Read Termanu BILANGAN 15 Bible Online

BILANGAN 15 - Termanu bible

BILANGAN 15

¹MANETUALAIN fe Musa

²nakanenetek ia-la, fo leoina Israel manaleo nai nusak fo, neukose MANETUALAIN fen neu sila, muse ala tao tungan.

³Soaneu tutunu-hohotu nanatunuk, do tutunu-hohotuk fo bae nasar, do tutunu-hohotuk no dale hihii-nanau mesan-na, do tutunu-hohotuk nai feta-feta biasa soona, emi bole tunu-hotu fe MANETUALAIN: sapi mane, bi'ilopo mane, bi'ilopo do bi'ihiik. Tutunu-hohotuk sila boon-na, neukose nandaa no MANETUALAIN dalen-na.

⁴Ba'eneu see, fo ana tunu-hotu bi'ilopo do bi'ihiik, soaneu tutunu-hohotu nanatunuk neu MANETUALAIN soona, muse nenin no ha'desopuk nana sese'dok mina setun kilo esa no bana sila-la esa, soaneu tutunu-hohotu nana'ak-ka, ma angol oek litel esa boe.

⁶Metema nanatunu-hotuk ndia, bi'ilopo mane esa soona, muse tunu-hotun no ha'desopu kilo dua nanasese'dok no mina setun litel esa seselik boe, soaneu tutunu-hohotu nana'ak-ka,

⁷ma oe angol litel esa seselik. Tutunu-hohotuk sila-la, boon-na nandaa no MANETUALAIN dalen-na.

⁸Metema nanatunu-hotuk ndia, sapi mane esa, soaneu tutunu-hohotu nanatunuk, do tutunu-hohotu bae nasar, do tutunu-hohotu mole-dame soona,

⁹muse tunu-hotu ha'desopuk kilo telu, nanasese'dok no mina setun litel dua boe, soaneu tutunu-hohotu nana'ak,

¹⁰ma angol oek litel dua. Tutunu-hohotuk sila boon-na, nandaa no MANETUALAIN dalen-na.

¹¹Ndia nde, muse nanatunu-hotuk sama-sama no sapi mane esa, bi'ilopo mane esa, ma bi'ilopo do bi'ihiik.

¹²Metema nanatunu-hotuk ndia, lena neme bana esa mai, soona tunu-hotu ha'desopuk, mina ma angol oek ndia boeo, muse nana popo-tamak tunga esa-esak uuku-dodon.

¹³Lelek hataholi Israel esa, ana tunu-hotu tutunu-hohotuk soona, muse ana tao tunga dede'ak ndia. Tutunu-hohotuk sila boon-na, nandaa no MANETUALAIN dalen-na.

¹⁴Hataholi nusa dea esa, ana leo nai emi nusam dale, nau ana leo ka'da faik de'ubee dalen-na, do ana leo nahele boe, metema ana tunu-hotu nana'ak, fo boon-na nandaa no MANETUALAIN dalen-na soona, ana muse tao tunga basa nakanenetek sila-la.

¹⁵ Basa hoholo-lalanek ma nakanenetek-kala nde been-na, sama soaneu emi ma hataholi nusa dea, fo manaleo nai emi nusam dale-a, nana emi ma sila nde been-na sama, nai MANETUALAIN mata memeten-na. De dede'ak ndia, nanapakek losa dodoon-na.

¹⁷MANETUALAIN fe Musa

¹⁸nakanenetek ia-la, fo leoina Israel fo, manaleo nai nusak fo neukose MANETUALAIN fen neu sila, muse ala tao tungan.

¹⁹Metema emi mulai mi'a nusak ndia buna-boan soona, emi muse ho'i-ma baba'ek esa fo pe'da fe'en, fo da'di tunu-hotu hehelik soaneu MANETUALAIN.

²⁰Metema emi tunu loti, neme gandum nanake'di makasososak-ka mai soona, muse tunu-hotu fe MANETUALAIN loti ndia, fo ana da'di tutunu-hohotu hehelik soaneun. Tutunu-hohotun sama no emi tunu-hotu gandum fo nanapo'de makasososak-ka.

²¹Loti fo, emi taon neme gandum nanake'di makasososak ndia, muse emi fen da'di leo tunu-hotu hehelik neu MANETUALAIN losa dodo-na.

