Read Termanu BILANGAN 10 Bible Online

BILANGAN 10 - Termanu bible

BILANGAN 10

¹MANETUALAIN nafa'da Musa nae,

²“Tao-ma pupuuk dua neme lilofulak nanatutuk-ka mai, fo maloo laun-na lakabubua, do soaneu madenus fo ala la'o.

³Metema puu la'iesak duas, fo liin-nala dook-ka besak-ka nate'e soona, sosoan-na nae, hataholi-la lala'en-na muse lakabubua nai o boboa-kaisum, nai Au Lalaa Temang-nga lelesu bafan-na.

⁴Tehu metema puu ka'da esa soona, sosoan-na nae, ka'da lasi-lasik-kala nde muse lakabubua lai o boboa-kaisum.

⁵Metema pupuuk-ka nalii ta dooanak fa soona, ndia ta'dun-na nae, leo-leo fo manaofu nai boboak dulu, muse la'o leona.

⁶Metema pupuuk-ka nalii ta dooanak soaneu ka la'i dua-na, soona leo-leo manai boboak kona, muse la'o leona. Da'di, metema pupuuk-ka nalii ta dooanak fa soona, sosoan-na nae, hataholi-la muse la'o,

⁷tehu metema pupuuk-ka nalii dook-ka soona, sosoan-na nae, hataholi-la muse lakabubua.

⁸Basa imam-mala, Harun anan-nala nde muse puu pupuuk sila-la. Emi muse tunga nakanenetek sila-la, losa dodoon-na.

⁹Ma metema emi matee-mata'ti nai emi nusam-ma, fo emi masala'e emi aoinam-ma neme musu-a mamain-na soona, puu pupuuk sila-la. Soona Au MANETUALAIN, fo emi Manetualaim-ma neukose tulu-fali, ma soi-tefa emi neme emi musum-ma mai.

¹⁰Boeo nai fai-faik fo emi mamahoko-stelee, fo nde nai feta-dote Bula Beuk, ma feta fe'e-fe'ek-kala soona, pupuuk sila-la muse nanapuuk, nai lelek emi tunu-hotu fe Au, tutunu-hohotu nanatunuk, ma tutunu-hohotu mole-dame. Soona neukose Au tulu-fali emi. Au nde MANETUALAIN, fo emi Manetualaim-ma.”

¹¹Leoina Israel-la la'oela Masir neu teu ka dua-na, fo nai hataholi Yahudi-la bula ka dua-na, fain duahulu, ko'as-sa kae neme MANETUALAIN Lalaa Teman lain mai.

¹²Boema hataholi Israel-la, la'o latutungao, fo la'oela moo solokaek Sinai-a, de lelek ala losa moo solokaek Paran-na boema, ko'as ndia nate'e.

¹³Ndia nde ala la'o makasososan fo no MANETUALAIN paletan-na tunga Musa.

¹⁴Manala'o makahuluk-ka nde solda'du Yehuda-la, de bubuak esa basa soona, bubuak esa: fo Aminadab anan Nahason nauli-nalanga leo Yehuda,

¹⁵Zuar anan Netaneel, nauli-nalanga leo Isakhar-ra,

¹⁶Helon anan Eliab, nauli-nalanga leo Zebulon-na.

¹⁷Boema ala ofe heni MANETUALAIN Lalaa Teman-na, de leo-ingu Gerson-na no leo-ingu Merari-la ndolo-la Lalaa Temak ndia de, ala la'o leona.

¹⁸Basa boema, Ruben solda'dun-nala la'o, de bubuak esa basa soona, bubuak esa tunga; Syedeur anan Elizur nauli-nalanga leo Ruben-na.

¹⁹Zurisyadai anan Selumiel, nauli-nalanga leo Simeon-na,

²⁰ma Rehuel anan Elyasaf, nauli-nalanga leo Gad-ta.

²¹Basa ndia boema, hataholi Kehat fo manandolo bua-lo'as malalao-malafuk-kala, ala la'o. Lelek ala losa mamana ofu beuk-ka, te MANETUALAIN Lalaa Teman-na nananapadedeik seluk so.

²²Basa boema, leo Efraim-ma solda'dun-nala tunga, de bubuak esa basa soona, bubuak esa tunga; Amihud anan Elisama, nauli-nalanga leo Efraim-ma,

²³Pedazur anan Gamaliel, nauli-nalanga leo Manasye-a,

²⁴ma Gideoni anan Abidan, nauli-nalanga leo Benyamin-na.

²⁵Mate'en-na, leo Dan-na solda'dun-nala la'o. Sila nde been-na manamanea nai basa solda'du-la dean-na: fo Amisyadai anan Ahiezer, nauli-nalanga leo Dan-na.

²⁶Okhran anan Pagiel, nauli-nalanga leo Asyer-ra,

²⁷ma Enan anan Ahira, nauli-nalanga leo Naftali-a.

²⁸Metema, hataholi Israel-la lali mamanak soona, solda'dun-nala bubuak esa la'o, fo basa soona, bubuak esa tunga. Ito-aton leondiak.

²⁹Musa nafa'da palan Hobab, fo Rehuel hataholi Midian ndia anan-na nae, “Neukose ami la'o leo mamanak fo tunga MANETUALAIN nafa'dan-na nae, neukose Ana fen neu ami. MANETUALAIN helu basa hata fo malole, soaneu hataholi Israel-la. Da'di, tunga ami leona, te neukose ami tao malole soaneu o.”

³⁰Hobab nataa nae, “Makasi ba'uk-ka, tehu au ahiik fali leo au nggolo-ta'dung-ngu.”

³¹Musa nae, “Boso la'oela ami, fo o da'di ami manamatu'du enom, nana o bubuluk ita ofu nai mamanak beek kande nai moo solokaek-ka.

³²Metema o tunga, soona basa hata malole lala'en fo MANETUALAIN taon ba'eneu ami, neukose ami taon ba'eneu o boe.”

³³Leoina Israel-la la'oela basa Sinai, fo MANETUALAIN lete leleon-na boema, ala la'ok faik telu dalen-na. Leni MANETUALAIN Peti Hehelu-balataan, fo nakahuluk sila tataas esa, soaneu ana sanga fes mamana ofu.

³⁴Metema ala la'o leme mamana ofu mai soona, nai fai lele'don-na, MANETUALAIN ko'an-na nai sila lain tataas esa.

³⁵ Nai lelek ala sanga ndolo Peti Hehelu-balataak ndia soona, Musa kokolak nae, “Fo'a leona, ou MANETUALAIN fo tao tapasasala o musum-ma, fo ela hataholi fo ta lahiik O fa, lalai.”

³⁶Ma nai lelek Peti Hehelu-balataak ndia losa mamana hahaeaon-na soona, Musa kokolak nae, “Fali maim-ma leon, ou MANETUALAIN muu leo teidalek Israel fo lifu-lifun sila-la muu.”