatak, ma ala kae papala nanadamak-ka, sama leo solda'du. Ala la'ok lakadadalak ndoos leo uluk leu, ala ta lepos, do lasafali enon-nala fa.

⁸Ta lakaseseti ao fa, sila esa-esak la'ok tunga enon-na. Basa-basas lakabubua, de ala hona lakalulutuk basa kota musu lala'en-na, ta hapu tao nate'e sila lala'o nakadadalan-na fa.

⁹Ala sapu leo kota dale leu, ma lalaik nai papala nanadamak lain. Ala kae, de leu leo uma-la dalek leu; sama leo nakodaa, de ala masok tunga jendela.

¹⁰ Lelek ala bei tutulumatak te, daebafak-ka dele, ma lalai-a boeo, ana dele. Boema le'do ma bulak-ka makahatuk, ma nduuk-kala ta lasalaa fa.

¹¹ MANETUALAIN halan-na nadodolo, fo ana fe nasanene'dak, neu solda'dun-nala. Solda'dun-nala makadotok nanseli! Solda'du fo lakalala'ok paletan-na, balakain-na seli! MANETUALAIN Fain-na matuaina nanseli! Ta hapu hataholi esa boen, hapu nakatatakak fa.

¹²MANETUALAIN nafa'da nae, “Tehu besak ia, fali leo Au mai leon no dale katematuak, boema oka aom-ma, kii ma makaleleu.

¹³Siiba'e o dalem-ma, te boso siiba'e o bua papakem-ma.” Fali leo MANETUALAIN fo o Manetualaim mai. Ana ta haelai namanasa, ma manasue-laik dale malole ma dale manakasian. Ana hii fe do'o do ampon, ma Ana ta nau huku-doki fa.

¹⁴Fafa'kama, MANETUALAIN fo o Manetualaim-ma, nasafali dale nakeketun-na de Ana ba'e-pala emi nenik baba'e-papalak manasasi kao-kaok. Nalosa emi hapu tunu-hotu tutunu-hohotu angol ma gandum ba'eneu MANETUALAIN, fo o Manetualaim.

¹⁵Puu pupuuk-ka nai Sion, fo Manetualain leten-na, po'a-benga fai oka aok-ka, tao natotongo matuaina.

¹⁶Tao makabubua basa laun-nala lala'en-na, paleta hataholi-la fo lakabubua Madenu lasik-kala, ni'iana-la ma ni'iana manasu'uk-kala, fo ala mai boe. Lena-lenak manaka'bing beuk-kala, muse ala mai boe. Madenus fo ala kalua leme kaman-nala dalek mai.

¹⁷Madenu basa imam fo lalalau-laoono MANETUALAIN, fo ala kii nai mei tunu-hotuk ma uma so'dan manai muka, tala'da, boema lafa'da lae, “Sue-lai O anam-mala, ou MANETUALAIN; boso po'ilotak, lakamuu-lakadau O hata-hetom.” Nalosa leoina fe'ek-kala kokolak holo ma lafa'da lae, “Sila Manetualain nai bee?”

¹⁸Boema MANETUALAIN taoafik neu dae-oen, ma sue-lai anan-nala.

¹⁹Nataas nae leo ia, “Besak ia, Au fe emi basa-basam-mala: gandum, angol ma mina setun fo da'di nana'a-nininuk, fo ela emi basa-basam-mala makabete. Neukose Au ta po'ilotak lakadadaek emi do leoina-la hika emi fa.

²⁰Neukose Au usi heni, lamak bubua matuaina, manamaik leme kii mai-a, Au usi heni seli leo moo solokaek-ka leu. Au akaseti dalak manai uluk-ka, leo Tasi Pilas-sa neu. Au tipa dalak manai dea, leo Tasi Tala'dak-ka leu. Mates de neukose laboo. Neukose Au tao amopo-amates, nana ala tao doi-doso emi so.

²¹Boso bii, hai tina-osi-la lemin, maloloa emi dalem-mala, mafandele dede'a matuaina fo MANETUALAIN tao-no'in ba'eneu emi!

²²Hai bana-manu-la lemin, dalem-mala boso ba'ihana, Besak ia, moo mana'uk-kala momo'do so. Ai-la boan-nala inu-inu, angol boak ma kaa boak makadotok nanseli.

²³Hai laun Sion-nala lemin, mamahoko-setelee leona! Mamahoko ma eeki-matadale! nanahu basa malole lala'en-na ala mai leme MANETUALAIN, fo emi Manetualaim mai. Ana fe emi u'dan, nai fai hanas mate'ek-ka. Ana fe u'dan-na mai, nai fai makasufun-na, boeo nai fai sele-ngalik-ka, sama leo fai makahulun-na.

²⁴Boema, neukose gandum henu mamana fepa gandum-ma seluk, angol ma mina setun-na, neukose sasi kao-kao losa ala lua daba-daba neme mamana kaka'bin-na mai.

²⁵Neukose Au nggati basa emi hata manamopom lala'en-na nai teu-teuk, fo lelek lamak-kala la'a heni emi keketu-kokolum buna-boan. Nana, Au nde haitua lamak bubua matuaina sila-la leo emi neu.

²⁶Neukose emi nana'a-nininum dai fo emi makabete. Neukose emi koa-kio MANETUALAIN fo emi Manetualaim-ma, nana Ana tao manada'di beuk ba'uk-ka ba'eneu emi. Neukose, ta lakadadaek Au anang-ngala so'on!

²⁷Boema emi bubuluk leon hai Israel, te Au nai emi tala'da heom, ma bubuluk mae, tete'ek-ka Au nde been-na, MANETUALAIN, fo emi Manetualaim. Ta hapu fe'ek so'on, te ka'da Au mesang-nga. Neukose, ta lakamamaek Au anang-ngala so'on!”

²⁸ “Basa ndia soona, neukose mate'en-na, Au po'a Au Duladaleng-nga neu basa hataholi lala'en-na. Soona, neukose emi anatou-anainam landuku-lalosak Au hala hehelung-ngala, emi neukose emi lasi-lasim-mala hapu me'is, neukose, Au fe ninitak neu ta'eanak-anafe'oanak,

²⁹Nai lelek ndia, neukose Au po'a Au Duladaleng-nga neu malalau-maoono touk ma inak boe.”

³⁰Neukose Au tao manada'di beuk ba'uk-ka nai lalai ma daebafak-ka. Neukose hapu nado'do-napauk, ha'i pilak ma ha'imasu bubuak.

³¹ Neukose le'do makahatuk ma bulak-ka da'di pilas sama leo daak-ka. Basa sila-la, neukose ala da'di te MANETUALAIN fain fo neni bibii-namata'u matuaina ndia, beita losa fa!

³² Tehu ba'eneu see, fo ana dokodoe noke MANETUALAIN tutulu-fafalin soona, neukose ana hapu so'dak. MANETUALAIN nafa'da nae, “Au hele hataholi manai Yerusalem-mala, neukose laso'da.”