Read Termanu BILANGAN 21 Bible Online

BILANGAN 21 - Termanu bible

BILANGAN 21

¹ Arad nde been-na, kota esa nai nusa Kanaan-na boboan kona. Lelek kota ndia manen-na, namanene lae hataholi Israel-la ala mai, de ala tunga enok Atarim-ma boema, neu sapu-nalas, de ana foo neni hataholi Israel de'ubee.

²Boema, hataholi Israel-la tao nasar, de lafa'da MANETUALAIN lae leoia, “Metema O fe ami sengi leoina ndia soona, neukose ami tao makalulutuk sila loo sila kotan-nala, losa basa la'iesak-kasa.”

³MANETUALAIN sipok hataholi Israel-la nonoken-na, de Ana tulu-falis, losa ala sengi hataholi Kanaan-nala. Boema, hataholi Israel-la tao lamopo-lamate hataholi Kanaan sila-la, loo kotan-nala, boema ala foi mamanak ndia na'de Horma.

⁴ Basa boema, hataholi Israel-la, la'oela Letek Hor-ra, de ala tunga enok manaleo Namo Akaba neu, fo ala la'ok okofefeo nusa Edom-ma. Tehu ala losa eno tala'dak boema, leoina ndia ta nakatatakak-na dalen-na so'on,

⁵de bemumu loo Manetualain ma Musa. Lafa'da lae, “Tao le'e de, o moo ami kalua meme Masir mai? Ade soaneu taomisa ami, nai moo solokaek ia do? Nai ia, ta hapu nana'ak fa, ma oe boeo, ta. Ami malua mi'a nana'a mamis ia-la!”

⁶ Boema MANETUALAIN menge malasok-kala, leu leo leoina ndia tala'da heon leu. Menge sila-la, kaa lisa hataholi Israel makadotok.

⁷Boema leoina ndia neu leo Musa neu, de nafa'da nae, “Ami masala-masingo basa so, nanahu ami bemumu moo MANETUALAIN ma o boe. Hule-haladoi neu MANETUALAIN, fo ela nadenu menge ia-la, dook-ka leme ami mai.” Boema Musa hule-haladoi fe leoina ndia.

⁸Boema MANETUALAIN nadenu Musa, fo ana taon-na menge esa, neme liti-a mai, fo ana taon neu dii esa lain.

⁹ Menge kaa hataholi see soona, neukose ana lea-hai, metema ana mete menge fo, taon neme liti ndia mai.

¹⁰Basa boema, hataholi Israel-la la'o seluk, de ala ofu leme kota Obot-ta.

¹¹Ala la'o leme Obot mai boema, ala ofu leme Abarim fo nakalulutuk ndia, fo nai moo solokaek manai nusa Moab-pa, boboan dulu.

¹²Basa boema, ala ofu leme Bafak Zered-ta.

¹³Ala la'o seluk leme ndia mai, de ala ofu leme, Lee Arnon-na selik, nai moo solokaek fo, natabaa leo hataholi Amori-la nusan-na neu. Lee Arnon ndia nde been-na, hataholi Moab-pala loo hataholi Amori-la, dae toon-na nde ndia

¹⁴Hu ndia de, nanasulak nai ‘MANETUALAIN Susula Natee-natatin-na’ dalek nae: “… Desa Waheb-pa nai nusa Sufa, ma bafan-nala; Lee Arnon-na,

¹⁵ma bafa-bafak fo latabaa losa desa Ar-ra, neu leo hataholi Moab-pa dae toon-na.”

¹⁶Ala la'o lema ndia mai, de leu leo mamanak fo loken lae, Beer, fo sosoan-na nae, oedolu-la. MANETUALAIN nafa'da hai Musa neme ndia nae, “Madenu hataholi Israel-la fo lakakabubua; te neukose Au fes oe.”

¹⁷Nai lelek ndia, leoina Israel-la, lakamee nakameek-ka nde ia nae, “Hai, oedolu-la lemin, fe emi oem-ma nasabubu mai leona, te neukose ami sipok-kana nenik nakameek.

