Read Termanu BILANGAN 14 Bible Online

BILANGAN 14 - Termanu bible

BILANGAN 14

¹Leo'dae katemak esa dalen-na, hataholi Israel-la nggasi ma ala kii-kii mesan.

²Ala bemumu loo Musa no Harun lae, “Malole lenak, ita mate nai Masir, do nai moo solokaek ia. Nemen-na fo, ata mate leona.

³Sosoak hata, MANETUALAIN no ita leo nusak ndia neu? Neukose, ita mate nai natee-natatik dale, fo ala foo leni ita sao-anan-nala. Ade ta malole lenak, ata fali te'ut-tala leo Masir teu fa do!”

⁴Boema esa nafa'da esa nae, “Malole lenak, ata hele ta mauli-malangan esa, fo no ita fali te'ut-tala leo Masir teu!”

⁵Boema musa no Harun, senek leu basa laun-na matan-na.

⁶Yosua, fo Nun anan-na, ma Kaleb, fo Yefune anan-na, fo hataholi ka duak ia-la, lai manamakuk sila-la dalek boe, ala sisii-lulu'i bua papaken-nala, fo da'di neu ta'du-tana manasusak.

⁷Lafa'da basa laun sila-la lala'en-na lae, “Nusak fo ami meu maku besa-besa moon ndia, lolen-na seli.

⁸Metema MANETUALAIN sue ita soona, neukose no ita leo naa teu, fo Ana fe dae kamasu'ik ma maoe-maisik ndia leo ita mai.

⁹ Boso la'ban MANETUALAIN, ma boso bii-mamata'u neu hataholi manaleo manai nusak ndia, nana neukose ita sengis, no mu'dak. Nana manamasulu-mahapas-sala, ana la'oelas so, de MANETUALAIN nook ita. Da'di boso bii-mamata'u.”

¹⁰Basa laun-na lala'en-na, ala kekeme, sanga tapa lenik-kasa batu, losa mates. Tehu no kaiboik, hataholi sila-la lita MANETUALAIN masa'an-na to'da mai, nai Lalaa Teman lain.

¹¹MANETUALAIN nafa'da Musa nae, “Hataholi ia-la, la'ban Au losa faihi'da? Losa faihi'da seluk bai, fo hataholi ia-la ta nau lamahele Au fa, leomae Au tao basa manada'di beuk makadotok nanseli, nai sila matan so?

¹²Neukose, Au tao amopo-amates nenik Au fe he'di laus madaik-ka la'es. Tehu, neukose Au tao o da'di amak, neme leoina esa matua lena, ma balakain-na lena henis!”

¹³ Boema, Musa nafa'da MANETUALAIN, nae, “Ou MANETUALAIN, neukose hataholi Masir-rala, lamanene dede'ak ndia! Te se'kona, no O koasam-ma, de O moo falik ami meme nusak ndia mai so,

¹⁴de neukose, ala tuin neu nusak ia hataholin-nala lamanene basa, lae O, fo MANETUALAIN, sama-sama moo ami. Boeo, lamanene basa, lae O matu'du O aoinam-ma neu ami, nai lelek O la'ok nai ami uluk, nai dii ko'as dale, nai fai lele'don-na, ma nai dii ha'ik dale, nai fai leodaen-na.

¹⁵Metema, O taomisa la'iesak O anam ia-la, soona leoina fo lamanene basa la'eneu O na'dem nananita-nalelam ndia soona, neukose lafa'da lae

¹⁶O taomisa O anam-mala neme moo solokaek-ka, nanahu O ta mapalani moos leo nusak fo O helu basak-ka leu fa.

¹⁷Hu ndia de, MANETUALAIN, au dokodoe, fo matu'du O koasam-ma neu ami leona, fo makalala'ok hata fo O helu basan so. O mafa'da basa mae,

¹⁸ ‘Au, fo MANETUALAIN, ta haelai amanasa fa. Au atu'du Au susue-lalaing, ma Au lilinekang no ana sasi kao-kao. Au fe do'o do ampon neu hataholi masala-masingok-ka, ma manala'ban Au-a. Leomae leondiak boe, neukose Au balas ina-amak salan-na neu upu-anan-nala, losa bobongi ka telu ma ka haa.’

¹⁹MANETUALAIN, besak ia, hu kande O dale kasiam-ma ba'un-na seli, ma O lilineka neu O hehelum-ma, de au dokodoe, fe do'o do ampon neu hataholi ia-la, sala-singon-nala, sama leo O fe do'o do ampon neus, neme ala la'oela dae Masir-ra.”

²⁰Boema MANETUALAIN nataa nae, “Hei, neukose Au fe do'o do ampon neus, sama leo o hala nonokem-ma.

²¹ Tehu Au aheluk inik Au aoinang-nga, ma nenik Au fo maso'dak, ma manakoasan-nai daebafak ia,

²²ae neme hataholi ia-la mai, ta hapu maso'dak esa boen, soaneu ana masok leo nusak fo, Au helu basan neu sila bei-ba'i kain-nala so. Nana ala ta nau tunga Au, ma ala so'ba Au do'e-do'e. Te se'kona, lita basa Au mandela-masa'ang, ma Au tao manada'di beuk-kala leme Masir ma neme moo solokaek-ka so.

