Read Termanu AMOS 1 Bible Online

AMOS 1 - Termanu bible

AMOS 1

¹ Amos nde been-na, manafoo bi'ilopo esa neme kota Tekoa mai. Ana da'di nabi nai lelek Mane Uzia paleta nusa Yehuda ma Mane Yerobeam, fo Yoas anamanen-na paleta Israel. Teuk 2, fo dae manggengok esa beita da'di fa te, Manetualain nafa'da dede'ak-kala nde ia neu Amos la'eneu Israel.

² Dede'ak fo Amos nafa'dak-ka nde ia, “MANETUALAIN nangao sama leo singa neme Pupukuk Sion-na mai, Halan-na nadodolo sama leo ta'tas-sa neme Yerusalem mai. Moo mana'uk-kala da'di na'u tak, na'u manai Lete Karmel-la lamatu tongo.”

³ MANETUALAIN nafa'da nae, “Laun Damsyik-kala lasala-lasingo tataas esa so, hu ndia de, tao leo bee-o, neukose Au hukus. Ala tao hataholi Gilead-tala no dale susue-lalai tak,

⁴hu ndia de, neukose Au haitua ha'i leo Mane Hazael-la uma manen-na neu, ma Au hotu heni Mane Benhadad-ta, kota musun-nala.

⁵Neukose Au tao alutu Damsyik lelesuinan-nala, ma neukose Au sapu balisi Bafak Awen laun-nala, neme mamana leleon-nala mai. Neukose Au akona heni hataholi manakoasa manai Bet-Eden-nala leme kandela manen-nala lain mai, ma neukose Siria laun-nala nanafook, fo loos leo nusa Kir-ra neu.”

⁶ MANETUALAIN nafa'da nae, “Nusa Gasa laun-nala lasala-lasingo tataas esa, hu ndia de, tao leo bee-o, neukose Au hukus. Ala foo leni leoina esa lala'en-na, de lase'os da'di leo ata neu hataholi Edom-mala.

⁷Hu ndia de, neukose Au haitua ha'i-a leo Gasa papala-nanadaman-nala neu, fo na'a heni kota musun-nala.

⁸Neukose Au tipa heok laun-nala loo hataholi manakoasa manai kota Asdod ma Askelon-nala. Neukose Au huku Kota Ekron, ma neukose Au tao amopo-amate bei ela hataholi Filistin-nala.”

⁹ MANETUALAIN nafa'da nae, “Laun Tirus-sala lasala-lasingo tataas esa so, hu ndia de, tao leo be o, neukose Au hukus. Ala foo leni leoina esa lala'en-na leo mamana tu'u-tapak neu, de ala fes leo Edom neu. Ala la'olena hehelu-balataa tia-laik-ka so.

¹⁰Hu ndia de, neukose Au haitua ha'i-a leo kota Tirus-sa papala-nanadaman-nala neu, fo na'a heni kota musun-nala.”

¹¹ MANETUALAIN nafa'da nae, “Laun Edom-mala lasala-lasingo tataas esa so, hu ndia de, tao leo bee-o, neukose Au hukus. Leu latee-lata'ti no dale susue-lalai tak loo hataholi Israel fo sila tolanoon-nala. Lamanasa lakandoo ma lape'da dalek lahele.

¹²Hu ndia de, neukose Au haitua ha'i-a leo kota Teman neu fo na'a heni Bosra kota musun-nala.”

¹³ MANETUALAIN nafa'da nae, “Leoina Amon-nala lasala-lasingo tataas esa so, hu ndia de, tao leo bee-o, neukose Au hukus. Lelek latee-lata'ti fo ala tao lamaloa sila nusan-na, ala saika'di inak-kailus manai Gilead-tala tein-nala.

¹⁴Hu ndia de, neukose Au haitua ha'i-a leo kota Raba papala-nanadaman-nala neu, fo na'a heni basa kota musun-nala. Nai lelek ndia, neukose lamanene musu nangguu mai, ma natee-natatik doto-doto sama leo ani-sangu.

¹⁵Sila Manen-na ma basa manapaletan-nala, neukose ala foo lenis leo mamana tu'u-tapak neu. Au, fo MANETUALAIN, nde manakokolak-ka.”