¹⁸Oedolu fo, lasi-lasik-kala ma basa mauli-malangan leoina-ka, kalik-ka, fo nenik sila ai tete'en fo, sila koasan-na ta'du-tanan.” Ala lali leme moo solokaek-ka, leo Matana leu,

¹⁹de leme ndia mai, de leu leo Nahaliel leu, boema ala leo Bamot leu,

²⁰basa boema, ala leo bafak manai hataholi Moab-pala nusan-na nai Letek Pisga huun dae, fo nasale leo moo solokaek-ka neu.

²¹Boema, leoina Israel-la, nadenu hataholi neu lao Sihon, fo mane Amori-a neu, fo nanduku-nalosak hala heheluk-ka nde ia nae,

²²“Fe ami loak, tunga Tuan nusan-na. Ami moo ami bana-manum-mala, neukose ta singo meme enok-ka mai fa, ma neukose ami ta meu leo tina-la, ma osi angol-lala dalek meu, do minu Tuan oedolun-nala oen-na fa. Neukose ami ta singo meme okofoo lain mai fa, losa ami kalua meme Tuan nusan-na mai.”

²³Tehu, Mane Sihon-na, ta fe hataholi Israel-la loak tunga nusan-na fa. Ana naloo nakabubua solda'dun-nala, de leu leo Yahas fo nai moo solokaek-ka leu, de ala sapu-la hataholi Israel-la, leme ndia.

²⁴Tehu, nai natee-natatik ndia dalek, hataholi Israel-la, taolisa solda'du Amori makadotok. Boema, hataholi Israel-la, langatuu-la nusan-na, mulai neme Lee Arnon-na losa Lee Yabok-ka, fo hataholi Amori-la dae toon-na, nana naneak manai dae too ndia, ta bole fan.

²⁵No enok ndia, hataholi Israel-la, loso-la basa hataholi Amori-la kotan-nala, de nai dalek, hapu kota Hesybon-na, ma kota anak manai titia-tatain-nala, boema ala leo lahele leme ndia.

²⁶Hesybon nde been-na, Mane Sihon-na, nusan-na polon-na. Ana natee-natati hai no mane Moab-pa, de ana loso-na nusan-na, dodoon-na losa Lee Arnon-na.

²⁷Hu ndia de, hataholi manatao bini-la, tao bini lae leo ia, “Mai leo kota Hesybon-na mai, leo Mane Sihon-na kotan-na neu. Ami hii mita kota ia nananafofo'ak ma nanatao nabebeuk seluk.

²⁸Faik esa boema, solda'du Sihon-nala, ala mai leme kota ia mai, de ala tutulumatak sama leo ha'i-a. Fo ala tao lakalulutuk kota Ar-ra, nai Moab, de ala koasa-la pupukuk-kala, nai su'di lee Arnon-na nanalun-na.

²⁹Hai, leoina Moab-pala lemin, soe ba'eneu o! Manasene-do'ok neu Kamos-sa, neukose o mopo-mate! O lamatua daebafam-ma, po'ilotak o da'di hataholi manabokek, o inam-mala da'di mane Amori-a, hataholi nanalangen.

³⁰Tehu besak ia, mopo-mate sila tititi-nonosin, nai su'di enok maneme Hesybon leo Dibon neu-a, nanalun-na, neme Nasyim leo Nofa neu, fo deka no Medeba.”

³¹No enok ndia, leoina Israel-la, ala leo lahele leme hataholi Amori-la nusan-na.

³²Basa boema, Musa nadenu hataholi-la, leu sanga enok malole, fo leu sapu-la kota Yaezer-ra. Boema hataholi Israel-la, loso-la kota ndia, no kota ana-anak manai titia-tatain-nala, de ala usi heni hataholi Amori manaleo manai naa-la.

³³Basa ndia boema, hataholi Israel-la lepos fali, de ala tunga enok manaleo Basan neu. Mane Og-ka, no solda'dun-nala tutulumatak, de ala sapu-la hataholi Israel-la neme kota Edrei-a.

³⁴Boema MANETUALAIN nafa'da Musa nae, “Boso bii-mamata'u neun. Neukose Au fe o sengin no laun-na ma nusan-na. Taon sama leo o tao Mane Sihon fo ana paleta nai Hesybon-na.”

³⁵Boema hataholi Israel-la sengi Mane Og-ka, de ala taolisan no anan-nala, ma basa laun-na lala'en-na; ta ela esa boen. Basa boema, langatuu-la nusak ndia.