Read Termanu BILANGAN 12 Bible Online

BILANGAN 12 - Termanu bible

BILANGAN 12

¹Musa saon-na ina Kus esa, de Mariam no Harun tao sasa'ok ndia da'di netes, fo lakamuu Musa.

²Lafa'da lae, “Ade, MANETUALAIN kokolak ka'da tunga Musa mesak-kana do? Ade, Ana ta kokolak tunga ita boen do?” MANETUALAIN namanene sila hala-kokolan.

³Musa nde been-na, hataholi esa, dale nakaloe nakadae aok nanseli, lena heni basa hataholi manai daebafak ia lala'en-na.

⁴No kaiboik, MANETUALAIN nafa'da Musa, Harun ma Miryam nae, “Emi telu meu leo Au Lalaa Temang-nga meu dei.” Boema telus leu leo ndia leu,

⁵de MANETUALAIN kona nai dii ko'as dale mai. MANETUALAIN napadeik neu Lalaa Teman-na lelesun-na, de naloo Harun boema Miryam. Boema duas tutulumatak,

⁶boema MANETUALAIN nae, “Mamanene Au dede'a-kokolang ia-la! Metema nai emi dalek, hapu nabi esa soona, Au atu'du Au aoinang-nga neun, nai ninitak-kala dalek, ma Au kokolak on nai me'is dale.

⁷ Tehu, soaneu Au atang Musa soona, ta leondiak fa. Nai Au anang-ngala dalek, ndia nde manalilinekak.

⁸Ma Au kokolak on, matak no matak, no mangale'dok, te ta no neneuk fa. Nakalenak, nita Au mata-panang so boe! Tao le'e de, emi mapalani la'ban Musa, fo Au atang ndia?”

⁹MANETUALAIN namanasa duas nanseli, de Ana la'o.

¹⁰Lelek ko'as ndia, la'oela MANETUALAIN Lalaa Teman-na boema, Miryam hapu he'di lou mangalauk; loun-na fulak, sama leo abas-sa. Lelek Harun lipa leo Miryam neu te, nita he'dis ndia la'e Miryam so,

¹¹boema nafa'da Musa nae, “Ka'a e, fali ma ami dei, fo boso po'ilotak ami doi-doso, nanahu sala-singok, fo ami taon no ami nggoam-ma.

¹²Boso po'ilotak-kana, da'di sama leo ni'iana fo bongin te, maten de hihii nae, naboo so.”

¹³Boema, Musa naloo bou-bou neu MANETUALAIN nae, “Ou Manetualain, au dokodoe fo ela-leo been-na, fen lea-hai leona!”

¹⁴ Boema MANETUALAIN nataa nae, “Leouni'ka, aman nasapula ape neu mata-panan soona, ade ana ta lu'a-lepa mamaek, faik hitu dalen-na fa do? Fen pasi fe'e neme lalaa oofuk dale, nai faik hitu dalen-na, fo basa ndia soona, besak-ka ana bole masok falik.”

¹⁵Boema Miryam nanakalua henik faik hitu dalen-na, neme lalaa oofuk dale mai, nalosa leoina ndia, ta bole lali leme mamanak ndia mai fa, metema Miryam beita fali ma'in leo lalaa oofuk-ka mai fa.

¹⁶Basa boema, ala la'oela Hazerot, de ala ofu leme moo solokaek Paran-na.