²³Ta! Neukose ala ta masok nusak ndia fa. Neme sila fo, manala'ban Au-a, neukose ta hapu hataholi esa boen, fo ana hapu ta'bu ein-na neu nusak ndia.

²⁴ Tehu ba'eneu Au atang Kaleb soona, ta leondiak fa. Ana lilineka nahele Au. Hu ndia de, neukose Au on leo nusak fo, ana masok hain ndia so. Besak ia, hataholi Amalek-kala, ma hataholi Kanaan-nala, leo lai masadokek ndia. Tehu, neukose, Au atang Kaleb tititi-nonosin-nala lanuu nusak ndia. Balahaa soona, emi muse lepos fali leo moo solokaek-ka, fo meu leo moo solokaek, fo manaleo Namo Akaba neu.”

²⁶MANETUALAIN nafa'da Musa no Harun nae,

²⁷“Losa faihi'da hataholi mangalauk sila, bemumu neu Au? Au amanene sila nakamumuun lala'en-na so.

²⁸Emi muse mataas mae lao ia: MANETUALAIN nafa'da nae, ‘Au soo unik Au fo maso'dak-ka na'den-na, ae neukose Au tao emi, sama leo hata fo, emi mafa'dan nai Au matang-nga. Au, fo MANETUALAIN nde manakokolak-ka.

²⁹ Emi bemumu basa neu Au so. Hu ndia de, neukose mate emi, fo emi popolam-mala, besenggela-besenggali, lai moo solokaek ia lain.

³⁰Nai emi dalek, ta hapu hataholi esa boen, fo teun duahulu leo lain neu, neukose ana masok leo nusak fo Au helu fen neu emi ndia fa, te ka'da Kaleb ma Yosua nde masok leo dalek leu.

³¹Emi mafa'da basa, mae neukose emi anam-mala nanafook. Tehu sila nde, neukose Au os leo nusak fo, emi ta sipok-kana ndia fa, de neukose nusak ndia, ana da'di sila dae-oen.

³²Tehu, neukose mate emi nai moo solokaek ia.

³³ Neukose, teuk haahulu dalen-na, emi anam-mala laleu-lalaak nai moo solokaek-ka. Hu kande, emi ta lilineka fa, de emi anam sila-la, neukose ala doi-doso losa hataholi mate'ek manai emi dalek-ka, maten so.

³⁴Neukose emi lu'a-lepa emi sala-singom, teuk haahulu dalen-na; teuk esa soona, leken da'di faik esa neme faik haahulu fo emi paken, soaneu palisak besa-besa moo dae ndia. Metema Au la'ban emi soona, neukose emi mame'da mita, he'din-na leobeek!

³⁵Au soo, ae neukose Au taon leondiak soaneu neu emi, fo hataholi mangalauk fo malahalak soaneu la'ban Au. Neukose mate la'iesak emi, nai moo solokaek ia. Au, fo MANETUALAIN, nde manakokolak-ka.’ ”

³⁶Musa nadenu basa hataholi, fo leu maku besa-besa loo dae ndia, ala fali ma'is, te leni hala pepekok la'eneu nusak ndia, de halak ndia, taon-na hataholi Israel-la, lakamuu-muu soaneu MANETUALAIN. Hu ndia de, MANETUALAIN hukus, nalosa he'di-laus la'es, de mates.

³⁸Neme manamakuk ka sanahulu duak sila-la, ela ka'da Yosua ma Kaleb nde bei maso'dak-kala.

³⁹Lelek Musa nanduku-nalosak basa MANETUALAIN hala hehelun-na neu leoina Israel-la boema, leoina ndia ana falu no dale he'dik.

⁴⁰Balahaa fafaianak boema, ala laheheleaon fo sanga kae leo letek-ka poin-na leu. Ala lafa'da lae, “Memak, ami masala-masingo basa so. Tehu besak ia, ami maheheleaom basa, fo meu leo mamanak fo MANETUALAIN natu'dun.”

⁴¹Tehu Musa nafa'da nae, “Tao le'e de, besak ia emi nau la'olena MANETUALAIN paletan-na? Neukose emi ta sengi fa!

⁴²Boso meu! Te neukose emi musum-mala sengi emi, nanahu MANETUALAIN ta no emi fa.

⁴³Nai lelek, emi masasalematak mo hataholi Amalek ma hataholi Kanaan sila-la soona, neukose emi mate natee-natatik dale. Neukose MANETUALAIN ta no emi fa, nanahu emi ta nau tunga fan.”

⁴⁴Tehu hataholi Israel sila-la, lakatatasa dale de ka'da kae lakandoo leo letek ndia poin-na leu, leomae Musa ma Peti Hehelu-balataak-ka, ta la'oela lalaa oofuk ndia fa.

⁴⁵Boema hataholi Amalek ma hataholi Kanaan fo manaleo manai naa-la, sapu leona, de ala sengi hataholi Israel-la, boema ala usis losa Horma.