Read Termanu BILANGAN 11 Bible Online

BILANGAN 11 - Termanu bible

BILANGAN 11

¹Neu faik esa boema, leoina ndia mulai haladoi neu MANETUALAIN la'eneu sila toto'a-tataan. MANETUALAIN namanene sila haladoin ndia boema namanasa, de Ana fe ha'i mai neus. Ha'i ndia sii lapa-lapa nai sila tala'da, de na'a heni lalaa ofu-a seli.

²Hataholi sila-la nggasi beeau, loke Musa tulu-falis. Boema, Musa hule-haladoi neu MANETUALAIN, de mate ha'i ndia.

³Hu no manada'dik ndia de, mamanak ndia nanafoik na'de Tabera, nanahu nai mamanak ndia, MANETUALAIN ha'i-na pila lo'a-lo'a nai sila tala'da.

⁴Nai hataholi Israel sila-la leleo-lala'on-na dalek, hapu hataholi nusa dea-la tunga boe. Hataholi sila lahiik lanseli la'a paa, ma hataholi Israel-la boeo mulai haladoi. Lafa'da lae, “Ah, See kande, neukose ana fe ita ta'a paa?

⁵Ita tafandele neu i'ak fo ita ta'an nai Masir no ta nanabaek fa, neu titimupokok, puteka, laisona se'da, laisona pilas ma laisona fulak!

⁶Besak ia, basa ita be'i-balakain nanahu ta hapu nana'a fe'ek fa, te ita tita ka'da koki manna mesak-kana.”

⁷ Manna ndia lupan-na sama leo ai de'e kome'doana, fo dula fula kunik.

⁸ Nai fai le'odaen-na soona, loti manna ndia tu'da sama-sama no dinis-sa mai leo mamana ofu-a neu. Fafain-na, hataholi-la la'ok leu-mai fo ala hele lakabubuan, fo ala kekenok-kana, do ala paun da'di ha'desopuk, fo ala taon da'di koki bobongo ni'is. La'dan-na sama leo kokis fo nanatunuk nenik mina setun.

¹⁰Musa namanene hataholi Israel sila-la beemumu, boema lapadeik bubua-bubuak-kala nai sila lalaa ofun-na, lelesu bafan-na. Boema MANETUALAIN nasan-na lua ponu-ponu, nalosa Musa name'da dalen-na he'dis-sa.

¹¹Boema, nafa'da MANETUALAIN nae, “Tao le'e de, O tao susa au leoiak? Ade O ta mahiik au fa do? Tao le'e de, O fe au mete-lakanae basa hataholi ia-la?

¹²Ade au nde ailu do bongi sila do? Tao le'e de, O madenu au da'di sama leo hataholi manako'o-ifa esa, fo ko'o ni'iana me'doana, nalosa au muse anea aheles, nai leleo-lala'o manalu dalek, leo dae fo O helu fen neu sila bei-ba'i kain-nala do?

¹³Mete mitak-kasa, ala nggenggele lakandondoo henin loke paa. De au muse sanga paa nai bee fo fe basa hataholi sila-la?

¹⁴Au ta lu'a abe'i lulu'a-lelepa matuaina ndia fa; bela-ba'uk ndia, belan-na seli ba'eneu au!

¹⁵Metema MANETUALAIN tao nakandoo au leoiak soona, sue-lai au dei; malole lenak, taomisa au no lai-laik fo ela au boso boe lu'a-lepa doidosok ia bai.”

¹⁶Boema MANETUALAIN nafa'da Musa nae, “Maloo makabubua leoina Israel-la hele lasi ka hituhuluk fo da'di leo mauli-malangan leoina. Moos leo Au matang mai, nai Au Lalaa Temang dale, boema madenus lapadeik leu ndia, nai o boboam-ma.

¹⁷Neukose Au kona mai, fo Au kokolak os nai mamanak ndia, ma Au fe basa o, Au koasang-nga seli ndia, neukose Au fen leo sila neu. Soona ala bisa lu'a-lepa fali o, soaneu leoina ia, fo daenga boso o mesam-ma lu'a-lepan.

¹⁸Besak ia mafa'da leoina ndia, dede'ak-ka nde ia nae, Tao malalao-malalafu emi aoinam-ma, soaneu balahaa; te neukose emi mi'a paa. MANETUALAIN namanene emi kii so, ma emi haladoim mae emi hii mi'a paa, ma emi mae nai lelek emi meme Masir-ra, emi ua-nalem malole lena. Besak ia, neukose MANETUALAIN fe emi paa fo emi bole mi'a.

