Read Termanu BILANGAN 20 Bible Online

BILANGAN 20 - Termanu bible

BILANGAN 20

¹Nai hataholi Yahudi-la bula ka esan-na dalek boema, basa hataholi Israel-la lala'en-na, losa moo solokaek Zin-na, de ala leo lahele leme Kades. Miryam maten, de latoin neme ndia.

²Nai faik esa boema, oe ta sila mamana oofun-na. Boema, hataholi sila-la lakamomotu-la Musa no Harun

³boema bemumu lae, “Malole lenak, sa'di leo been-na, mate ami nai MANETUALAIN matan, sama-sama moo ami tolanom-mala!

⁴Tao le'e de, emi moo ami leo moo solokaek ia mai? Ade, fo ela ami ma ami bana-manum, mate nai ia do?

⁵Sosoak hata, emi moo ami kalua meme Masir, leo mamana doidosok ia, fo ta bisa sele hata-hata esa boen? Nai ia, ta hapu gandum, ta hapu ai kaak, angol, ma dalima fa. Nakalenak oe nininuk boeo, ta!”

⁶Boema Musa no Harun la'oela hataholi sila-la, de lapadeik deka MANETUALAIN Lalaa Teman-na lelesun-na. Ala senek, boema MANETUALAIN mandela-masa'an potin-nalas.

⁷MANETUALAIN nafa'da Musa nae,

⁸“Ho'i-ma ai tete'ek manai Peti Hehelu-balataak-ka matan-na, boema o moo Harun, muse maloo makabubua basa hataholi Israel-la lala'en-na. Nai basa-basas matan, o muse mafa'da neu pupuku batu manai ndia, fo ela nasapoka oe mai. No enok ndia, o kalua oe-a neme pupuku batu ndia dalek mai, fo ela laun-na ma bana-manun-nala hapu linu.”

⁹Boema, Musa neu ho'in-na ai tete'ek ndia, sama leo MANETUALAIN paletan-na.

¹⁰Musa no Harun laloo lakabubua basa hataholi Israel-la lala'en-na, de lapadeik lai pupuku batu ndia matan-na. Boema Musa nafa'da nae, “Mamanene leon, hai leo-ingu manalena-la'ban paleta-la lemin! Ade ami muse kalua fe emi oe, neme pupuku batu ia dalek mai do?”

¹¹Boema, Musa so'uk ai tete'ek ndia leo lain neu, de ana fepan la'i dua, neu pupuku batu ndia. Boema oe-a nasapoka mai, nalosa basa hataholi-la loo bana-manun-nala hapu linu.

¹²Tehu MANETUALAIN fe Musa no Harun nasanene'dak nae, “Hu kande emi namahehelem neu Au-a, beita dai soaneu matu'du Au koasang fo malalao-malalafung-nga, nai leoina Israel-la matan-na, de neukose emi ta mauli-malangas losa ala masok leo nusak fo, Au helu fen neu sila fa.”

¹³Ndia nde oemata Meriba. Hataholi Israel-la bemumu loo MANETUALAIN nai mamanak ndia, ma MANETUALAIN natu'du koasa malalao-malalafun-na neu leoina ndia, nai mamanak ndia boe.

¹⁴Basa boema, Musa nadenu hataholi-la leme Kades, fo leu leo Mane Edom-ma leu. Lafa'da manek-ka lae, “Ami meme leo-leo Israel-la mai, fo bei daak esa moo Tuan. Fafa'kama Tuan bubuluk susa fo manatuni-ndeni nala ami-a so.

¹⁵Ami bei-ba'i kaim-mala, leu leo Masir leu, de ala leo lahele leme naa, teuk lamalala. Hataholi Masir-rala, tao ta malole neu ami, ma ami bei-ba'i kaim-mala,

¹⁶de ami maloo bou-bou neu MANETUALAIN fo moke tutulu-fafalik. Boema namanene ami dokodoem-ma, de Ana nadenu ata nusa so'dak esa mai. Ata nusa so'dak ndia, nauli-nalanga ami kalua meme dae Masir-ra mai. Besak ia, ami nai Kades, fo kota esa nai dae too no Tuan nusan-na.

¹⁷Ami dokodoe, fo sa'di leo been-na, Tuan fe ami loak la'ok tunga nusak ia. Ami ma ami bana-manum, neukose ta singo neme enok-ka mai fa, ma ami ta meu leo tina-la ma osi angol-lala dalek meu fa. Neukose ami ta minu Tuan oedolun-nala oen-na fa. Neukose, ami la'ok tunga ka'da okofoo lain, losa ami kalua meme Tuan nusan-na mai.”

¹⁸Tehu hataholi Edom-mala lataa lae, “Ami ta fe emi loak, la'ok tunga ami nusam-ma fa. Metema, emi mapalani la'ok tunga ami nusam-ma soona, neukose ami sapu-ma emi!”

¹⁹Boema hataholi Israel-la lafa'da lae, “Neukose ami la'ok tunga okofoo lain, fo metema ami, do ami bana-manum linu emi oem-ma soona, neukose ami bae. Nana, ami hii ka'da la'ok tunga ia.”

²⁰Boema, hataholi Edom-mala lafa'da seluk lae, “Ta bole fa!” Boema ala kalua loo solda'du mabe'i-balakaik-kala, fo sapu-la leoina Israel-la.

²¹Boema hataholi Israel-la, ala lepos fali, de ala sanga eno fe'ek, nana hataholi Edom-mala ta fes loak, la'ok tunga sila nusan-na fa.

²²Basa hataholi Israel-la lala'en-na, la'oela Kades, boema ala losa Letek Hor-ra,

²³fo nai dae too no Edom-ma. Nai mamanak ndia, MANETUALAIN nafa'da Musa no Harun nae,

²⁴“Neukose Harun ta masok leo nusak fo, Au helu basa, fen neu leoina Israel-la fa; neukose maten, nanahu emi dua la'ban basa Au paletang-nga, neme deka no oemata Meriba so.

²⁵Moo Harun no anan Eleazar, leo Letek Hor-ra neu.

²⁶O'duheni Harun bua papaken-na, fo paken neu Eleazar. Nana, neukose mate Harun nai mamanak ndia.”

²⁷Musa tao tunga MANETUALAIN paletan-na. Boema Musa, Harun ma Eleazar nda'e leo Lete Hor-ra lain neu, de basa hataholi Israel-la lala'en-na, sakasii.

²⁸ Boema, Musa o'duheni Harun bua papaken-na, de ana paken neu Eleazar. Mate Harun nai letek ndia poin-na, de basa boema Musa no Eleazar kona falik leo dae mai.

²⁹Basa hataholi Israel-la lala'en-na, lamanene lae mate Harun so boema, basa-basas falu ma lanuu dale he'dik, faik teluhulu dalen-na.