Read Termanu AMOS 9 Bible Online

AMOS 9 - Termanu bible

AMOS 9

¹Au ita MANETUALAIN napadeik deka no mei tunu-hotuk-ka. Ana fe paleta nde ia, “Fepa mapane'e basa dii lupek manai Au Uma nga, fo ela basa uma laten-na lala'en-na nanggengo. Soli matu'u dii sila-la leo hataholi-la langan lain neu. Ta mate see fa soona, neukose Au taoisan nai natee-natatik dale. Hataholi esa boen, ta hapu nalai fa, ma neukose ta hapu hataholi esa boen naladeak fa.

²Leomae ala tola leo hataholi manamatek-kala daebafan dale leu boeo, neukose Au hapus. Leomae ala kae leo lalai leu boeo, neukose Au akona henis leme naa mai.

³Metema ala ke'ke nai Lete Karmel-la poin-na soona neukose, Au sangas fo Au ho'u-alas. Metema ala ke'ke nai tasi buin-na, soona neukose Au paleta menge matuaina fo ana kaa nalas.

⁴Metema musu-a ho'u nalas soona, neukose Au fe paleta fo taolisas. Au daleng-nga natea basa soaneu tao amopo-amates, de ta hapu manatulu-fali, tulu-fali fas.”

⁵Daebafak-ka nanggengo, de laun-nala dalen-na susa, nanahu MANETUALAIN Fo Mademaina ma Manakoasa koi la'es. Sama leo Lee Nil-la luu mai, ma ana ma'da neu, leondiak boe, ala kae leo lain leu boema ala tu'da.

⁶MANETUALAIN nafofo'a Uman-na nai dook-ka nanseli, nai lalai Ana pasak lalai-a nai daebafak-ka poin-na, fo da'dileo Ndia danon, ma Ana po'a tasi oe-a leo dae ma'dak lain neu, fo manatao basa sila-la, na'den-na nde MANETUALAIN!

⁷MANETUALAIN nafa'da nae, “Hai hataholi Israel-la lemin, Au taoafik neu hataholi Sudan-nala, sama leo Au taoafik neu emi. Au o falik hataholi Filistin-nala leme Kreta mai, ma hataholi Siria-la leme Kir mai, sama leo Au o emi neme Masir mai.

⁸Au, MANETUALAIN Fo Mademaina, Au mete besa-besa o nusa Israel fo masala-masingok ia, de neukose Au tao alas mopok-kasa leme daebafak-ka poin-na mai. Tehu Au ta tao amopo-amate basa Yakob tititi-nonosin-nala fa, Au fo MANETUALAIN nde manakokolak-ka.

⁹Neukose Au fe paleta, ma Au da'i-lelee leoina Israel-la, sama leo hataholi-a da'i-lelee gandum-ma nai ooko dale, fo soaneu tipa heok hataholi sosoa-ndandaa taak-kala nai sila dalek. Neukose Au dopok-kasa nai leoina-la tala'da.

¹⁰Hataholi masala-masingok manai Au anang-ngala dalek, lafa'da lae, ‘Neukose Manetualain ta po'ilotak susa-soe tuni-ndeni ita fa.’ Tehu tete'ek-ka, neukose ala taolisas lai natee-natatik dale.”

¹¹ MANETUALAIN nafa'da nae, “Neukose fain-na losa, Au tao-a Dauk nusan-na fo'a seluk. Besak ia, nusak ndia da'di sama leo uma fo ana tu'u neu so. Tehu neukose Au tao ahii papala nanadaman-nala, fo Au afofo'a falik-kana, fo ana da'di sama leo makahulun eli.

¹²Hataholi Israel-la neukose ala koasa bei ela nusa Edom-ma boema basa leoina fo makahulun-na Au nuung. Au, MANETUALAIN, kokolak basa so, de neukose Au tao atetu dede'ak ndia.”

¹³MANETUALAIN nafa'da nae, “Neukose fain-na losa, gandum-mala moli no lai-laik, nalosa fai ketu-koluk-ka tuti-nato. Neukose ai angol-la moli makadotok nanseli, nalosa hataholi-a ta hahae tao angol fa. Neukose oe angol-la titi neme letek-kala, ma neme pupukuk-kala mai.

¹⁴Neukose Au tao-a Au anang Israel, da'di namasu'i seluk. Neukose lafofo'a seluk sila kota nalutun-nala, fo ala leo nai naa. Neukose ala sele osi angol fo linu oe angol. Neukose ala tao tina osi, fo la'a-linu buna-boan.

¹⁵Neukose Au fe Au anang-ngala, leo nai nusak fo Au fe basan neu sila so. Neukose, ala ta kalua leme naa mai so'on. Au MANETUALAIN fo sila Manetualain-na nde manakokolak-ka.”