¹⁹Neukose emi mi'an ta ka'da nai faik esa do dua dalen fa, do faik lima do faik sanahulu fa, nakalenak ta ka'da faik duahulu fa,

²⁰tehu emi mi'an bula katemak esa dalen-na, losa emi mamahe'di-mapalau, ma emi muta hu kande nana'ak ndia. Manada'dik ndia ana da'di, nanahu emi tipa MANETUALAIN fo manai emi tala'da heom-ma. Ma boeo, hu kande emi kii basa nai matan, ma emi haladoi mae emi la'oela dae Masir-ra so.”

²¹Boema Musa nafa'da MANETUALAIN nae, “Leoina fo au auli-alangas ia-la dede'un-na, hataholi lifun natun nee. Tao leo beek de, O bisa mafa'da mae neukose O fes paa dai bulak esa dalen-na?

²²Hapu sapi ma bi'ilopo de'u-de'u basa sila-la nai bee, fo do'do-ta'ti fes, fo daenga la'a losa lakabete? Ade basa i'ak manai tasi dale-la dai soaneu fes la'a do?”

²³Boema MANETUALAIN nataa nae, “Ade Au koasang-nga matoo-lanek do? Neukose no lai-laik o mita, ade Au afa'dak ndia, tete'ek-ka ana da'di do ta!”

²⁴Boema Musa neu leo deak neu, de nanduku-nalosak hata fo MANETUALAIN nafa'dan ndia. Musa naloo nakabubua mauli-malangan ka hituhuluk-kala, de nadenus lapadeik okofeo-la MANETUALAIN Lalaa Teman-na.

²⁵Boema MANETUALAIN kona nai ko'as dale, de Ana kokolak no Musa. MANETUALAIN ho'in-na koasa fo Ana fe basa Musa seli ndia, de Ana fen leo mauli-malangan ka hituhuluk sila-la neu. Lelek MANETUALAIN Duladalen-na kona neu hataholi sila-la lain boema, ala mulai laloo beebou sama leo nabi-a, tehu ta dook-ka fa.

²⁶Nai mauli-malangan ka hituhuluk sila-la dalek, hapu sila dua fo nde, Eldad ma Medad, lahele nai lalaa ofu dale, de ta leu sama-sama loo fe'ek-kala leo MANETUALAIN Lalaa Teman-na leu fa. Duladalek-ka kona neu hataholi ka duak sila-la lain neme lalaa ofu ndia dalek, de duas boeo laloo beebou sama leo nabi-a.

²⁷Boema touanak esa nalai leo deak neu fo nafa'da Musa, hata fo ana da'di neu Eldad ma Medad so.

²⁸Nun anan Yosua, fo ana fali Musa ndek tepo-lelek muli-solun-na, nafa'da Musa nae, “Madenus fo ala hahae leona, Ama!”

²⁹Boema Musa nataa nae, “Tao le'e de, o dudu'a-dodoo la'eneu au? Lena-lenak au amahena, fo ela MANETUALAIN fe Duladalen-na, neu leoinan-na lala'en-na, ma taon-nala basa-basas da'di nabi!”

³⁰Boema Musa no mauli-malangan ka hituhuluk sila-la fali le'us sama-sama leo lalaa ofu-a leu.

³¹No kaiboik, MANETUALAIN fe anin-na neme tasi-a mai; anin ndia fuu neni manupui kukuhak-kala, ala laa taidaeanak nanseli, de dedeman-na ka'da metel esa neme dae lain mai. Ala be laa nai mamana Lalaa Temak ndia lain, de loloan-na losa kilo de'ubee lala'en-na.

³²Nai faik ndia dalen-na, ma nai le'odaek ndia dalen-na, ma nai fai balahaan-na dalek, hataholi-la lapue ho'u manupui kukuhaak. Hataholi esa soona, ana ho'un-na nai dae, kilo lifun esa. Ala nggenge-la manupui sila-la nai lalaa ofu-a boboa-kaisun fo ela lamatuu.

³³Lelek bei hapu paa makadotok fo la'a, MANETUALAIN namanasa leoina ndia nanseli, de Ana fe he'di-laus esa la'es.

³⁴Boema mamanak ndia nanafoik na'de, “Loo-lates Maa kaolok” nanahu nai mamanak ndia, latoi-latono hataholi fo mates, hu kande maa fula-nala.

³⁵Leoina ndia lali leme ndia leo nusa Hazerot-ta leu, boema ala ofu leme mamanak ndia.