Read Termanu YOEL 3 Bible Online

YOEL 3 - Termanu bible

YOEL 3

¹MANETUALAIN nafa'da nae, “Nai lelek ndia, neukose Au tao falik Yerusalem ma Yehuda su'i-beten-nala.

²Neukose Au tao akabubua basa leoina-la, fo Au os leo Bafa Naketu-nala'dik-ka neu. Boema nai ndia, Au aketu-ala'di sila tatao-nono'i mangalaun neu Au anang-ngala, nanahu ala baba'e dae Israel-la, ma ala tu'u heni Au anang-ngala leo nusa-nusak-kala leu.

³Ala tu'u batu fo laketu see kande, neukose hapu hataholi nanafook-kala. Lase'o anafe'oanak ma ta'eanak-kala fo ala taos da'di ata. Soona ala pake doin-nala soaneu ina manasosoa-piaok-kala, ma soaneu linu angol.

⁴Emi sanga tao Au ia le'e, hai Tirus, Sidon ma basa nusa Filistin-na lemin? Emi sanga balas nape'da dalek soaneu Au do? Nah, sipo-ma Au babala manamaing-nga no lai-laik.

⁵Emi mamanako-ma, Au lilopilang ma lilofulang-ngala so, ma Au hata-heto kabeling-ngala, emi ho'i menis leo emi uma sosongom-ma neu.

⁶Emi meni Yehuda ma Yerusalem laun-nala leo mamanak fo dook-ka neme nusan-nala mai. Basa boema emi mase'ohenis leo leoina Yunani neu.

⁷Besak ia, Au kalua henis leme mamanak fo emi mase'o henik-kala mai, ma neukose Au balas emi tatao-nono'i mangalaum soaneus-sala.

⁸Neukose Au ase'o heni emi anatou-anainam leo Yehuda laun-nala neu, fo neukose lase'o seluk-kasa leo Syeba, nusak fo nai dook-ka nanseli. Au, fo MANETUALAIN, nde manakokolak-ka.

⁹Po'a-benga paleta ia neu leoina-la mae, Maheheleaom fo meu matee-mata'ti ma makasusu'di balakaik! Hoka basa meo-la ma palani ta'ti batu-la; tao makabubua basa solda'du-la fo tutulumatak!

¹⁰ Tutu o tata'tim-ma da'di tafaina, ma tao o dope nggenggeum-ma da'di tee isik. Hataholi tapandoes-sala boeo, muse lafa'da lae, ‘Au atee-atati abe'i sama leo solda'du-la!’

¹¹Ayo, mai lai-lai leon, hai leoina-leoina manai bu'u-bu'uk lala'en-na lemin! Makabubua meu bafak eli dalek.” Ou, MANETUALAIN, madenu O solda'dum-mala leu sapu-la hataholi sila!

¹²MANETUALAIN nafa'da seluk nae, “Basa leoina-la, muse lahehele aon fo leu leo Bafak Naketu-nala'dik-ka leu. Nai ndia, Au fo MANETUALAIN neukose aketu-ala'di leoina-leoina manai Au anang-ngala titia-tatain-nala.

¹³ Sila mangalaun-na seli; hu ndia de, ta'ti henis sama leo gandum latuk manai tina. Heheta-aa'is, sama leo angol-la nai mamana kaka'bi angol-la henun, de ana sasi leo dae neu.

¹⁴Hataholi lifu-lifun nai Bafak Naketu-nala'dik-ka. Nana nai naa, MANETUALAIN Fain-na, neukose ta dooanak so'on te ana losa.

¹⁵Le'do ma bulak-ka neukose makahatuk, ma nduuk-kala ta lasalaa so'on.”

¹⁶ MANETUALAIN nangao neme Sion, fo Ndia leten lain mai, halan-na nadodolo neme Yerusalem mai. Hu Manetualain de, lalai-a ma daebafak-ka langgengo. Tehu neukose, MANETUALAIN nasala'e nahele ma nasulu-nahapa Israel, fo anan-nala.

¹⁷“Hai Israel, besak ia neukose emi bubuluk, mae Au nde MANETUALAIN fo emi Manetualaim-ma. Au leo nai Sion, fo Au lete malalao-malalafung-nga. Soona Yerusalem boeo, ana da'di kota malalao-malalafuk, neukose hataholi nusa dea ta neu leo dalek neu so'on.

¹⁸Nai lelek ndia, neukose lete-letek-kala henuk no osi angol. Neukose bana-manu la'a na'u nai pupukuk manaleloakak-kala. Neukose ta ma'da Lee manai Yehuda-la makandondook fa. Neukose lee esa, ana faa neme MANETUALAIN Uman mai, fo oen-na faa no nee-nee lino-linok leo Bafak Akasia neu.

¹⁹Neukose Masir da'di moo solokaek, fo na'u-aiana ta moli fan, ma hataholi ta leo Edom fa, de ana da'di nusa nees. Nana sila latee-lata'ti loo hataholi Yehuda-la so, ma ala taolisa nusa sala tak-ka laun-nala.

²⁰Soaneu hataholi sila daan-na, de neukose Au oke babalan-na, neukose, Au ta'ti heni hataholi manataonisak-ka. Tehu Yehuda ma Yerusalem soona, neukose mahataholik nahele, ma neukose Au leo ahele Lete Sion-na.”