Read Termanu AMOS 4 Bible Online

AMOS 4 - Termanu bible

AMOS 4

¹Mamanene leon, hai ina Samaria fo boetai laao sama leo sapi maao manai Basan-nala lemin! Emi tuni-ndeni hataholi tapandoes-sala, ese-lumu hataholi nuu-taa hata-taak-kala, ma emi makaseti emi saotoum-mala, fo ala sadia fe emi ala-lalu tataas esa!

²Au, MANETUALAIN Fo Mademaina, nde been-na MANETUALAIN fo malalao-malalafuk, ma Au helu basa ae neukose emi nanalele'a-lolosok nenik besi kakaik. Emi basa-basam-mala neukose sama leo i'ak-ka nai dolu isin-na.

³Neukose emi nanalele'a-lolosok leo Hermon neu, ma emi esa-esak nanatapa henik leo deak tunga papala nanadama manadekak-ka, lelan-na. Au fo MANETUALAIN nde manakokolak-ka.”

⁴MANETUALAIN Fo Mademaina nafa'da nae, “Hai hataholi Israel-la lemin! Ka'da meu leo uma mamasok manai Betel-la meu, fo tao sala-singok nai ndia. Meu leo Gilgal meu leona, fo tao sala-singok su'di bebe'ik-ka. Bole tunu-hotu tutunu-hohotuk tunga-tunga fafain-na, fo faik telu na, fe emi hahapu-dadaim baba'ek 10 soona, fe baba'ek esa!

⁵Bole tunu-hotu loti fo da'dileo emi moke makasi neu Au, ma bole kokolak dede'a me'i-afek mae emi fe basa tutunu-hohotuk tataman-na so! Tao leo bee o, emi mahiik taok-ka nde ndia!

⁶Au nde fe la'a-ndoes neu basa emi kotam-mala, tehu emi ta nau fali leo Au mai fa.

⁷Au kena-ka'i u'dan-na nai lelek emi bubu'a-palusam-mala paluu oe. Au akona u'dan leo kota esa neu, tehu kota fe'ek-kala ta. Tina esa hapu u'dan, tehu tina fe'ek-kala lamatuu.

⁸Nai kota de'ubee, laun-nala male henis no maa ma'dak-ka so, ala sanga oe nai kota fe'ek, tehu oe manai kota ndia ta dai fa. Leomae leondiak boe, emi ta nau fali leo Au mai fa.

⁹Au fuu ani mato'bik-ka ne'i, ma Au haitua lama-bobo'oi le'i fo tao lalutu bubu'u-palusa ma emi osi angom-mala. Ai kaak-kala ma emi ai setum-mala lamak-kala la'a heni la'iesak-kasa. Leomae leondiak boeo, emi ta nau fali leo Au mai boen.

¹⁰Au haitua he'di-laus leo emi neu, sama leo Au haituan leo Masir neu. Au taoisa emi hataholi muli-solum-mala nai natee-natatik dale, ma ala loso-la emi ndalam-mala. Au tao ahenu emi lalaa temam-ma nenik mamates, fo emi ta makataka boon-na fa. Leomae leondiak boe, emi ta nau fali leo Au mai boen.

¹¹ Au tao amopo-amate emi nggelok, sama leo Au tao amopo-amate Sodom ma Gomora. Fo bei ela emi hataholi maso'dam-mala nde been-na, sama leo ho'i-na ha'ilutek-ka neme ha'i dale mai. Leomae leondiak boe, emi ta nau fali leo Au mai boen.

¹²Hu ndia, hai hataholi Israel-la lemin, neukose Au huku emi. Da'di maheheleaom leona, fo masasalematak moo huhukuk fo neukose Au fen tuni-na emi!”

¹³MANETUALAIN Manakoasa nde nakadada'dik letek-kala ma anin-na. Nafa'da dale tutu'un-na neu hataholi daebafak-ka. Ana tao lele'dok ma le'odaek. Ana la'ok nai daebafak-ka poin-na. MANETUALAIN Fo Manakoasa, na'den-na nde ndia.