Read Termanu AMOS 6 Bible Online

AMOS 6 - Termanu bible

AMOS 6

¹Soe ba'eneu emi fo maso'da nai malole-mala'da dalek nai Sion, ma emi fo mame'da so'dam-ma nee-nee lino-lino nai Samaria, hai emi fo lasi nggolok nananita-nalelak nai leoina Israel mana'a hiik ia, emi fo biasa laun-nala mai fo loke tutulu-fafalik!

²Meu leona, fo mete nai Kalne, boema la'ok makandoo leo kota Hamat fo matuaina ndia, basa soona, meu leo kota Gat fo nai Filistin. Emi maedaenga, kota sila-la malole lena neme nusa Yehuda ma Israel mai do? Ade sila nusan-na ta ba'u lena emi nusam-ma fa do?

³Emi matea mahele ka'da mae, fai susa-soe bei dook-ka, tehu emi tatao-nono'im nde tao-na fai maneni mamates ndia losa no lai-laik.

⁴Soe ba'eneu emi fo mangape'uk nai pepe'u malole mana'a lain, ma tao feta-dote nenik paa sapi ma paa bi'ilopo ana!

⁵Emi hii tao nakameek sama leo Dauk taok-ka, ma emi makaminak kacapi fo emi makamee nakameek sila-la.

⁶Emi minu angol soona, emi di'a mahenu nggalas-sa, ma emi pake mina kabomni neulauk, tehu emi dalem-ma ta he'dis neu Israel nakalulutun-na fa.

⁷Hu ndia de, neukose emi nde nanafook makasososa leo mamana tu'u-tapak neu. Emi feta-dotem ma emi mangatuu mei-ma, neukose nate'e.

⁸No balakaik MANETUALAIN Fo Manakoasa ma Mademaina, Ana fe basa hala nasanene'dak-ka nde ia nae, “Au ta hii hataholi Israel-la koao-ndaeaon fa; Au ta hii sila uma manen fo malole-mana'an-nala fa. Neukose Au fe sila nusan-na polon-na, no basa hata manai dalek-kala lala'en-na, leo musu neu.”

⁹Metema bei hapu hataholi 10 ke'ke lai uma esa dalek soona, neukose ala mate boe.

¹⁰Teidalek fo manaito-ato natoi-natonon-na, neukose ana mai fo ana ko'o no tolanoon ndia popolan-na leo deak neu. Soona naloo bou-bou neu hataholi manai uma ndia buin-na nae, “Ade bei hapu nggelok bei laso'da do ta?” Soona, neukose namanene hala natataak-ka nae, “Ta!” Teidalek fo natoi-natono popolak ndia, neukose nafa'da nae, “Boso kokolak seluk bai! Ita ta bole seseik MANETUALAIN na'den-na fa.”

¹¹Metema MANETUALAIN fe paleta soona, uma matua uma ana, neukose nanatao nakalulutuk.

¹²Ndala bisa nalaik nai pupuku batu lain do? Hapu hataholi nakauuk tasi nenik sapi do? Tehu emi puta-paik eno ndoos ma matetuk-ka, fo da'di laso maneni mamates, ma ndoos-sa da'di salak.

¹³Emi tui tutui me'i-afek mae, emi sengi Lodebar so. Emi boeo mafa'da mae, “Emi balakaim-ma dai soaneu ho'i falik Karnaim.”

¹⁴MANETUALAIN Fo Mademaina ma Manakoasa nafa'da nae, “Hai hataholi Israel-la lemin, neukose Au haitua solda'du neme leoina fe'ek mai, fo ala sapu-la emi nusam-ma. Neukose ala tuni-ndeni emi neme enok leo Hamat nai kii losa leo Bafak Araba nai kona.”