²²Metema emi ta mame'da fa, te emi la'olena nakanenetek esa, neme MANETUALAIN fe basa Musa nakanenetek-kala mai soona, mulai neme faik fo MANETUALAIN fe nakanenetek ndia, losa bobongik leo bobongik neu, ma emi tao salak ndia, nanahu emi ta bubuluk nakanenetek-ka fa, soona emi basa-basamala, muse tunu-hotu sapi mane esa, soaneu tutunu-hohotu nanatunuk. Emi muse tunu-hotu tutunu-hohotu nana'ak ma oe angol, sama-sama no sapi mane ndia, sama leo nakeketuk-ka. Tutunu-hohotuk ndia boon-na, nandaa no MANETUALAIN dalen-na. Fe'ek neme ndia mai, emi muse tunu-hotu bi'ilopo mane esa, soaneu tutunu-hohotu sala-singok hapu do'o do ampon.

²⁵Boema imam-ma muse tao feta sala-singok hapu do'o do ampon soaneu hataholi Israel-la. Soona neukose, ala hapu do'o do ampon, hu kande ta lame'da fa te, ala tao salak so, ma hu kande leni basa tutunu-hohotu sala-singok hapu do'o do ampon, boema tutunu-hohotu nanatunuk neu MANETUALAIN so.

²⁶Basa hataholi Israel-la lala'en-na, ma hataholi nusa dea fo ala leo nai sila nusan dale, neukose hapu do'o do ampon nanahu basa-basan taonou nai salak fo, ta lame'da fa te, ala taon so.

²⁷ Metema ka'da hataholi esa, ta name'da fa te, ana tao sala-singok, soona muse ana tunu-hotu bi'ihii tenak esa, besak-ka teuk esa, soaneu tutunu-hohotuk fo, sala-singok hapu do'o do ampon.

²⁸Imam-ma muse tao feta sala-singok hapu do'o do ampon, nai MANETUALAIN, matan, fo ela hataholi ndia sala-singon, hapu do'o do ampon.

²⁹Nakanenetek ndia boeo, la'e see fo, ta name'da fa te, ana tao sala-singok so, nau ndia hataholi Israel, do hataholi nusa dea, fo ana leo nahele nai sila nusan dale boe.

³⁰Tehu metema, hataholi Israel esa, do hataholi nusa dea esa, ana bubuluk nakanenetek-ka, tehu ana tao sala-singok soona, ndia nana'de nakadadaek MANETUALAIN. Soona muse hukunisa hataholi ndia,

³¹nanahu ana la'ban MANETUALAIN, ma ana bubuluk MANETUALAIN paletan-na, tehu ana la'olenan. Soona hataholi ndia mate, nanahu salan-na.

³²Lelek hataholi Israel-la bei leme moo solokaek-ka, ho'u-la touk esa hila ai ha'i la'e fai Sabat.

³³Boema loo hataholi ndia, neu nataa Musa, Harun ma laun Israel-la lala'en-na,

³⁴boema ala ta po'i touk ndia fali fa, nanahu ala beita bubuluk, muse taon le'e fa.

³⁵Boema MANETUALAIN nafa'da Musa nae, “Muse hukunisa hataholi ndia. Muse no hataholi ndia leo lalaa oofuk-ka deak neu, fo basa hataholi Israel-la lala'en-na, muse tapan nenik batu, losa maten neme ndia.”

³⁶Boema basa-basas loson leo lalaa oofuk-ka deak neu, de ala tapan nenik batu losa maten, sama leo MANETUALAIN paletan-na.

³⁷MANETUALAIN nadenu Musa

³⁸ nafa'da leoina Israel-la nae, “Tao fifikok neu emi bua papakem-mala pe'dan dae, ma pa'a tali balau neu basa fifikok sila-la. Emi muse tao leondiak neme bobongik leo bobongik neu.

³⁹Fifikok sila-la da'di neu nasanene'dak: Nai lelek emi mitan, soona neukose emi mafandele Au paletang lala'en-na fo emi tao tungan. Ma hu kande fifikok sila-la, de neukose emi mafandendelek Au, fo emi ta tunga emi hihii-nanau mesam-ma fa.

⁴⁰Neukose fifikok sila-la fe nasanene'dak neu emi, fo emi tunga la'iesak Au paletang-ngala, nalosa te'e-te'e emi da'di Au nuung.

⁴¹Au nde emi MANETUALAIN; Au o emi kalua meme Masir mai, fo ela Au da'di emi Manetualaim-ma, nana Au nde MANETUALAIN-na.”