Read Termanu AMOS 7 Bible Online

AMOS 7 - Termanu bible

AMOS 7

¹Au hapu ninitak esa neme MANETUALAIN Fo Mademaina mai. Au ita nakadada'dik lamak bubuaina esa, nai lelek hataholi-la ke'di basa na'u fe manek-ka, de na'u-a mulai moli beuk seluk.

²Lamak sila hii-hii nae la'a basa na'u-aiana manai dae lain-na. Boema au afa'da ae, “MANETUALAIN Fo Mademaina, fe do'o do ampon neu O anam-mala! Sila kome'doana nanseli, ma tapandoes-sala, de tao leo bee fo bisa lakatatakak?”

³MANETUALAIN dodoo nasafali dale tutu'un-na, de nafa'da nae, “Hata fo o mitak ndia, neukose ana ta da'di fa.”

⁴Au hapu ninitak esa seluk neme MANETUALAIN Fo Mademaina mai. Au ita naheheleaon, fo Ana huku anan-nala nenik ha'i. Ha'i ndia na'a heni tasi manai daebafak-ka buin-na ma ana mulai na'a heni tina-la.

⁵Boema au afa'da ae, “Ou MANETUALAIN Fo Mademaina, ela leo been-na, fe ha'i ndia nate'e leon! O anam-mala kome'doana nanseli, ma tapandoes-sala, de tao leo bee fo bisa lakatatakak?”

⁶MANETUALAIN dodoo nasafali dale tutu'un-na seluk, de nafa'da nae, “Ia boeo, neukose ta da'di fa.”

⁷Au hapu seluk ninita fe'ek esa neme MANETUALAIN mai. Au ita napadeik nai papala-nanadamak esa boboan-na, fo ala tao papala-nanadamak ndia nenik ala pake tali uuku matetu lee-leek esa. Ana ho'u tali uukuk ndia nai liman-na, fo Ana mete, ade papala nanadamak ndia napadeik natetu do ta.

⁸Boema natane au nae, “O mita beek, Amos?” Au ataa ae, “Tali uuku matetu lee-leek, MANETUALAIN.” Boema MANETUALAIN nafa'da nae, “Au pake tali uukuk ia, fo natu'du nae, Au anang-ngala sama leo papala-nanadamak matahik-ka. Neukose, Au ta dodoo asafali Au dale tutu'ung-nga so'on. Tao leo bee-o, neukose Au hukus.

⁹Neukose Au tao akalulutuk la'iesak mamanak fo Isak tititi-nonosin paken soaneu sene-do'ok nai ndia. Neukose Au tao atu'u hataholi Israel-la mamana malalao-malalafun-nala. Neukose Au tao amopo-amate Mane Yerobeam-ma tititi-nonosin.”

¹⁰Amazia, imam nai Betel, ana haitua halak ia neu Yerobeam fo Israel manen-na nae leo ia, “Amos tutu'u eno mangalauk no laun-nala, fo ala la'ban Manek-ka. Neukose ana tao nakalulutuk nusak ia, nenik dede'a-kokola manadudungu-papau laun-nala.

¹¹Nafa'da nae, neukose mate Manek-ka nai musu dale, ma tao leo bee-o, hataholi Israel-la nanafook leo mamana tu'u-tapak, fo dook-ka neme nusan-nala mai.”

¹²Boema Amazia nafa'da Amos nae, “Hai nabi, fali leo Yehuda muu leona! Fo tui-benga nai naa. Nemen-na, fo hataholi sila fe o nana'a-nininuk!

¹³Boso boe tui-benga nai Betel bai. Kota ia soaneu ka'da manek-ka mesak-kana, ma basa hataholi manai nusak-ka lala'en-na, mamana makaluku-makatelen.”

¹⁴Boema Amos nataa nae, “Au ta nde nabi fo ana tui-benga soaneu hapu doik fa. Tunga ndoon-na, au hataholi manamakaboboi bana-manu ma manaseu kaa boak.

¹⁵Tehu MANETUALAIN naloo au neme au tatao-nono'ing dalek mai, de nadenu au anduku-alosak hala hehelun-na neu hataholi Israel-la.

¹⁶Hu ndia de, mamanene hata fo MANETUALAIN nafa'dan neu emi. Nanahu o kena-ka'i au tui-benga fo la'ban leoina Israel-la.

¹⁷MANETUALAIN nafa'da nae, neukose o saom-ma da'di ina manasosoa piaok nai kota enon-nala lain, ma mate o anam-mala nai natee-natatik dale. O daem-ma neukose nanababa'ek neu hataholi fe'ek, ma neukose mate o nai hataholi fo ta lalelak MANETUALAIN nusa-namon. Tao leo bee-o, neukose Israel laun-nala nanafook leo mamana tu'u-tapak neu, fo dook-ka neme nusan-na mai.”