Read Termanu YUNUS 3 Bible Online

YUNUS 3 - Termanu bible

YUNUS 3

¹MANETUALAIN kokolak no Yunus neu ka la'i dua-na.

²Nae, “Muu leo Niniwe, fo kota matua ndia, fo manduku-malosak neu laun-nala, hala heheluk fo Au fen neu o.”

³Boema Yunus tunga MANETUALAIN de neu leo Niniwe, fo kota esa matuaina nanseli; nalosa paluu ana la'ok faik telu dalen-na.

⁴ Yunus masok kota ndia, de ana la'ok basa faik katemak esa, boema ana mulai tui-benga nae, “Faik 40 seluk soona, neukose Niniwe nakalulutuk!”

⁵Laun Niniwe-la lamahele Manetualain hala hehelun ndia. Basa laun-nala lala'en-na, ho'i nakeketuk fo ala oka aon-nala, nau matua do ana boe, ala pake lafa kalong fo latu'du lae sila tukatei-saledale leme sila sala-singon mai.

⁶Lelek mane Niniwe, namanene halak ndia boema, ana fo'a napadeik de no lai-laik ana la'o ela kandela manen-na. Ana o'du heni ba'du manen-na, de ana pake si'di kalong, boema nangatuuk neu afu lain.

⁷Boeo, ana po'i paleta esa ia nae, “Paleta ia, nanakaluak nai Niniwe, no paleta neme manek-ka ma basa mane sion-nala: Basa hataholi, sapi, bi'ilopo ma bana fe'e-fe'ek-kala, ta bole la'a ma linu fa.

⁸Hataholi la ma bana-manu muse pake si'di kalong. Fo da'dileo ta'du-tana nasasale dalek, basa hataholi-la muse hule-haladoi te'e-te'e neu Manetualain. Sila muse tao matalolole sila ha'da tatao mangalaun-nala, ma sila ha'da-tataon fo henuk no sala-singok-ka.

⁹Fafa'kama Manetualain dodoo nasafali dale tutu'un-na, fo ta namanasa so'on, nalosa Ana ta tao nakalulutuk ita fa!”

¹⁰Manetualain nita sila tatao-nono'in-nala. Nita, ala tu'u-tapa heni sila ha'da-tatao mangalaun-nala so. Boema Ana dodoo nasafali nakeketun-na, de Ana ta da'di huku fas.