Read Termanu BILANGAN 27 Bible Online

BILANGAN 27 - Termanu bible

BILANGAN 27

¹Zelafehad anainan lima, fo nde: Mahla, Noa, Hogla, Milka ma Tirza. Zelafehad aman nde Hefer, ma Hefer aman nde Gilead. Gilead aman nde, Makhir, ma Makhir aman nde Manasye, ma Manasye aman nde Yusuf.

²Zelafehad ana ka liman sila-la, leu leo Musa no Imam Eleazar, boema basa mauli-malanga Israel-la lala'en-na, fo ndia te, bei lakabubua deka loo MANETUALAIN Lalaa Teman-na lelesun-na. Ala lafa'da lae,

³“Ami amam maten neme moo solokaek-ka, tehu anatoun ta. Ana ta tunga Korah, fo manalena-la'ban MANETUALAIN paletan-na ndia fa. Ami amam ndia maten, nanahu sala-singon mesan-na.

⁴Tehu tao le'e de, na'den-na muse mopon neme leoina Israel-la mai, ka'da hu kande, ana ta bongi anatouk fa do? Fe ami dae pusaka, sama-sama moo ami amam tolano ka'a-fa'din-nala.”

⁵Boema, Musa nanduku-nalosak dede'ak ndia neu MANETUALAIN,

⁶de MANETUALAIN nafa'da Musa nae,

⁷ “Zelafehad anan sila-la kokolak dede'ak-ka, memang nandaa. Da'di, fes dae pusaka, sama-sama loo sila aman tolano ka'a-fa'din-nala. Muse fe Zelafehad baba'en ndia, leo anainan-nala neu.

⁸Mafa'da leoina Israel-la, mae metema touk esa maten, tehu anatoun ta, soona muse fe dae pusakan-na leo anainan-na neu.

⁹Metema anainan ta soona, fe dae pusakan-na leo tolano toun-na neu.

¹⁰Ma metema, tolano toun ta, soona muse emi fe pusakan ndia leo aman tolano toun-nala neu.

¹¹Ma metema, aman tolano toun ta, soona muse emi fe pusakan ndia leo tia-lain mana dekak, nai leo-ingu-na dalek, fo ana taon da'di ndia pusakan.” Ndia nde muse da'di nakeketuk ba'eneu hataholi Israel-la, sama leo hata fo, MANETUALAIN paletan neu Musa.

¹² MANETUALAIN nafa'da Musa nae, “Kae leo letek Abarim lain muu, fo lalana nusak fo, neukose Au fen neu hataholi Israel-la.

¹³O lalana basan, soona neukose o mate sama leo makahulun-na, o ka'am Harun boe,

¹⁴nana emi dua la'ban Au paletang-nga neme moo solokaek Zin-na. Lelek basa laun-na lala'en-na, bemumu loo Au neme Meriba, tehu emi ta nau matu'du Au koasang-nga nenik oe ndia, nai sila matan fa.” (Manada'dik ndia, ana da'di neme oemata Meriba nai Kades, fo nai moo solokaek Zin-na.)

¹⁵Boema Musa hule-haladoi nae,

¹⁶“Ou MANETUALAIN, fo manafe maso'dak neu basa maso'dak lala'en-na, au dokodoe, fo matu'du hataholi esa, soaneu nauli-nalanga leoina ia;

¹⁷ hataholi fo, ana bisa da'di malanga solda'du matuaina, nai lelek ala latee-latati. Boso po'ilotak O anam ia-la, sama leo bi'ilopo fo manafoon ta.”

¹⁸ Boema, MANETUALAIN nafa'da Musa nae, “Maloo Yosua, fo Nun anan-na. Ndia hataholi esa, bafa da'uk. Tao o limam-ma neu langan lain.

¹⁹Madenun fo napadeik neu Imam Eleazar-ra, ma basa hataholi Israel-la lala'en-na matan. O muse po'a-benga nai basa hataholi sila-la matan, mae Yosua nggati o.

²⁰Fen o koasam-ma seli, fo ela hataholi Israel-la, ala tunga paletan-na.

²¹ Yosua muse noke natutu'duk neme Imam Eleazar-ra mai, ma Eleazar muse natane Au hihii-nanaung nenik ana pake Urim ma Tumim. No enok ndia, hela-nole Yosua, ma basa leoina Israel-la lala'en-na, nai basa dede'ak lala'en fo latongo loon.”

²²Musa tao-tungan sama leo MANETUALAIN paleta neun-na. De nadenu Yosua napadeik neu Imam Eleazar-ra, ma basa hataholi Israel-la matan-na.

²³ Boema, ana tao liman-na neu Yosua langan lain, boema ana po'a-benga, nae mana nggati ndia, nde Yosua, sama leo MANETUALAIN nafa'da neun.