Read Termanu YUNUS 4 Bible Online

YUNUS 4 - Termanu bible

YUNUS 4

¹Yunus ta nau sipok Manetualain nakeketun; ndia makandondook fa de namanasa.

² Boema, ana hule-haladoi nae, “Ou MANETUALAIN, ade makahulun-na au beita la'o eme au umang mai fa, au afa'da basa ae, tao leo bee o, neukose O tao leoiak hetu? Hu ndia de, au alai tutik leo Spanyol u! Au bubuluk basa, O Manetualain fo manasue ma manalai, ta haelai mamanasa, dale mangana'uk, ma O maheheleaom tataas esa, fo O dodoo masafali O dale tutu'um la'eneu huhukuk-ka.

³ Besak ia, ou MANETUALAIN, nemen-na fo au mate leona, nana malole lenak au mate neme au aso'da.”

⁴Boema MANETUALAIN, nataa nae, “O ta hapu ne'ek soaneu mamanasa leo ndiak fa.”

⁵Basa boema, Yunus neu leo kota boboan dulu neu, de nangatuuk neme ndia. Ana tao-na lalaak esa, de nangatuuk neu dalek, fo nahani hata da'di nai kota Niniwe.

⁶Boema, MANETUALAIN nakamomolik aiana malolongek esa, fo nasulu Yunus nalosa Yunus namahoko. Memak, Yunus namahoko nanseli neu aiana ndia.

⁷Tehu nai lelek dulufula boema, Manetualain nakadada'dik-na kalatik esa, de ana e'do aiana ndia okan-na, nalosa ana male.

⁸Le'do tii boema, Manetualain fe ani mato'bik-ka neme dulu mai. Isabai-na Yunus sapala'o, nanahu le'do haan-na la'en, de langan-na nono'ka bai nanahotuk-ka. Boema ketu namahehenan-na, de nahiik mate leona. Nafa'da nae, “Malole lenak au mate, neme au aso'da!”

⁹Tehu Manetualain nafa'dan nae, “Ta nandaa, o dale he'di leondiak hu ka nde aiana ndia mamaten-na fa!” Boema, Yunus nataa nae, “Tao leo bee de, ta? Ndandaan-na, au amanasa anseli losa mate dei.”

¹⁰Boema MANETUALAIN nafa'dan nae, “Aiana ndia, ana moli ka'da nai le'odaek esa mesak-kana, ma ana male nai fai manamaik-ka; o ta makamomolik ma makaboboin makandondook fa. Leomae leondiak boe, o dale ma he'dis-sa, nanahu ana male.

¹¹Hapu nai bee, Au daleng-nga ta he'dis-sa, no dudu'a-dodoo Niniwe, kota matuaina ndia fa. Nana fe'ek neme bana fo ta hapu leke-na dede'un-nala ndia fa, nai ndia boeo hapu ni'iana lena neme 120.000 ala beita hapu mete lalelak, beek kande malole, do beek kande mangalauk fa.”