Read Termanu BILANGAN 25 Bible Online

BILANGAN 25 - Termanu bible

BILANGAN 25

¹Lelek leoina Israel-la, leo lai bafak Sitim-ma, toun-nala mulai hohonge loo ina Moab manai sila-la.

²Inak sila-la, lelekos fo leu leo mamana sosongok tatangok-kala leu, fo ala fe ha'da-hoholomata neu sila lamatua daebafak-na. Hataholi Israel-la boeo, la'a nana'ak sosongok tatangok sila la, ma ala sene-do'ok neu hataholi Moab-pala lamatua daebafak-na.

³Hu kande hataholi Israel-la, sene-do'ok neu Baal neme Peor, de MANETUALAIN namanasas, de nafa'da Musa nae,

⁴“Ho'u-ma la'iesak hataholi manada'di malangan neu leoina ndia, fo taomisas nai lea matan, fo da'di natutu'duk nae, Au paletang-nga nananakalala'ok, fo ela Au boso boe, amanasa leoina ndia bai.”

⁵Basa boema, Musa nafa'da manakee-manafula Israel-lala nae, “Emi muse taomisa la'iesak hataholi manai emi esa-esak leo-ma dalek, fo nde hataholi manasene-do'ok basa neu Baal neme Peor so.”

⁶Lelek Musa no basa hataholi Israel-la, bei lakaleleu nai MANETUALAIN Lalaa Teman-na lelesun-na bafan-na, te lita hataholi Israel esa no ina Midian esa, de leu leo lalaa teman dale leu.

⁷Lelek Eleazar anan Pinehas, fo Imam Harun-a upun-na, nita manada'dik ndia boema ana fo'a, de ana la'oela nakabubuak ndia. Ana ho'in-na tee esa,

⁸boema ana usi touk-ka no inak ndia, nai lalaa temak dalek. Ana pau hataholi ka duak sila-la, nenik tee ndia, boema soe matuaina ndia, nate'e nai Israel.

⁹Tehu ndia te, hataholi manamate basak-kala, hataholi lifun duahulu haa so.

¹⁰Boema MANETUALAIN nafa'da Musa nae,

¹¹“Eleazar anan Pinehas, fo Imam Harun-na upun-na, no napalanik, nasala'e Au na'deng-nga, nai hataholi Israel-la tala'da heon, nalosa Au nasang-nga tenak, de Au ta da'di tao amopo-amate leoina ndia so'on.

¹²Da'di, mafa'da Pinehas, mae Au tao hehelu-balataak esa on.

¹³Au aketu, Pinehas no tititi-nonosin da'di leo imam losa dodoon-na, hu kande no napalanik, nasala'e basa Au, fo ndia Manetualain-na, ma ana tao basa mole-dame ba'eneu hataholi Israel-la sala-singon so.”

¹⁴Hataholi Israel fo, nanataonisak sama-sama no ina Midian ndia, na'de Zimri, fo Salu anan-na, fo malanga uma loo esa, neme leo Simeon-na mai.

¹⁵Ina Midian ndia na'de Kozbi; fo malanga leo-ingu esa nai Midian na'de Zur, anan ndia.

¹⁶MANETUALAIN fe Musa paleta nde ia nae,

¹⁷“La'ban hataholi Midian-nala, fo tao mamopo-mamates,

¹⁸hu kande, tatao-nono'i mangalauk, fo ala tutu'u basan soaneu emi neme Peor, ma hu kande Kozbi, fo malanga leo-ingu esa nai Midian anan-na. Kozbi ndia, nde inak fo nanataonisak nai lelek soe da'di, hu kande manada'dik-ka neme Peor.”